قَیته کۉریب چیقیش بویروغی؛ شرعی همان امیدسبز شهرچه‌سینی بۉشه‌تیش طلبینی قطعی ایلگری سورماقده
۸صبح، کابل
۸صبح گزېته‌سیگه کېلیب توشگن حجتلر شونی کۉرسه‌ته‌دی که طالبان رهبری هبت‌الله آخوندزاده امیدسبز شهرچه‌سیگه عاید برچه حجتلرنی قندهارگه یوباریشنی طلب قیلگن. عینی پیتده، اوشبو گروه‌نینگ عدلیه وزیری شهرچه اهالیسیگه باسیم اۉتکزیب، اولردن اویلرینی بۉشه‌تیشنی طلب قیلماقده. کابل‌نینگ غربی قِسمیده جایلشگن امیدسبز شهرچه‌سی اهالیسی اۉز احوالینی «اچینرلی» دېب تعریفلب، کېچه و کوندوز قۉرقوو و خواطر ایچیده یشه‌یاتگنینی اَیتماقده. اولر‌نینگ بیلدیریشیچه، طالبان نظارتی آستیده‌گی تورلی اداره‌لرگه مراجعت قیلیب، اوشبو گروه‌نینگ قرارینی قَیته کۉریب چیقیشنی سۉره‌شگن. شونینگدېک، قندهارگه بیر نېچه بار سفر قیلیب، سابق حکومت دوریده‌گی محکمه حجتلری و قرارلرینی طالبان محکمه‌لریگه تقدیم اېتیشگن. اولر اویلرینی اۉز مبلغلری حسابیدن قورگنینی، یېرلرینی هم ساتیب آلگنینی اَیتماقده. بیراق اېندیلیکده اۉز اویلریده یشش اوچون طالبانگه اجاره حقی نامی آستیده پول تۉله‌شگه مجبور بۉلیشماقده.
طالبان رهبری هبت‌الله آخوندزاده‌‌نینگ اداره‌سی امیدسبز شهرچه‌سیگه عاید برچه حجتلرنی قَیته کۉریب چیقیش اوچون کابلدن قندهارگه یوباریشنی طلب قیلگن. ۸صبح گزېته‌سیگه کېلیب توشگن ینه بیر حجتده طالبان عالی محکمه‌سی حقوقی مسأله‌لر بۉییچه اۉرین‌باسرلیگی اوشبو گروه‌نینگ تفتیش محکمه‌سی باشچیلیگیدن شهرچه‌گه عاید حجتلرنی عالی محکمه دېوانه‌خانه‌سی باشقرمه‌سیگه تاپشیریشنی سۉره‌گنی کۉرسه‌تیلگن. حجتلر او یېردن قندهارگه یوباریلیشی کېره‌ک.
هبت‌الله آخوندزاده امیدسبز شهرچه‌سی ایشینی قَیته کۉریب چیقیش حقیده بویروق بېرگن بیر پیتده، طالبان‌نینگ عدلیه وزیری عبدالحکیم شرعی اوی اېگه‌لری اوستیدن باسیمنی دوام اېتتیریب، اولردن اویلرینی بۉشه‌تیشنی طلب قیلماقده. او، شونینگدېک، اوی اېگه‌لریگه هر بیر خانه اوچون هر آی طالبانگه ۴ مینگ افغانی اجاره حقی تۉله‌شنی بویورگن.
امیدسبز شهرچه‌سی اهالیسی طالبان عدلیه وزیری‌نینگ بویروغی بیلن آلتی آیدن بویان اۉز خصوصی اویلریده یشش اوچون هر آی اجاره حقی تۉله‌شگه مجبور بۉله‌یاتگنینی اَیتماقده.
شهرچه‌‌نینگ اَیریم اهالیسی امیدسبز ایشی قَیته کۉریب چیقیلیشی حقیده طالبان رهبری بویروق بېرگنیگه قره‌مه‌ی، اوشبو گروه عدلیه وزیرلیگی گروهلری هر کونی آدملرگه باسیم اۉتکزیب، اویلرینی بۉشه‌تیشنی طلب قیله‌یاتگنینی اَیتماقده. اَیریم اوی اېگه‌لری رسمی ملک حجتلرینی تقدیم اېتیب، اولر‌نینگ ملک حقوقینی تصدیقلاوچی حجتلری اوّلگی حکومت دوریده اوچ باسقیچلی سود تیزیمی آرقه‌لی رسمیلشتیریلگنینی تأکیدله‌ماقده. بیراق طالبان بو حجتلرنی تن آلمه‌یپتی.
امبدسبز شهرچه‌سی اهالیسیدن بیری شونده‌ی دېیدی: «ایشا‌نینگ، آدملر جوده تشویشده. اقتصادی احوال آغیر، آدملر‌نینگ یېییشگه نانی یۉق بیر پیتده، اولر اۉز اویلریدن فایده‌لنگنلیک اوچون قنده‌ی قیلیب اجاره حقی تۉله‌ی آله‌دی؟ بیز [طالبان] عدلیه وزیرلیگیگه بیر نېچه بار باردیک، اما هېچ کیم آوازیمیزگه قولاق سالمه‌دی. شهرچه‌‌نینگ رسمی وکیلی بار، بیز محکمه‌گه هم عریضه بېردیک. وکیللریمیز قندهارگه باریشدی. اېندی اۉزینگیز بو حکملرگه قره‌نگ: طالبان رهبری‌نینگ اداره‌سی ایشنی طلب قیلیب آلگن، بیر آی ایچیده اېسه طالبان سودی حجتلرنی یوباریش حقیده ایکّی مرته قرار چیقرگن. اما طالبان عدلیه وزیرلیگی وزیر‌نینگ شخصی خواهشیگه ماس کېله‌دیگن ایشلرنی عملگه آشیرماقده. حتا طالبان رهبری‌نینگ بویروغینی هم تن آلمه‌یپتی و آدملرگه زۉرآورلیک بیلن مناسبتده بۉلماقده».
اوشبو شهرچه اهالیسی وکیلی اویی‌نینگ رسمی ملک حجتینی تقدیم اېتر اېکن، قوییده‌گیلرنی تأکیدله‌یدی: «اگر بو یېر باسیب آلینگن یېر بۉلسه، اونده بو ملک حجتی قنده‌ی رسمیلشتیریلگن؟ اونده یېر‌نینگ برچه خصوصیتلری، بیرینچی اېگه‌سی‌نینگ اسمی، رۉیخطگه آلیش رقمی و سود‌نینگ سقلنه‌دیگن رۉیخط دفتری قید اېتیلگن. نېگه محکمه‌نینگ حجتلرنی تصدیقلش بۉلیمیده‌گی حجتلر و رۉیخط کتابلریگه مراجعت قیلینمه‌یدی؟ بو آدملر ینه قنچه وقت عذاب و تشویش ایچیده یششی کېره‌ک؟»
باشقه تاماندن، شهرچه‌‌نینگ اَیریم اهالیسی طالبان‌نینگ مخصوص محکمه‌سینی اۉخشه‌ش وضعیتده‌گی شهرچه‌لرگه نسبتاً ایکّی خیل مناسبتده بۉلیشده عیبله‌ماقده. اولر‌نینگ دعوا قیلیشیچه، طالبان اَیریم شهرچه‌لرده حاضرگی یېر اېگه‌للاوچیلردن یېر قیمتی‌نینگ کیچیک بیر قِسمینی آلیش عوضیگه ملک حجتلرینی اولرگه قَیته تاپشیرایش حقیده قرارلر چیقرگن. بیراق امیدسبز شهرچه‌سی اهالیسیگه نسبتاً مجبوری کۉچیریش سیاستینی آلیب بارماقده.
