بیرلشگن ملتلر تشکیلاتی: افغانستان شمالیده اوچ میلیوندن آرتیق کیشی یاردم آلدی
۸صبح، کابل: افغانستان اوچون مخصوص ایشانچ جمغرمه‌سی (STFA) بیرلشگن ملتلر تشکیلاتی‌نینگ ۱۲ ته تشکیلاتی بیلن همکارلیکده‌گی قۉشمه دستور دایره‌سیده افغانستان شِمالیده‌گی بېش ولایتده اوچ میلیوندن آرتیق کیشی انسانپرورلیک و ترقیاتگه عاید یاردم همده خدمتلردن فایده‌لنگنینی معلوم قیلدی.
مذکور تشکیلات سه‌شنبه کونی، ۱۴ میزان، اعلان قیلگن حساباتیده دستورلردن فایده‌لنگنلر‌نینگ ۵۳ فایزینی عیاللر و قیزلر تشکیل اېتیشینی بیلدیرگن.
افغانستان اوچون مخصوص ایشانچ جمغرمه‌سی‌نینگ قۉشمه دستوری بلخ، سمنگان، سرپل، فاریاب و جوزجان ولایتلریده عملگه آشیریلگن.
حساباتگه کۉره، ۲،۵ میلیوندن آرتیق کیشی اساسی خدمتلر و یخشیلنگن آست-قورمه‌لر‌دن فایده‌لنیش امکانیگه اېگه بۉلگن.
شونینگدېک، ۴۵۹ مینگ‌دن آرتیق عیال، باله و ضعیف قتلم وکیلی طبی خدمتلر همده روحی-اجتماعی یاردم آلگن.
عینی پیتده، ۱۷ مینگ‌دن آرتیق عایله تیریکچیلیک و اقتصادی قۉللب-قوّتلش خدمتلریدن فایده‌لنگن.
حسابات‌نینگ بیر قِسمیده ۴ مینگ ۳۰۹ دن آرتیق بیزنس و تدبیرکار قۉللب-قوّتلنگنی، اولر‌نینگ ۷۹ فایزی عیاللرگه تېگیشلی بۉلگنی قید اېتیلگن.
قریب ۲۹۰ مینگ کیشی هم اقلیم اۉزگریشی و قورغاقچیلیککه چیدملیلیکنی آشیریش دستورلریدن فایده‌لنگن.
حساباتگه کۉره، ۴۲ مینگ ۶۰۰ نفر عیال و قیز سوادخانلیک، تیریکچیلیک، روحی-اجتماعی یاردم و اجتماعی فعالیت دستورلریده اشتراک اېتگن.
افغانستان اوچون مخصوص ایشانچ جمغرمه‌سی اوشبو خدمتلر ۲۰۲۲-ییلدن ۲۰۲۵-ییلگچه مملکت‌نینگ شِمالیده‌گی بېش ولایتده اساسی خدمتلر، تیریکچیلیک، اقلیم اۉزگریشیگه چیدملیلیک و اجتماعی بیردملیکنی مستحکملش مقصدیده تقدیم اېتیلگنینی معلوم قیلدی.
