کابلده قوراللی اۉغریلیکلر کۉپه‌یشی؛ هیداوچیلر‌نینگ اۉلدیریلیشیدن تارتیب، موتر و نقد پوللر‌نینگ اۉغیرلنیشیگچه
آدرینا بهزاد
کابل شهری‌نینگ اَیریم حدودلریده یشاوچیلر قوراللی اۉغریلیکلر و خوفسیزلیک‌نینگ یامانلشیب باره‌یاتگنیدن خواطر بیلدیرماقده. اولر‌نینگ اَیتیشیچه، اۉن-بیرینچی و اۉن-بېشینچی خوفسیزلیک حدودلریده قوراللنگن شخصلر آدملر‌نینگ حیاتی و کونده‌لیک فعالیتیگه جدّی تهدید سالماقده. اولر‌نینگ تأکیدلشیچه، اَیریم هیداوچیلر هجومگه اوچره‌ب، اۉلدیریلماقده یاکه هوشدن کېتکزووچی مادّه‌لر یاردمیده بېهوش قیلینیب، کېین موترلری اۉغیرلب کېتیلماقده. بو کبی حادثه‌لر کۉپه‌یه‌یاتگنیگه قره‌مه‌ی، طالبان اۉغریلیکلرنی صادر اېتگن شخصلرنی انیقلش و قۉلگه آلیش باره‌سیده ثمره‌لی چاره‌لر کۉرمه‌گن.
کابل شهری یشاوچیسی حامد (مستعار)، اۉن-بیرینچی و اۉن-بېشینچی خوفسیزلیک حدودلریده موتر اۉغریلیگی کۉپه‌یگنیدن خواطر بیلدیرماقده. اونینگ اَیتیشیچه، قوراللنگن اۉغریلر اوشبو ایکّی حدودده موترلرنی اۉغیرلش بیلن شغللنماقده. موتر اېگه‌لری طالبان‌نینگ تېگیشلی اداره‌لریگه مراجعت قیلیب، بیر نېچه بار سوریشتیروو آلیب باریشلریگه قره‌مه‌ی، اۉغیرلنگن موترلر تاپیلمه‌یپتی.
کابل یشاوچیسی شونده‌ی دېیدی: «اۉن-بیرینچی و اۉن-بېیشینچی خوفسیزلیک حدودلریده قوراللنگن اۉغریلر هیداوچیلرنی یا اۉلدیره‌دی، یاکه هوشیدن کېتکزیب، یره‌له‌یدی و موترلرینی آلیب کېته‌دی. موتر اېگه‌لری طالبان حدودی اداره‌لریگه مراجعت قیلگنلریده هم، قَیته-قَیته سوریشتیریشلریگه قره‌مه‌ی، موترلری تاپیلمه‌یدی». اونینگ اَیتیشیچه، بیر نېچه کون آلدین اۉغریلر تکسی هیداوچیسی بۉلگن دۉستینی ارزان قیمت حدودیگه آلیب باریش بهانه‌سی بیلن هوشیدن کېتکزیب، موترینی اۉغیرلب کېتگن.
حامد قۉشیمچه قیله‌دی: «بیر نېچه کون آلدین ایکّی کیشی شهرنودن تکسی هیداوچیسی بۉلگن دۉستیم‌نینگ مو‌تریگه اۉتیریب، اولردن ارزان قیمت حدودیگه آلیب باریشنی سۉره‌شگن. یۉلده اولر اۉزلریگه شربت ساتیب آلیشیب، دۉستیمگه هم بېریشگن. بیراق اونگه اوزه‌تیلگن ایچیملیککه هوشدن کېتکزووچی مادّه سالینگن اېکن. دۉستیم ایچیملیکنی ایچگنیدن سۉنگ هوشیدن کېتگن. اۉغریلر اونی بیر باغده تشلب، موترینی آلیب کېتیشگن. او اۉزیگه کېلگنیده باغده یاتگنینی کۉرگن. او طالبانگه مراجعت قیلیب، شکایت قیلگن، اما حاضرگچه مو‌تری تاپیلمه‌دی».
هیداوچیلردن بیری نوید (مستعار)، سۉنگگی پیتلرده تېلفون اۉغریلیگی هم کۉپه‌یگنینی و اۉزی بونده‌ی اۉغریلیکلر‌نینگ بیر نېچه بار گواهی بۉلگنینی اَیته‌دی.
او شونده‌ی دېیدی: «موترده‌گی یۉلاوچیلر‌نینگ تېلفونی قۉلیده، قولاغی یانیده یاکه تیزّه‌سیده تورگن بۉلسه، موترسایکلگه مینیلگن شخصلر بېکتلرده قوله‌ی فرصت پایلب توره‌دی. کیم‌نینگدیر قۉلیده تېلفون بارلیگینی پَیقه‌شلری بیلناق، موتر آینه‌سیدن تېلفوننی یولیب آلیب، قاچیب کېتیشه‌دی. یۉللرده‌گی تیربندلیکلر هیداوچیلر‌نینگ موترسایکلده قاچه‌یاتگن اۉغریلرنی تعقیب قیلیشیگه امکان بېرمه‌یدی. ترانسپورت تیربندلیگی بونده‌ی اۉغریلیکلر اوچون ینه‌ده قوله‌ی شرایط یره‌تماقده». اونینگ اَیتیشیچه، ایکّی کون آلدین هم بیر کیشی تېلفون آرقه‌لی گپلشیب تورگن پیتده اونینگ تېلفونی اۉغیرلنگن.
نوید قۉشیمچه قیله‌دی: «ایکّی کون آلدین بیر کیشی موتر‌نینگ آلد ا‌ۉریندیغیده اۉتیریب، تېلفون آرقه‌لی گپلشه‌یاتگن اېدی. یوزینی رۉمال بیلن بېرکیتگن موترسایکللیک بۉلگن شخص اونینگ قۉلیده‌گی تېلفوننی یولیب آلیب، قاچیب کېتدی. یۉللرده‌گی تیربندلیک سببلی بیز هېچ نرسه قیله آلمه‌دیک».
کۉهدامانلیک باغبان غفار (مستعار)، ۶۰ مینگ افغانی مقداریده‌گی نقد پولی اۉغیرلنگنینی اَیته‌دی. او شونده‌ی دېیدی: «باغیم حاصلینی بیر سوداگرگه ساتدیم و پولنی آلگنیمدن کېین اویگه قره‌ب یۉلگه چیقدیم. موترده هیداوچی‌نینگ ایکّی یانیده ایکّی کیشی اۉتیرگن اېدی. بیراق هیداوچی منزلگه یېتیب بارمسیمیزدن آلدین مېنی یۉل‌نینگ یریمیده توشیریب قالدیردی و تېزلیک بیلن واقعه جاییدن اوزاقلشدی. مو‌تردن توشگنیمدن کېین پولیم یۉقالگنینی پَیقه‌دیم».
کابلده یشاوچی زهرا عمکیسی‌نینگ ۱۰۰ مینگ افغانی مندوی بازاریگه کېته‌یاتگنیده اۉغیرلنگنینی اَیته‌دی. او شونده‌ی دېیدی: «عمکیم اۉغلی‌نینگ تۉییگه کېره‌کلی محصولاتلرنی خرید قیلیش اوچون آته‌م و باشقه عمکیم بیلن مندوی بازاریگه بارماقچی اېدی. اولر مرسدس روسوملی موترده بازارگه یۉل آلیشدی. آته‌م و عمکیلریمدن بیری آلد اۉریندیقلرده، پولی بۉلگن باشقه عمکیم اېسه آرقه اۉریندیقده اۉتیرگن اېدی. بیراق اولر دوکانگه یېتیب باریب، مو‌تردن توشگنلریده پوللر یۉقالگنینی پَیقه‌شدی».
شو بیلن بیرگه، بوندن بیر مدت آلدین کابل‌نینگ اَیریم اهالیسی طالبان تامانیدن قۉلگه آلینگن اۉغریلر‌نینگ ینه آزاد اېتیله‌یاتگنیدن شکایت قیلگن اېدی. اولر‌نینگ اَیتیشیچه، قۉلگه آلینگن شخصلر قیسقه مدتدن سۉنگ آزاد قیلینیب، ینه جنایی فعالیتینی دوام اېتتیرماقده. اهالی‌نینگ تأکیدلشیچه، بو شخصلر طالبانگه پول بېریش عوضیگه آزاد قیلینه‌دی. اَیریم حالتلرده اېسه اوشبو گروهگه علاقه‌دار شخصلر هم بې‌واسطه یاکه بالواسطه اۉغریلیکلرده اشتراک اېته‌دی.
بوندن تشقری، کابل‌نینگ غربی قِسمیده جایلشگن امیدسبز شهرچه‌سیده‌گی محلی منبعلر ۲۱-میزانده قوراللنگن طالبان جنگریلری اوشبو حدودده‌گی بیر اوینی اۉغیرله‌گنی حقیده خبر بېرگن اېدی.
منبعلر ۸صبح گزېته‌سیگه بېرگن صحبتیده اۉزلرینی طالبان عدلیه وزیرلیگی‌نینگ تېکشیروو هیاتی وکیللری دېب تنیشتیرگن قوراللنگن شخصلر شهرچه‌‌نینگ تۉرتینچی باسقیچیده‌گی تورر جایلردن بیری‌نینگ مال-ملکینی اۉغیرله‌گنینی تصدیقله‌گن. منبعلر‌نینگ اَیتیشیچه، طالبان‌نینگ بېش نفر قوراللنگن جنگریسی اویگه باستیریب کیریب، عایله اعضالرینی بیر خانه‌گه قمه‌ب قۉیگن و سۉنگره اولر‌نینگ برچه قیمت‌بها بویوملری همده باشقه مال-ملکلرینی آلیب کېتگن.
