پاکستان‌نینگ کویته شهریده‌گی شیعه علمالری افغانستانده هزاره‌لر‌نینگ یېرلرینی تارتیب آلیش و اویلرینی بۉشه‌تیشگه مجبورلش حالتلریدن خواطر بیلدیردیلر
۸صبح، کابل: پاکستان‌نینگ شیعه علمالری و هزاره جماعه‌سی وکیللریدن عبارت بیر گروه کویته شهریده طالبان باش قونسولی بیلن اوچره‌شیب، افغانستانده اویلر‌نینگ مجبوری روشده بۉشه‌تتیریلیشی، یېرلر‌نینگ تارتیب آلینیشی همده بیر مکتب و بیلیم یورتی‌نینگ یاپیلیشی یوزه‌سیدن خواطر بیلدیردیلر.
شیعه علمالری دوشنبه کونی، ۲۷-مېزان، طالبان‌نینگ کویته‌ده‌گی باش قونسولی مولوی فضل‌الحق شاکر، بیلن اوچره‌شیب، هزاره خلقی‌نینگ اوشبو مسأله‌لر بۉییچه خواطرلرینی اونگه یېتکزدیلر.
اوچره‌شووده غزنی ولایتیده‌گی نوآباد تورر جای حدودی، نبی‌زاده شهرچه‌سی نامی بیلن مشهور سبز شهرچه‌سی همده هراتده‌گی جبرییل حدودیده جایلشگن ملک و دوکانلرنی مجبوری روشده بۉشه‌تیش مسأله‌لری کۉتریلدی.
اوشبو ییغیلیشده شیعه علمالری‌نینگ وکیللری تارتیب آلینگن یېرلر حقیده هم سۉز یوریتیب، بو باره‌ده‌گی ناراضیلیک بیاناتینی طالبان باش قونسولیگه تقدیم اېتدیلر.
اوچره‌شووده طالبان‌نینگ کویته‌ده‌گی باش قونسولی بیلدیریلگن خواطرلر و طلبلرنی کابلده‌گی طالبان رسمیلریگه یېتکزیشینی اَیتدی.
بو اوچره‌شوو طالبان سۉنگگی آیلرده اَیریم یېرلرنی «دولت ملکی» دېب اعلان قیلگن و اوشبو گروه تامانیدن اهالی یېرلری‌نینگ اېگه‌للب آلینیشی حقیده کۉپلب خبرلر ترقه‌لگن بیر پیتده بۉلیب اۉتماقده.
