بیرلشگن ملتلر تشکیلاتی برقرار برق انرژیسیدن فایده‌لنیش امکانیتی‌نینگ یۉقلیگینی افغانستان اقتصادی اۉسیشی آلدیده‌گی معما دېب اته‌دی
۸صبح، کابل: بیرلشگن ملتلر تشکیلاتی‌نینگ ترقیات دستوری (UNDP) افغانستان بۉیلب برقرار برق انرژیسیدن فایده‌لنیش امکانیتی‌نینگ یۉقلیگی ساغلیقنی سقلش، تعلیم، تیریکچیلیک و محلی اقتصادی اۉسیشگه تأثیر قیلووچی معما اېکنینی اَیتدی.
اوشبو خلق‌ارا تشکیلات یک‌شنبه کونی، ۱- سنبله، حساباتیده برقرار برق انرژیسی‌نینگ یۉقلیگی افغانستان جمعیتیگه تأثیرینی یاریتگن.
حساباتگه کۉره، افغانستان اهالیسی‌نینگ اتیگی قریب ۴۰–۴۲ فایزی برق انرژیسیدن فایده‌لنیش امکانیتیگه اېگه بۉلیب، اولر‌نینگ قریب ۹۰ فایزی شهرلرده استقامت قیله‌دی.
بیرلشگن ملتلر تشکیلاتی افغانستان‌نینگ قیشلاق اهالیسی کتّه درجه‌ده برقرار برق انرژیسیدن فایده‌لنیش امکانیتیدن محروم اېکنینی اَیتگن.
حساباتده برقرار برق انرژیسیدن فایده‌لنیش امکانیتی محلی اقتصادی اۉسیشگه، شونینگدېک، عیال تدبیرکارلر‌نینگ فعالیتینی کوچه‌یتیریشگه سبب بۉلیشی ممکنلیگی تأکیدلنگن.
شو بیلن بیرگه، بیرلشگن ملتلر تشکیلاتی حاضرگی شرایطده قویاش انرژیسی ضرور طبی خدمتلرنی، تعلیمنی، بیزنس و تیریکچیلیکنی قۉللب-قوّتلشنی یخشیلش همده عیاللرنی چیدملیلیکدن اقتصادی رواجلنیش سری اۉتیش اوچون امکانیتلرینی کېنگه‌یتیریشده ثمره‌لی وریانت بۉلیشی ممکنلیگینی تأکیدله‌گن.
