بیرلشگن ملتلر تشکیلاتی: طالباننینگ باستیرووچی سیاستی افغانستان بالهلرینینگ کېلهجگیگه تهدید سالماقده
۸صبح، کابل: بیرلشگن ملتلر تشکیلاتینینگ انسان حقوقلری بۉلیمی اوشبو تشکیلاتنینگ افغانستانده انسان حقوقلری بۉییچه مخصوص گزارشگری ریاچرد بنتنینگ حساباتیگه اشاره قیلیب، طالبان سیاستی افغان بالهلرینینگ اساسی حقوقلرینی جدّی روشده چېکلب، اولرنینگ کېلهجگینی کتّه خوف آستیده قالدیرگنینی معلوم قیلدی.
اوشبو تشکیلات سهشنبه کونی، ۱۷-سنبله، بېرگن حساباتیده افغانستاندهگی بالهلر و اۉسمیرلر، اینیقسه قیزلر، تعلیم آلیش، سۉز اېرکینلیگی و اجتماعی حیاتده اشتراک اېتیش امکانیتیدن محروم اېتیلگنی همده کمسیتیشگه دوچ کېلهیاتگنینی بیلدیرگن.
حساباتده اَیتیلیشیچه، افغانستان بالهلری تعلیمدن محروم اېتیلیش بیلن بیر قطارده، مجبوری و بالهلر نکاحی، بالهلر محنتی همده جنسیتگه اساسلنگن زۉرآورلیک کبی خوفلرگه هم دوچ کېلماقده.
بمت اوشبو وضعیت قشّاقلیکده یشهیاتگن، چېکّه حدودلرده استقامت قیلهیاتگن، معلوللیگی بۉلگن یاکه چېتگه سوریلگن اېتنیک و دینی گروهلرگه منسوب بالهلر اوچون ینهده آغیر اېکنینی اَیتگن.
ریچارد بنت طالباننینگ تعلیم، عامهوی اخبارات واسطهلری، مدنیت و سۉز اېرکینلیگیگه قۉیگن چېکلاولری بالهلرنینگ رواجلنیشی اوچون ضرور بۉلگن مکاننی هم تارهیتیرگنیدن آگاهلنتیرگن.
بنتنینگ اَیتیشیچه، بالهلر اېرکین فکرلهی آلهدیگن، اۉز فکرلرینی افاده اېته آلهدیگن و اۉزلری اوچون باشقهچه کېلهجکنی تصور قیله آلهدیگن محیطده تعلیم آلیشلری کېرهک. بیراق کۉپلب افغان بالهلری قۉرقوو، یکّهلنیش و ناانیقلیک شرایطیده اولغهیماقده.
