طالبان عدلیه وزیری امید سبز شهرچه‌سی اهالیسینی اجاره حقینی تۉله‌شگه یاکه کۉچیب کېتیشگه مجبورلش اوچون قماققه آله‌دی
۸صبح، کابل: کابل شهری‌نینگ بیر گروه اهالیسی طالبان عدلیه وزیری عبدالحکیم شرعی اوشبو وزیرلیک بناسی ایچیده «تاش خانه» دېب اتله‌دیگن قماقخانه‌گه اېگه اېکنینی و امید سبز شهرچه‌سی اهالیسینی شخصی اویلریدن اجاره حقی تۉله‌شگه یاکه کۉچیب کېتیشگه مجبورلش مقصدیده قماققه آلیشینی اَیتماقده.
منبعلر جمعه کونی، ۱۷-مېزان، ۸صبح گزېته‌سیگه معلوم قیلیشیچه، طالبان عدلیه وزیری سۉنگگی بیر آی دوامیده شیعه‌لر‌نینگ اۉنلب آقسقاللری و امید سبز شهرچه‌سی اهالیسینی قماققه آلگچ، اولرنی اویلرینی بۉشه‌تیشگه یاکه اجاره حقی تۉله‌شگه مجبور قیلگن.
معلوماتلرگه کۉره، امید سبز شهرچه‌سیده‌گی اویلرینی بۉشه‌تیشگه راضی بۉلمه‌گن یاکه اجاره حقینی تۉله‌شدن باش تارتگن شخصلر «تاش خانه»ده قماققه آلینه‌دی.
منبعلر‌نینگ اَیتیشیچه، حاضر هم اوشبو شهرچه اهالیسی‌نینگ بیر قِسمی طالبان عدلیه وزیری‌نینگ قماقخانه‌سیده سقلنماقده.
بو حالت طالبان عدلیه وزیری‌نینگ بویروغی بیلن امید سبز شهرچه‌سی اهالیسی اۉزلری‌نینگ شخصی اویلریده‌گی هر بیر یشش خانه‌سی اوچون آییگه ۴ مینگ افغانی اجاره حقی تۉله‌شگه مجبور اېتیله‌یاتگن بیر پیتده یوز بېرماقده.
شو بیلن بیرگه، ۸صبح گزېته‌سی تۉپله‌گن معلوماتلرگه کۉره، طالبان عدلیه وزیری سناتوریم حدودیده (شادمان شهرچه‌سی) اوی اېگه‌لرینی مجبورا کۉچیرتیرگچ، کمیده ۷۲ ته اوینی اۉزی‌نینگ اکه-اوکه‌لری، قۉریقچیلری، قرینداشلری و یقینلریگه تاپشیرگن.
تأکیدلش جایزکی، طالبان عدلیه وزیری اوشبو گروه رهبری ملا هبت‌الله آخوندزاده‌گه یقین شخصلردن بیریدیر. او اوّل هم کابل‌نینگ غربی قِسمیده عادی اهالی و شیعه‌لر‌نینگ بیر قطار نفوذلی قبیله وکیللرینی حقارتلش، کمسیتیش، حبسگه آلیش و قماققه تشلش بیلن شغللنگن.
