غزنی یېرآستی بازاریده‌گی ایشلر‌نینگ تۉخته‌لیشی؛ طالبان‌نینگ عامه‌وی اخبارات واسطه‌لریده‌گی نمایشی لایحه عملی ایشی تۉخته‌گنینی یشیره آلمه‌یدی
۸صبح، غزنی
۸صبح بیر نېچه کون آلدین خبریده طالبان تامانیدن ۴۰۰ میلیون افغانی مبلغ عوضیگه قوریلیشی رېجه‌لشتیریلگن غزنی شهریده‌گی یېرآستی بازاری لایحه‌سی سوو بولاقلری‌نینگ آتیلیب چیقیشی و قزیلگن حدود دېوارلری‌نینگ سودا دوکانلری تامان قوله‌ب توشیشی سببلی تۉخته‌ب قالگنینی انیقله‌گن اېدی. طالبان مونیتسی‌پلیتیتی اوشبو خبر اعلان قیلینگنیدن سۉنگ، اجتماعی ترماقلرده‌گی ساخته اکونتلر آرقه‌لی ترغیبات آلیب باریش و محلی یېتکرمه‌لرگه باسیم اۉتکزیش بیلن بیرگه، بو حدودده ایشلر دوام اېته‌یاتگنینی کۉرسه‌تیش اوچون نمایش‌کارانه ایشلرنی عملگه آشیریشگه اورینگن.
منبعلر‌نینگ اَیتیشیچه، طالبان بلدیه‌سی ۸صبح خبری اعلان قیلینگنیدن سۉنگ شرطنامه کمپنیلرنی چقیریب، اۉنلب یوک مو‌ترلریده توپراق کېلتیریب، سوو بولاقلری‌نینگ اوستینی یاپگن. منبعلرگه کۉره، قزیلگن حدودده قوله‌ب توشگن دېوارلر یقینیده هم توپراق اویوملری حاصل قیلینگن و اولر‌نینگ صورتلری اجتماعی ترماقلرده‌گی صحیفه‌لرده اعلان قیلینگن.
اوشبو خبر اوچون آلیب باریلگن تېکشیروولر شونی کۉرسه‌ته‌دی که حاضرده اوشبو لایحه قوریلیشی ایکّی قِسمگه بۉلینگن. انیقلنیشیچه، فرخی تۉرت یۉللیگی تامانیده جایلشگن لایحه‌‌نینگ بیر قِسمیدن طالبان مونیتسی‌پلیتیتی صورت و ویدېالر تیّارلش اوچون فایده‌لنگن. بو آرقه‌لی لایحه‌نی عملگه آشیریشده‌گی موفقیتسیزلیک یشیریلیشی کۉزلنگن. ختم‌المرسلین مسجدی و کلاه‌سبز تۉرت یۉللیگی یقینیده جایلشگن لایحه‌‌نینگ باشقه قِسمیده اېسه بیر نېچه سوو بولاغی آتیلیب چیقه‌یاتگن بۉلیب، بو قِسمده‌گی ایشلر بوتونله‌ی تۉخته‌تیلگن.
غزنی اهالیسیدن بیری سردار‌نینگ اَیتیشیچه: «مېن اۉزیم سوو بولاقلری‌نینگ آتیلیب چیقیشی و کلاه‌سبز یېرآستی بازاری لایحه‌سی‌نینگ بوتونله‌ی تۉخته‌ب قالگنیگه گواهمن. باشی بېرک کۉچه هنوز دوام اېتماقده. قزیلگن حدود دېوارلری هر کونی پیاده‌لر یۉلکلری و قۉشنی دوکانلر تامان تاباره کۉپراق قوله‌ب توشماقده، سوو پمپ‌لری اېسه چوقور توبیدن سوونی چیقریب آلیش اوچون کېچه و کوندوز ایشله‌ماقده. لایحه‌‌نینگ حقیقی رواجلنیشیدن هېچ قنده‌ی بېلگی کۉرینمه‌یپتی.»
غزنی اهالیسیدن ینه بیری، احمد (مستعار) شونده‌ی دېیدی: «اجتماعی ترماقلر و تلویزیونده کۉرگن نرسه‌لریم حقیده حکم چیقرمسدن، اۉز کۉزیم بیلن کۉرگنلریمنی اَیته‌من و حکم چیقریشنی خلق‌نینگ اۉزیگه قالدیره‌من. کیم‌که ایشلر دوام اېتماقده و هېچ قنده‌ی معما یۉق، دېسه، کېلسین و اوشبو بازار‌نینگ ختم‌المرسلین مسجدی یقینیده جایلشگن شمالی قِسمیده‌گی قزیلگن حدودگه بیر مرته باریب کۉرسین یاکه یوقاریدن قره‌سین. شونده بو یېرده حقیقتاً هم نېچته سوو بولاغی بارلیگینی و کېچه‌لری سوو قه‌یېردن چیقریب آلینه‌یاتگنینی کۉره‌دی.» او قۉشیمچه قیله‌دی: «قویاشنی ایکّی برماق بیلن یشیریب بۉلمه‌یدی. طالبان قنچه ترغیبات قیلمسین و بولاقلر اوستیگه توپراق تۉکیب، اولرنی یشیریشگه اورینمسین، خلق‌نینگ کۉزینی یومه آلمه‌یدی.»
طالبان‌نینگ غزنی شهریده‌گی بلدیه اداره‌سی قریب تۉرت آی اوّل غزنی شهری‌نینگ اېنگ مرکزی نقطه‌سیده جایلشگن کلاه‌سبز حدودیده یېرآستی سودا بازاری قوریلیشی باشلنگنینی معلوم قیلگن اېدی. طالبان نظارتیده‌گی اوشبو تشکیلات مذکور بازار یېر آستیده ایکّی قبت قیلیب قوریلیشینی اعلان قیلگن اېدی. بیراق محلی منبعلر ۸صبح گزېته‌سیگه تصدیقلشیچه، اوشبو بازارنی قوریش اوچون یېر قزیله‌یاتگنده، آلتی متر چوقورلیکده بیر نېچه نقطه‌دن سوو بولاقلری آتیلیب چیققن و لایحه ایشلرینی دوام اېتتیریش باشی بېرک کۉچه‌گه کېلگن.
منبعلر اوّلراق اوشبو حدوددن توپراق آلیب تشلنیب، سوو آتیلیب چیققنیدن سۉنگ، یېرآستی بازارینی قوریش اوچون قزیلگن حدود‌نینگ دېوارلری اونینگ ایکّی تامانیده‌گی سودا دوکانلری تامان آغه باشله‌گنی و بو بنالر‌نینگ چۉکیب کېتیش احتمالی موجودلیگینی اَیتگن اېدی.
منبعلرگه کۉره، طالبان‌نینگ اوشبو لایحه‌سی عملده تۉخته‌ب قالگن و اونینگ اطرافیده‌گی انشااتلر‌نینگ قوله‌ب توشیش خوفی جدّی. شونگه قره‌مه‌ی، طالبان حاضرگچه بو معما اوچون هېچ قنده‌ی تخنیکی و برقرار یېچیم تاپمه‌گن.
