یوناما: طالبان محتسبلری تامانیدن ۴۴۳ ته اۉزباشیمچه‌لیک بیلن حبسگه آلینگنی قید اېتیلگن
۸صبح، کابل: بیرلشگن ملتلر تشکیلاتی‌نینگ افغانستانده‌گی یاردم هیاتی (یوناما) اوچ آی دوامیده طالبان محتسبلری‌نینگ افغان عیاللری و اېرککلریگه نسبتاً کمیده ۴۴۳ ته اۉزباشیمچه‌لیک بیلن حبسگه آلیش و ۹۷ ته یامان معامله حالتینی حجتلشتیرگنینی معلوم قیلدی.
یوناما پنج‌شنبه کونی، ۲۳-مېزان، افغانستانده‌گی انسان حقوقلری حالتی بۉییچه ینگی حساباتیده اَیتیشیچه، حبسگه آلیشلر اساسا عیاللر‌نینگ حجابگه عاید کۉرسه‌تمه‌لرنی بوزگنلیکده، اېرککلر‌نینگ اېسه سقالینی قیسقرتیرگنلیکده یاکه ساچلرینی «غربی» اسلوبده آلدیرگنلیکده عیبلنیشی بیلن باغلیق بۉلگن.
اوشبو تشکیلات‌نینگ بیلدیریشیچه، موسیقه تینگلش و جماعت نمازیده قتنه‌شمسلیک هم قید اېتیلگن حالتلر‌نینگ باشقه سببلری بۉلگن.
حساباتگه کۉره، طالبان‌نینگ امر باالمعروف و نهی عن المنکر تۉغریسیده‌گی قانونی‌نینگ ۲۴-مادّه‌سیده منع اېتیلگن ایشلرنی صادر اېتگن شخصلر اوچون اوچ کونگچه قماق جزاسی بېلگیلنگن.
شونگه قره‌مه‌ی، یوناما اوشبو قانوننی بوزگنلیکده عیبلنیب، اوچ کوندن آرتیق مدت دوامیده حبسده سقلنگن شخصلر بیلن باغلیق حالتلرنی هم حجتلشتیرگن.
یوناما قۉشیمچه قیلیشیچه، شونده‌ی حالتلردن بیریده، ۱۷-اگوست کونی پکتیکا ولایتی‌نینگ یوسف‌خیل تومنیده‌گی علی‌آباد بازاری حدودیده طالبان‌نینگ امر باالمعروف و نهی عن المنکر باشقرمه‌سی ایکّی سرتراشنی سقالنی قیسقرتیریش و ساچنی «غربی» اسلوبده آلیشده عیبلب، بیر آی مدتگه حبسگه آلگن.
شونینگدېک، ۲۱-اگوست کونی ننگرهار ولایتی‌نینگ رودات تومنیده‌گی حصار شاهی بازاری حدودیده طالبان محتسبلری دوکاندارلر‌نینگ جماعت نمازیده قتنه‌شمه‌گنلیگی سببلی قریب ۱۰۰ ته دوکاننی یاپگن.
