بیرلشگن ملتلر تشکیلاتی افغانستانده باله‌لر اۉرته‌سیده تۉییب-آوقت‌لنمسلیک معماسی کېسکینلشه‌یاتگنیدن آگاهلنتیردی
۸صبح، کابل: جهان آزیق-آوقت دستوری (WFP) افغانستانده باله‌لر اۉرته‌سیده‌گی تۉییب-آوقت‌لنمسلیک معماسی مبلغ یېتیشمسلیگی سبب کوچه‌ییب باره‌یاتگنی همده حیاتنی سقلب قالووچی آزیق-آوقت دستورلری‌نینگ قیسقریشی کېلگوسی آیلرده مینگلب باله‌لر‌نینگ حیاتینی خوف آستیگه قۉییشی ممکنلیگی حقیده آگاهلنتیردی.
مذکور تشکیلات سه‌شنبه کونی، ۱۳ اسد، اعلان قیلگن حساباتیده، افغانستان ولایتلری‌نینگ اوچدن بیر قِسمیده باله‌لر اۉرته‌سیده‌گی اۉتکیر تۉییب-آوقت‌لنمسلیک درجه‌سی انقراض باسقیچیگه یېتگنی و بو حالت اکتوبر آییگچه ینه‌ده کوچه‌ییشی کوتیله‌یاتگنینی معلوم قیلدی.
حساباتگه کۉره، هلمند، دایکندی، زابل، بغلان، ارزگان، پکتیکا، نورستان، سرپل، غور، قندهار، فاریاب و لوگر ولایتلری باله‌لر اۉرته‌سیده‌گی تۉییب-آوقت‌لنمسلیک معماسی بۉییچه آغیر وضعیتده توریبدی.
جهان آزیق-آوقت دستوری قۉشیمچه قیلیشیچه، باله‌لر اۉرته‌سیده‌گی تۉییب-آوقت‌لنمسلیک عادتده جولایدن اکتوبرگچه اېنگ یوقاری درجه‌گه چیقه‌دی. بیراق بو ییل کۉپلب باله‌لر حتا حاصل ییغیم-تېریمی موسمیده هم یېترلی آزیق-آوقت آلالمه‌گن.
مذکور تشکیلات ینه تأکیدلشیچه، مبلغلر زودلیک بیلن تأمینلنمسه، تۉییب-آوقت‌لنمسلیکنی دوالش و اونینگ آلدینی آلیش دستورلری ینه‌ده قیسقره‌دی همده بوندن هم کۉپراق باله‌لر خوف آستیده قاله‌دی.
