فیضآباد ناحیهسی اهالیسی: یۉل قوریلیشی حقیدهگی وعدهلردن بیزگه فقط چنگ و ویرانهگرچیلیک نصیب بۉلگن
بابک فرامرز
فیضآباد شهری، بدخشان مرکزینینگ آلتینچی ناحیهسی اهالیسی اوشبو حدودده یۉل قوریلیشی لایحهسی تۉختهب قالگنیدن شکایت قیلماقده. اولر مذکور یۉلنی قوریش اوچون یوزدن آرتیق اوی و دوکان بوزیلگنینی، بیراق لایحه ایشلری یریم یۉلده تۉختهب، یۉلنینگ اَیریم قسملری هنوز چله قالگنینی اَیتماقده. بو اهالی طالبان یۉلنینگ فقط کیچیک بیر قِسمینی قورگنی، باشقه قسملری اېسه هنوز توپراق و ویرانه حالتده قالهیاتگنینی تأکیدلهماقده.
دشت شهدا اهالیسیدن بیری خیرالدین (مستعار)، طالبان اوشبو یۉلنی قوریش اوچون اویینینگ یریمیدن کۉپراغینی بوزگنینی اَیتهدی. او قۉشیمچه قیلهدی: «بوتون عمریم دوامیده بیر حویلی قوره آلدیم، اونی منه شو یۉل اوچون بوزیشدی، اما یۉل هم قوریلمهدی. هم یۉلیمیز کېتدی، هم اوییم.»
دشت شهدانینگ ینه بیر اهالیسی محمدیار (مستعار)، اوشبو یۉل قوریلیشی ایشلری سېکین دوام اېتگنینی و لایحه عملگه آشیریلیشی دوامیده یۉل اطرافیده یشاوچی عایلهلر اوچون چنگ-تۉزان معمالر کېلتیریب چیقرگنینی اَیتهدی.
بو کیشی قۉشیمچه قیلیشیچه، اَیریم عایلهلرنینگ اویلری اوشبو یۉلنی قوریش اوچون بوزیلگن، اما حاضر لایحه ایشلرینینگ یریمی تۉختهب قالگن و اهالینینگ اونی یکونلش حقیدهگی مراجعتلریگه هم انیق جواب بېریلمهگن. محلی اهالینینگ اَیتیشیچه، طالبان آدملرنینگ اویلری و دوکانلرینی بوزگنلیک عوضیگه اولرگه هېچ قندهی تاوان پولی تۉلهمهگن.
محمدیار شوندهی دېیدی: «حویلیمنینگ آلدیده بیر نېچته دوکان قورگن اېدیم و هر آی دوکانلرنینگ اجاره حقیدن معلوم مقدارده پول آلیب، کون کېچیرردیم، اما حاضر دوکانلر هم، اوییمنینگ یریمی هم بوزیلدی. طالبان تاوان پولینی تۉلهیدی، دېب امید قیلگن اېدیک، اما بو بارهده هېچ کیم بیزگه یاردم بېرمهدی.»
اوشبو حدود اهالیسیدن بیری یۉل قوریلیشی اوچون ضرور مبلغ اَیریم سوداگرلر و خصوصی کانچیلیک کمپنیلری تامانیدن تأمینلنیشی رېجهلشتیریلگنینی اَیتهدی. اونینگ سۉزلریگه کۉره، بیر نېچه کمپنی و سوداگر لایحه خرجتلرینی مالیهلشتیریش مسوولیتینی اۉز ذمّهسیگه آلگن، بیراق ایشلر دوامیده اونی مالیهلشتیریشنی دوام اېتتیریشدن واز کېچگن و لایحه چله قالگن.
فیضآبادلیک بو اهالی شوندهی دېیدی: «نهایت چنگ-تۉزاندن قوتولهمیز و یۉل قوریلهدی، دېب خورسند اېدیک، اما حاضر ویرانهگرچیلیک اوّلگیدن هم کۉپهیگن. کان اېگهلری هم بو یۉلنی یکونلش اوچون باشقه پول بېرمسلیکلرینی اَیتیشدی.»
طالبان ۱۴۰۴-ییل ۲۸-جدی کونی بدخشان اخبارات و مدنیت باشقرمهسینینگ ایکّی هفتهلیک نشریده قیمتی ۲۰ میلیون افغانی بۉلگن اوشبو لایحه باشلنگنینی معلوم قیلگن اېدی. اوشبو حساباتگه کۉره، لایحه خرجتلرینی طالباننینگ سابق کانلر و نفت وزیری شفیقالله حفیظی سارنوال حبیبشاه، عبدالهادی صراف، حاجی فواد و ارباب نعیم تأمینلشی کېرهک اېدی.
محلی منبعلرگه کۉره، اوشبو لایحهنی مالیهلشتیرووچیلردن فقط ایکّی نفری وعده قیلینگن مبلغنی تۉلهگن، باشقه مالیهلشتیرووچیلر اېسه لایحه خرجتلرینی تۉلهشگه تیّار اېمس.
محلی آقسقاللردن بیری عبدالستار (مستعار)، اۉزی و بیر گروه خلق وکیللری لایحهنی یکونلش اوچون تېگیشلی ادارهلرگه مراجعت قیلگنینی، اما اولرنینگ طلبیگه اعتبار بېریلمهگنینی اَیتهدی.
بو کیشی شوندهی دېیدی: «اوشبو یۉلنی یکونلش اوچون ادارهدن ادارهگه باردیک، اما هېچ کیم بیز بیلن گپلشیشگه و طلبیمیزگه اعتبار بېریشگه تیّار اېمس. بو لایحه شفیقالله حفیظینینگ تشبثی بیلن باشلنگن اېدی، اما او کانلر و نفت باشقرمهسیدن کېتگچ، لایحه چله قالدی.»
عبدالستارنینگ اَیتیشیچه، اولر کانلر و نفتنینگ سابق باشلیغی، حاضرگی بدخشان اېکینچیلیک و چارواچیلیک باشلیغی شفیقالله حفیظیدن اوشبو لایحهنی یکونلشگه یاردم بېریشینی سۉرهگنلریده، او جوابا شوندهی دېگن: «اگر اوّلگی لوازمیمدن چېتلهتیلمهگنیمده، لایحهنی اۉزیم یکونلهگن بۉلردیم، اما حاضر بونگه امکانیم یۉق.»
اوشبو لایحه باشلنگنیگه بیر نېچه آی اۉتگنیگه قرهمهی، یۉلنینگ اَیریم قِسملری هنوز چله قالگن، بوزیلگن اویلر و دوکانلر هم قَیته قوریلمهگن. محلی اهالی یۉل یکونلنگونگه قدَر قتناو و چنگ-تۉزان بیلن باغلیق معمالر دوام اېتیشینی اَیتماقده.
