طالبان محکمه‌لری عایله‌وی نزاعلرنی بو گروه علمالر کېنگشیگه تاپشیرماقده
۸صبح، کابل: طالبان عالی محکمه‌سی تامانیدن اوشبو گروه‌نینگ کابل ولایتیده‌گی مرافعه محکمه‌سی باشقیرمه‌سیگه یوباریلگن بیر مکتوب شونی کۉرسه‌ته‌دی که بیر عایله‌وی حقوقی ایش طالبان عالی محکمه‌سی تامانیدن اوشبو گروه علمالر کېنگشیگه تاپشیریلگن.
شنبه کونی، ۷ سنبله، ۸صبح گزېته‌سیگه یېتیب کېلگن اوشبو مکتوبده بیر نېچه ییل اوّل اونه‌شتیریلگن قیزلر‌نینگ حقوقلری بۉییچه دعوا حقیده سۉز باره‌دی. اولر‌نینگ اونه‌شتیریلگن ییگیتلری چېت اېلده بۉلیب، حقوقی ایشلرینی حل قیلیش اوچون طالبان محکمه‌لریگه کېلمه‌یپتی.
اوشبو مکتوبده طالبان عالی محکمه‌سی‌نینگ دېوانه‌خانه‌سی کابلده‌گی اوشبو گروه محکمه‌لریگه، اگر بو قیزلر‌نینگ اونه‌شتیریلگن ییگیتلری محکمه‌گه کېلمسه، اولر‌نینگ ملکلرینی انیقلب، اولر کېلگونیگه قدَر مصادره قیلیب قۉییشنی بویورگن.
شونینگدېک، اوشبو مکتوبده عایله‌وی حقوقی دعواسی بۉلگن و چېت اېلده یشه‌یاتگن شخصلرنی محکمه‌گه کېلتیریش اوچون طالبان‌نینگ تشقی ایشلر وزیرلیگیدن هم یاردم سۉره‌ش محکمه‌لرگه بویوریلگن.
مکتوبده شونده‌ی یازیلگن: «اگر اولر‌نینگ مال-ملکی انیقلنمسه، شوندن سۉنگ محکمه تشقی ایشلر وزیرلیگی آرقه‌لی….، اوشبو شخصلرنی محکمه‌گه کېلتیریش اوچون همکارلیک سۉره‌شی کېره‌ک. اگر شونده هم محکمه‌گه کېلمسه‌لر، آخر-عاقبت مسأله حل اېتیش اوچون علمالر کېنگشیگه حواله قیلینسین.»
بو حالتده طالبان‌نینگ افغانستانده قَیته حاکمیتگه کېلیشی بیلن خلق محکمه‌لرده‌گی طالبان خادملری‌نینگ کسبی ملَکه‌سی یۉقلیگی، کاغذبازلیک و اوشبو گروه اعضالری‌نینگ پاره‌خۉرلیگیدن شکایت قیلماقده.
