جهان ساغلیقنی سقلش تشکیلاتی افغانستانده اَیریم یوقوملی کسللیکلر کۉپه‌یگنینی معلوم قیلدی
۸صبح، کابل: جهان ساغلیقنی سقلش تشکیلاتی (WHO) افغانستاندهگی اۉتگن آیگی ساغلیقنی سقلش حالتی حقیده ینگی حسابات اعلان قیلیب، اَیریم یوقوملی کسللیکلر ۸۵ فایزدن آرتیق آشگنینی معلوم قیلدی.
اوشبو تشکیلات پنج‌شنبه کونی، ۵-سنبله، اۉزی‌نینگ ینگی حساباتیده افغانستان بۉیلب ساغلیقنی سقلش حالتیگه تۉخته‌لگن.
حساباتگه کۉره، افغانستان‌نینگ تورلی حدودلریده اۉتکیر سوولی ایچ کېتیشی، اۉتکیر نفس یۉللری شیشگنی، دنگی ایسیتمه‌سی، قیزه‌میق، کووید-۱۹ و کانگو قان کېتیش ایسیتمه‌سی کبی یوقوملی کسللیکلر‌نینگ کۉپلب حالتلری انیقلنگن.
حساباتده قید اېتیلیشیچه، اۉتگن آیده اۉتکیر سوولی ایچ کېتیشی حالتلری ۳۱،۶ فایزگه، اۉتکیر نفس یۉللری شیشگنی ۱۸،۹ فایزگه، گمان قیلینگن دنگی ایسیتمه‌سی ۸۵،۵ فایزگه، قیزه‌میق ۶،۱ فایزگه و Cکووید-۱۹ ۷۹،۳ فایزگه آشگن.
شو بیلن بیرگه، تقدیم اېتیلگن معلوماتلر کانگو ایسیتمه‌سی حالتلری جولای آییده اۉتگن ییل‌نینگ شو دوریگه نسبتاً ۳۷،۵ فایزگه کمه‌یگنینی کۉرسه‌تماقده.
بو حالت طالبان افغانستانده قَیته حاکمیتنی قۉلگه کیریتگنیدن سۉنگ طبی خدمتلر‌نینگ سېزیلرلی درجه‌ده قیسقرگنیدن شکایتلر کۉپه‌یگن بیر پیتده یوز بېرماقده.
