آزادلیک جبههسی کنرده طالبانگه هجوم قیلگنینی معلوم قیلدی
۸صبح، کنر: آزادلیک جبههسی کنر ولایتینینگ چوکی تومنیده طالبان کوچلرینینگ تۉپلنیش جاییگه اۉز کوچلری تامانیدن هجوم اویوشتیریلگنی و اوشبو گروهنینگ بیر جنگچیسی اۉلدیریلگنینی معلوم قیلدی.
مذکور جبهه چهارشنبه کونی، ۱۸-سنبله، کېچقورون ایکس اجتماعی ترماغیدهگی صحیفهسیده بیانات اعلان قیلیب، هجوم سابق ملی اوردو بهتلیانینینگ کیریش دروازهسیده طالبان جنگچیلریگه قرشی اویوشتیریلگنینی یازگن.
بیاناتگه کۉره، هجوم عاقبتیده طالبان گروهینینگ بیر جنگچیسی اۉلدیریلگن و ینه ایکّی نفری یرهلنگن.
آزادلیک جبههسی بیاناتیده اَیتیلیشیچه، طالبانگه قرشی هجوم سهشنبهدن چهارشنبهگه اۉتر کېچهسی ساعت سکّیزلر اطرافیده عملگه آشیریلگن.
آزادلیک جبههسی معلوماتیگه کۉره، اوشبو پارتیزانلیک عملیاتیده جبهه کوچلری آرهسیده تلفات بۉلمهگن.
بو حالت طالبانگه قرشی جبههلر سۉنگگی پیتلرده مملکتنینگ تورلی حدودلریده طالبان گروهیگه قرشی هجوملرینی کوچهیتیرهیاتگن بیر پیتگه تۉغری کېلماقده.
شونگه قرهمهی، طالبان سۉنگگی بېش ییل دوامیده افغانستانده اۉزیگه قرشی جبههلر موجودلیگینی منتظم روشده انکار اېتیب کېلگن.
