بیرلشگن ملتلر تشکیلاتی: خوفسیزلیک‌نینگ یۉقلیگی و چېکلاولر افغانستان باله‌لری اوچون هلاکتلی عاقبتلرگه آلیب کېلدی
۸صبح، کابل: بیرلشگن ملتلر تشکیلاتی‌نینگ معلوم قیلیشیچه، خوفسیزلیک‌نینگ یۉقلیگی، قشّاقلیک، مجبوری کۉچیش و پارتلاوچی قوراللر، شونینگدېک، حقوقی چېکلاولر افغانستاندهگی باله‌لر اوچون هلاکتلی عاقبتلرگه آلیب کېلگن.
بیرلشگن ملتلر تشکیلاتی، جمعه کونی، ۱۷-مېزان، تشکیلات باش کاتبی آنتونیو گوترش‌نینگ حساباتیگه تیه‌نیب، طالبان و پاکستان اۉرته‌سیده‌گی چېگره حدودلریده تۉقنه‌شوولر‌نینگ کوچه‌ییشی هم باله‌لرگه ینه‌ده کۉپراق تأثیر کۉرسه‌تگنینی بیلدیردی.
حساباتگه کۉره، ۲۰۲۳-ییلدن ۲۰۲۵-ییلگچه بۉلگن دورده بیرلشگن ملتلر تشکیلاتی افغانستانده باله‌لر حقوقلری‌نینگ جدّی بوزیلیشیگه عاید تۉرت مینگ و ۵۸۲ ته حالتنی تصدیقله‌گن.
بو کۉرسه‌تکیچ اوّلگی حسابات دوریگه نسبتاً ۳۸ فایزگه کمه‌یگن. شونگه قره‌مه‌ی، بیرلشگن ملتلر تشکیلاتی‌نینگ تأکیدلشیچه، بو پسه‌ییش باله‌لر احوالیده سېزیلرلی یخشیلنیش یوز بېرگنینی انگله‌تمه‌یدی.
اوشبو دورده بیر مینگ و ۴۱۵ نفر باله جان بېریب یاکه یره‌لنگن. بمت قۉشیمچه قیلیشیچه، باله‌لر آره‌سیده‌گی قربانلر‌نینگ ۸۰ فایزی پارتلاوچی قوراللر و اۉق-دارولر عاقبتیده یوز بېرگن.
حساباتگه کۉره، باله‌لر حقوقلری‌نینگ جدّی بوزیلیشی بۉییچه تصدیقلنگن حالتلر‌نینگ اېنگ کتّه قِسمی طالبانگه نسبت بېریلگن.
بیرلشگن ملتلر تشکیلاتی باش کاتبی‌نینگ باله‌لر و قوراللی ماجرالر بۉییچه مخصوص وکیلی ونسا فریزر، برچه تامانلرنی باله‌لرنی حمایه قیلیش اوچون چاره‌لر کۉریشگه همده اهالی یشه‌یدیگن حدودلرده پارتلاوچی قوراللردن فایده‌لنیشدن تییلیشگه چقیرگن.
