اروپا اتفاقی و بیرلشگن ملتلر تشکیلاتی اهالی جمغرمه‌سی افغانستان عیاللری و قیزلری‌نینگ احتیاجلرینی قاندیریشگه چقیردی
۸صبح، کابل: اروپا اتفاقی‌نینگ انسانپرورلیک یاردمی و مدنی محافظه‌سی باشقرمه‌سی (ECHO)نینگ افغانستاندهگی ینگی باشلیغی توماس دهرمان روی، اوشبو مملکتده‌گی بیرلشگن ملتلر تشکیلاتی اهالی جمغرمه‌سی (UNFPA) وکیلی کوابینا اسنتی انتیامواه بیلن اوچره‌شدی.
بیرلشگن ملتلر تشکیلاتی اهالی جمغرمه‌سی سه‌شنبه کونی، ۲۸-میزان، مذکور تشکیلات‌نینگ اروپا اتفاقی انسانپرورلیک یاردمی باشقرمه‌سی بیلن اوزاق ییللیک همکارلیگی افغانستاندهگی عیاللر و قیزلر‌نینگ حیاتی مهم احتیاجلریگه اۉز وقتیده جواب بېریش اوچون کتّه اهمیتگه اېگه اېکنینی معلوم قیلدی.
اوشبو تشکیلات افغانستاندهگی عیاللر و قیزلر‌نینگ انسانپرورلیک احتیاجلرینی قاندیریش اوچون همکارلیکنی دوام اېتتیریش مهم‌لیگینی تأکیدله‌دی.
بو حالت طالبان حاکمیتنی قَیته اېگه‌لله‌گنیدن سۉنگ افغانستاندهگی عیاللر و قیزلر تعلیم آلیش، ایشلش و اساسی خدمتلردن فایده‌لنیش باره‌سیده کېنگ کۉلملی چېکلاولرگه دوچ کېله‌یاتگن بیر پیتده یوز بېرماقده.
اوشبو چېکلاولر اقتصادی معمالر و انسانپرورلیک احتیاجلر‌نینگ آرتیشی بیلن بیرگه، کۉپلب عیاللر و قیزلر‌نینگ تورموش شرایطینی ینه‌ده آغیرلشتیرگن.
