یونسکو جام مناره‌سینی ترمیملش و سقلش باره‌سیده‌گی سعی-حرکتلر حقیده خبر بېردی
۸صبح، کابل: بیرلشگن ملتلر تشکیلاتی‌نینگ تعلیم، فن و مدنیت تشکیلاتی (یونسکو) افغانستان‌نینگ جهان میراثلریدن بیری بۉلگن جام مناره‌سینی سقلش و ترمیملش باره‌سیده‌گی سعی-حرکتلر حقیده خبر بېردی.
اوشبو تشکیلات یک‌شنبه کونی، ۱۹-میزان، اۉزی‌نینگ فیسبوک صحیفه‌سیده الیف (ALIPH) جمغرمه‌سی‌نینگ مالیوی یارمیده جام مناره‌سی‌نینگ حالتینی کوزه‌تیش، سوو تاشقینلری بیلن باغلیق خوفلرنی کمه‌یتیریش و اوشبو تاریخی آبده‌نی اوزاق مدت دوامیده محافظه قیلیش بۉییچه چاره‌لر عملگه آشیریلگنینی معلوم قیلدی.
یونسکو معلوماتیگه کۉره، قید اېتیلگن معلوماتلرنی منتظم روشده اۉرگنیش متخصصلرگه مناره‌‌نینگ حالتینی بهالش و اونی محافظه قیلیش بۉییچه رېجه‌لر توزیشده یاردم بېره‌دی.
شو بیلن بیرگه، یونسکو کۉپریک قوریلیشی یکونلنگچ، جام مناره‌سیگه باریش امکانیتی یخشیلنگنینی معلوم قیلدی.
اوشبو کۉپریک ملی و خلق‌ارا متخصصلر همکارلیگیده قوریلگن بۉلیب، فوق العاده چاره‌لرنی عملگه آشیریش و محلی اهالی‌نینگ خوفسیزراق قتناوینی تأمینلش اوچون شرایط یره‌ته‌دی.
تشکیلات‌نینگ تأکیدلشیچه، آغاخان جمغرمه‌سی الیف جمغرمه‌سی‌نینگ مالیوی یاردمیده جام مناره‌سی‌نینگ مستحکملیگی و برقرارلیگینی آشیریش همده اوشبو تاریخی آبده‌نی اوزاق مدت محافظه قیلیش بۉییچه چاره‌لرنی عملگه آشیرماقده.
یونسکو جام مناره‌سینی محافظه قیلیش افغانستان‌نینگ مدنی میراثینی اسره‌ش و اونی کېله‌جک اولادلر اوچون سقلب قالیش دېمک اېکنینی تأکیدله‌دی.
