منبعلر: یوناما‌‌نینگ بامیانده‌گی خوفسیزلیک بۉییچه مسؤولی قوراللی هجومدن امان قالدی
۸صبح، بامیان: محلی منبعلر افغانستاندهگی بیرلشگن ملتلر تشکیلاتی یاردم هیاتی (یوناما)نینگ بامیان ولایتیده‌گی اداره‌سی خوفسیزلیک بۉییچه مسؤولیگه قوراللی هجوم اویوشتیریلگنی حقیده خبر بېردی.
منبعلر پنج‌شنبه کونی، ۳۰ میزان، ۸صبح گزېته‌سیگه معلوم قیلیشیچه، یوناما‌‌نینگ بامیانده‌گی اداره‌سی خوفسیزلیک بۉییچه مسؤولی کریم کریمی بۉلگن موتر چهارشنبه کونی اوشبو ولایت مرکزیده اۉققه توتیلگن.
منبعلر‌نینگ اَیتیشیچه، کریمی اوشبو حادثه‌ده جبرلنمه‌گن.
بو حادثه بیر هفته آلدین، ملی قرشیلیک جبهه‌سی و افغانستان آزادلیک جبهه‌سی قۉشمه بیانات اعلان قیلیب، افغانستاندهگی دیپلوماتیک وکالت‌خانه‌لر و خلق‌ارا تشکیلاتلرگه قرشی اویوشتیریلگن هجوملر صادر اېتیلیشی ممکنلیگی حقیده آگاهلنتیرگن بیر پیتده یوز بېردی.
اوشبو ایکّی جبهه تهدیدلرنی مستقل روشده تېکشیریشگه چقیرگن اېدی.
بیاناتده قید اېتیلیشیچه، آلینگن خوفسیزلیک معلوماتلریگه کۉره، طالبان‌نینگ خوفسیزلیک توزیلمه‌لری و ترورچیلیک ترماقلر بیلن علاقه‌دار اَیریم شخصلر خلق‌ارا تشکیلاتلرگه قرشی هجوملرنی رېجه‌لشتیره‌یاتگن بۉلیشی ممکن.
