خلق‌ارا قیزلر کونی؛ طالبان حکمرانلیگی آستیده میلیونلب قیزلر اۉز اساسی حقوقلریدن محروم
۸صبح، کابل: بوگون، ۱۱-اکتوبر خلق‌ارا قیزلر کونی. بو کونده بوتون دنیا بۉیلب قیزلر‌نینگ حقوقلریگه علیحده اعتبار قره‌تیله‌دی. بیراق طالبان حکمرانلیگی آستیده‌گی افغانستانده میلیونلب قیزلر اۉزلری‌نینگ اساسی حقوقلریدن، خصوصاً، تعلیم آلیش حقوقیدن محروم اېتیلگن.
افغانستانده ۲،۴ میلیوندن آرتیق قیز اۉرته تعلیم آلیشدن محروم بۉلیب، مکتب و بیلیم یورتی اېشیکلری اولر‌نینگ یوزیگه یاپیق قالماقده.
قیزلر حقوقلریگه قۉییله‌یاتگن چېکلاولر تاباره کوچه‌ییب باره‌یاتگن بیر پیتده، افغانستانده باله‌لر نکاحی بیلن باغلیق خواطرلر همان دوام اېتماقده.
بیرلشگن ملتلر تشکیلاتی ۲۰۲۱-ییلده اعلان قیلگن حساباتیده افغانستانده‌گی قیزلر‌نینگ قریب ۳۰ فایزی ۱۸ یاشگه تۉلمسدن تورموشگه چیقیشینی معلوم قیلگن اېدی.
بیرلشگن ملتلر تشکیلاتی‌نینگ عیاللر تشکیلاتی اجراچی مدیری سیما بهوس هم اۉتگن کون خلق‌ارا قیزلر کونی مناسبتی بیلن اعلان قیلگن حساباتیده هر ییلی دنیا بۉیلب ۱۲ میلیوندن آرتیق قیز ۱۸ یاشگه تۉلمسدن تورموشگه چیقیشینی اَیتدی.
او حکومتلر، خلق‌ارا تشکیلاتلر و فقرالیک جمعیتینی بوتون دنیاده باله‌لر نکاحیگه برهم بېریش اوچون سعی-حرکتلرنی عملگه آشیریشگه چقیردی.
بو ییل خلق‌ارا قیزلر کونی باله‌لر نکاحیگه برهم بېریش موضوعسیگه بغیشلنگن حالده نشانلنماقده. بو اېسه قیزلر‌نینگ حقوقلرینی حمایه قیلیش، اولرگه تعلیم آلیش و رواجلنیش امکانیتلرینی یره‌تیش مهم‌لیگینی تأکیدله‌یدی.
