فایو افغانستانده یاغینگرچیلیک کۉپه‌ییشی و سوو تاشقینی خوفی آرتیشی ممکنلیگی حقیده خبر بېردی
۸صبح، کابل: بیرلشگن ملتلر تشکیلاتی‌نینگ آزیق-طعام و اېکینچیلیک تشکیلاتی (فایو) عادتده‌گیدن کۉپراق یاغینگرچیلیک للمی بوغدای اېکینلریگه یاردم بېریشی ممکنلیگینی، بیراق تۉستدن یوز بېره‌دیگن سوو تاشقینی خوفینی هم آشیریشینی معلوم قیلدی.
اوشبو تشکیلات یک‌شنبه کونی، ۱۹-میزان، افغانستان‌نینگ ۲۰۲۶–۲۰۲۷-ییللرده‌گی نم موسم اوچون اقلیم و اېکینچیلیک استقباللری حساباتیده بو مسأله‌گه تۉخته‌لگن.
مذکور استقبالگه کۉره، افغانستان‌نینگ شرقی، شِمالی-شرقی، شمالی و مرکزی حدودلریده اکتوبر آییده کۉپراق یاغینگرچیلیک کوزه‌تیلیشی کوتیلماقده.
بو یاغینگرچیلیکلر توپراق نملیگینی آشیریشی و قیشکی اېکینلر، اینیقسه، للمی بوغدای اېکیش اوچون قوله‌ی شرایط یره‌تیشی ممکن.
بیراق تشکیلات اکتوبر آییده کوچلی و محلی یاغینگرچیلیکلر تۉستدن یوز بېره‌دیگن سوو تاشقینلرگه سبب بۉلیشی، شونینگدېک، یازگی اېکینلر‌نینگ قالگن قِسمینی و باغلرده‌گی مېوه‌لرنی ییغیب آلیش جریانیگه خلل بېریشی ممکنلیگی حقیده آگاهلنتیردی.
شو بیلن بیرگه، کیمیاوی اۉغیتلر و اوروغلیک نرخلری‌نینگ آشیشی همده یازگی محصولاتلر بازاریده‌گی ناقوله‌ی وضعیت دهقانلر‌نینگ قیشکی اېکینلرگه سرمایه کیریتیش امکانیتلرینی چېکله‌ماقده.
بو قیینچیلیکلرگه قره‌مه‌ی، یېترلی یاغینگرچیلیک دهقانلرگه للمی بوغدای اېکین میدانلرینی سقلب قالیش یاکه کېنگه‌یتیریشگه یاردم بېریشی ممکن.
فایو شونینگدېک، قیش یقینلشگنی سری ییلاولرده یېم-خشک مقداری کمه‌ییشی، چاروا ماللری‌نینگ آزوقه‌گه بۉلگن احتیاجی اېسه آرتیشینی معلوم قیلدی.
اوشبو استقبالگه کۉره، اَیریم حدودلرده‌گی چاروادارلر قیشگه تیّارگرلیک کۉریش اوچون یېم-خشک ساتیب آلماقده و چاروا ماللری سانینی ترتیبگه سالماقده.
فا‌یونینگ تأکیدلشیچه، بونده‌ی وضعیت ییلاولری چېکلنگن حدودلرده‌گی چاروادارلرگه ینه‌ده کۉپراق باسیم اۉتکزیشی ممکن.
