طالبان‌نینگ سابق حربیلرنی قتّیق نظارت قیلیشی؛ رۉیخط توزیشدن تارتیب مرکزی حدودلرده حبسگه آلیش و قییناققه سالیشگچه
۸صبح، غزنی
غزنی، میدان وردک، بامیان و دایکندی ولایتلری‌نینگ بیر قطار یشاوچیلری بو حدودلرده طالبان‌نینگ سابق حربیلر و اولر‌نینگ عایله اعضالریگه نسبتاً کوچه‌ییب باره‌یاتگن باسیملریدن بېزار بۉلگنینی اَیتماقده. اولر سۉنگگی کونلرده طالبان جنگریلری غزنی ولایتی‌نینگ جاغوری، ناور و مالستان تومنلری، میدان وردک‌نینگ بهسود تومنی، بامیان‌نینگ اَیریم تومنلری و دایکندی ولایتی‌نینگ تومنلریده‌گی مسجد ملاامام‌لری، نفوذلی شخصلر و قیشلاق وکیللریگه اوشبو حدودلرده‌گی سابق حکومت حربیلری رۉیخطینی توزیب، اونی طالبان‌نینگ حربی بۉلیملریگه تاپشیریش حقیده بویروق بېرگنینی تأکیدله‌ماقده. منبعلرگه کۉره، طالبان سابق حربیلر‌نینگ برچه معلوماتلری، حاضرگی کسبی و حاضرگی یشه‌ش جایینی آلیشگه اورینماقده.
شونینگدېک، منبعلر طالبان بو حدودلرده سابق حربیلرنی کېنگ کۉلمده حقارت و تحقیرلش، حبسگه آلیش و قییناققه سالیش بیلن شغللنگنینی همده اۉنلب حربینی تورلی اصوللر بیلن اۉلدیرگنینی تصدیقله‌گن. اوشبو منبعلر طالبان بو حربیلر‌نینگ عایله اعضالرینی هم قییناققه سالیب، حبسگه آلگنینی و کۉپلب عایله‌لرنی قورال ساتیب آلیب، اونی اوشبو گروهگه تاپشیریشگه مجبور قیلگنینی اَیتماقده.
سۉنگگی هفته‌لرده طالبانگه قرشی جبهه‌لر‌نینگ اکثریت ولایتلرده، اینیقسه مملکت شِمالیده قوراللی هجوملری کوچه‌یگنیدن کېین، بو گروه مملکت‌نینگ مرکزی و هزاره اهالیسی یشه‌یدیگن حدودلریده هم سراسیمه‌گه توشگن. ایکّی هفته آلدین طالبان‌نینگ اۉنلب جنگریسی غزنی، میدان وردک و بامیان ولایتلری‌نینگ چېگره حدودلریگه جایلشتیریلگن و سراسیمه حالتیده بۉلگن.
حساباتده کېلتیریلگن معلوماتلرگه کۉره، طالبان جنگریلری اۉشه پیتده محلی یشاوچیلرنی بېزاوته قیلیش بیلن بیر قطارده، اَیریم سابق حربیلر بو حدودلرگه قَیتیب کېلیب، اوشبو گروهگه قرشی قوراللی جبهه توزیشگه اورینیشی ممکنلیگیدن خواطرده بۉلگن. بیراق بیر نېچه کون دوامیده آدملرنی قیدیریش و سۉراق قیلیشدن سۉنگ، ینه اۉشه حدودلرنی ترک اېتگن.
شونگه قره‌مه‌ی، خلق منبعلری طالبان استخباراتی یقینده ملا امام‌لر و قیشلاق وکیللری تامانیدن سابق حربیلر رۉیخطینی توزیب، اوشبو گروهگه تاپشیرایش حقیده بویروق بېرگنینی اَیتماقده.
سابق حربیلر و یوقاریده تیلگه آلینگن حدودلر یشاوچیلری‌نینگ بیر قِسمی بو وضعیتدن خواطر بیلدیریب، طالبان سابق حربیلر‌نینگ حیاتینی تاباره قیینلشتیره‌یاتگنینی تأکیدله‌ماقده.
غزنی ولایتی‌نینگ جاغوری تومنی یشاوچیلریدن بیری که سابق حکومت دوریده پولیس صفیده خدمت قیلگن یشاوچیلردن دیر کېم‌لیگینی آشکار قیلمسلیک شرطی بیلن ۸صبح گزېته‌سیگه بېرگن صحبتیده شونده‌ی دېیدی: «حیاتیمیزده‌گی قیینچیلیکلر کوندن-کونگه آرتیب بارماقده. سۉنگگی بېش ییل ایچیده ایکّی مرته حبسگه آلیندیم. بیر سفر بیر دانه قورال ساتیب آلیب، تومنگه تاپشیریشگه مجبور بۉلدیم. ایکّینچی سفر هم قورالیم بارلیکده عیبلنیب، اونی تاپشیریشیم کېره‌کلیگی اَیتیلدی. بو سفر اېسه مېن و عایله‌م دوچ کېله‌یاتگن آغیر اقتصادی معمالرگه قره‌مه‌ی، آزاد بۉلیشیم اوچون بیر دانه کلاشنکوف ساتیب آلیش خرجتیگه تېنگ مبلغنی تومنگه تۉله‌شگه مجبور بۉلدیک.» او اۉنلب سابق خوفسیزلیک کوچلری خادملری هم او کبی تقدیرگه دوچ کېله‌یاتگنینی و وقتی-وقتی بیلن طالبان تامانیدن حبسگه آلینیب، قییناققه سالینه‌یاتگنینی قۉشیمچه قیله‌دی.
بو سابق حربی طالبان‌نینگ سابق حربیلر رۉیخطینی توزیش حقیدگی ینگی بویروغیدن خواطر بیلدیریب، طالبان بو ایشنی نیمه مقصدده عملگه آشیره‌یاتگنینی بیلمسلیگینی اَیته‌دی. او شونده‌ی دېیدی: «خۉش، بیز شو یېردنمیز و نیمه‌لر بۉله‌یاتگنیدن خبردارمیز. بیز‌نینگ رۉیخطیمیزنی حدود آقسقاللریدن سۉره‌شگن. ایشا‌نینگ، بیز اۉته مجبوریت طفیلی آغیر محنت قیلیب، کېچه و کوندوزیمیزنی اۉتکزیه‌پمیز و شونگه شکر قیله‌میز. اېندی بیزنی قنده‌ی تقدیر کوته‌یاتگنینی و بو رۉیخط توزیشدن مقصد نیمه اېکنینی بیلمیمن»
شو بیلن بیرگه، غزنی ولایتی‌نینگ ناور و مالستان تومنلریده‌گی منبعلر طالبان استخباراتی برچه ملا امام‌لر و قیشلاق ملکلرینی چقیریب، اولرگه امکان قدَر تېزراق سابق حربیلر رۉیخطینی توزایش حقیده بویروق بېرگنینی تصدیقله‌گن.
باشقه تاماندن، غزنیدن تشقری، اوشبو ولایتگه قۉشنی دایکندی ولایتیده‌گی محلی کېنگشلر و مسجد ملا امام‌لری هم شو کونلرده طالبان استخباراتی بویروغی بیلن سابق حربیلر رۉیخطینی توزیش بیلن شغللنماقده و عینی پیتده سابق حربیلر همده اولر‌نینگ عایله اعضالریگه نسبتاً باسیملر کوچه‌یگن.
دایکندی ولایتی‌نینگ سنگ‌تخت و بندر تومنیده یشاوچی و سابق حکومت قوله‌گنیدن کېین مملکت تشقریسیگه کېتگن سابق حربیلردن بیری محمد رحمانی شو کونلرده اجتماعی ترماقلرده ویدیو لوحه اعلان قیلیب، طالبان‌نینگ کېکسه آته‌سی بیلن معامله‌سیدن ناراضیلیگینی بیلدیرگن و اوشبو گروه جنگریلری آته‌سینی کمیده ۱۰ مرته حبسگه آلگنینی تأکیدله‌گن. رحمانی جنابلری‌نینگ اَیتیشیچه، طالبان شو یۉل بیلن اونگه باسیم اۉتکزیب، مملکتگه قَیتگنیدن سۉنگ اونی حبسگه آلیشگه اورینماقده. او اوشبو ویدیو لوحه‌ده طالبان رهبرلریدن سابق حربیلرنی بېزاوته قیلیش‌نینگ آلدینی آلیشنی و عمومی عفو باره‌سیده‌گی مجبوریتلریگه رعایه قیلیشنی سۉره‌گن.
طالبان گروهی‌نینگ استخباراتی تامانیدن سابق حربیلر رۉیخطینی توزیشدن خواطرلر اوشبو گروه سۉنگگی بېش ییل دوامیده سابق حربیلرنی کېنگ کۉلمده بېزاوته قیلیب کېلگنی و اۉنلب حالتلرده اوشبو حربیلر عیبلنه‌یاتگنی بیر پیتده کوچه‌یماقده.
گرچه بو گروه برچه بو عیبلاولرنی رد اېتیب، مملکتده عمومی عفوگه صادقلیگینی دعوا قیلسه-ده، بیرلشگن ملتلر تشکیلاتی‌نینگ افغانستاندهگی یاردم هیاتی (یوناما) و بیر قطار انسان حقوقلری تشکیلاتلری طالبان تامانیدن اۉنلب سابق حربیلر‌نینگ اۉلدیریلگنینی حجتلشتیرگن.
