ایش حقلری‌نینگ کمه‌ییشی و نرخلر‌نینگ آشیشی؛ ایشچیلر‌نینگ خرید قابلیتی ۲۵ فایزگه پسه‌یدی
۸صبح، کابل: بیرلشگن ملتلر تشکیلاتی‌نینگ آزیق-طعام دستوری (WFP) معلوم قیلیشیچه، ایش امکانیتلری و ایش حقلری‌نینگ کمه‌ییشی افغانستانده‌گی ملَکه‌سیز ایشچیلر‌نینگ حقیقی خرید قابلیتینی اۉتگن ییلگه نسبتاً ۲۵ فایزگه پسه‌یتیرگن.
مذکور دستور دوشنبه کونی، ۲۰-مېزان، اعلان قیلگن حساباتیده ملَکه‌سیز ایشچیلر هفته‌سیگه اۉرته‌چه ایکّی کون ایشلش امکانیتیگه اېگه اېکنینی بیلدیرگن.
اوشبو کۉرسه‌تکیچ اۉتگن ییلگه نسبتاً ۱۴ فایزگه، اوچ ییللیک اۉرته‌چه کۉرسه‌تکیچگه نسبتاً اېسه ۲۱ فایزگه کمه‌یگن.
حساباتگه کۉره، ملَکه‌سیز ایشچیلر‌نینگ ایش حقی هم اۉتگن ییلگه نسبتاً ۵ فایزگه پسه‌یگن.
جهان آزیق-طعام دستوری چارواچیلیککه تیه‌نه‌دیگن عایله‌لر‌نینگ خرید قابلیتی هم کمه‌یگنینی قۉشیمچه قیلگن.
تشکیلات معلوماتیگه کۉره، چاروادار بیر یاشلی اورغاچی قۉینی ساتیش آرقه‌لی ۲۶۰ کیلوگرام ارزان بوغدای اونی ساتیب آلیشی ممکن.
بو مقدار اۉتگن ییلگه نسبتاً ۱۲ فایزگه، اوچ ییللیک اۉرته‌چه کۉرسه‌تکیچگه نسبتاً اېسه ۷ فایزگه کمه‌یگن.
جهان آزیق-طعام دستوری درآمدلر‌نینگ قیسقریشی و نرخلر‌نینگ آشیشی عایله‌لر‌نینگ ضرور آزیق-طعام محصولاتلرینی خرید قیلیش امکانیتلرینی چېکله‌گنینی تأکیدله‌گن.
دستور یاقیلغی و کیمیاوی اۉغیتلر نرخی‌نینگ آشیشی ترانسپورت و ایشلب چیقریش خرجتلرینی کۉپه‌یتیریب، تاو‌رلر تأمیناتیگه تأثیر کۉرسه‌تگنینی قید اېتگن.
شو بیلن بیرگه، اۉتگن ییلگه نسبتاً دانلی بوغدای و ارزان بوغدای اونی‌نینگ نرخی ۱۰ فایزدن، قیمت بوغدای اونی‌نینگ نرخی اېسه ۶ فایزگه آشگن.
جهان آزیق-طعام دستوری معلوم قیلیشیچه، اکتوبر آیی‌نینگ بیرینچی هفته‌سیده پلو گوروچ و شوله گوروچ نرخلری ماس روشده ۱.۹ و ۱.۷ فایزگه پسه‌یگن.
شونگه قره‌مه‌ی، پلو گوروچ نرخی اۉتگن ییلگی درجه‌دن ۱۷ فایزگه، شوله گوروچ نرخی اېسه ۳۱ فایزگه یوقاری بۉلیب قالماقده.
شونینگدېک، استعمال یاغی، شکر و توز نرخلری اۉتگن ییلگه نسبتاً ماس روشده ۱۲، ۱۰ و ۴ فایزگه آشگن. دوککلی محصولاتلر نرخی ۱۲ فایزگه، نان نرخی اېسه ۳ فایزگه پسه‌یگن.
جهان آزیق-طعام دستوری معلوماتلریگه کۉره، اکتوبر آیی‌نینگ بیرینچی هفته‌سیده کچالو نرخی ۴،۱ فایزگه، پیاز ۳،۱ فایزگه و پامدور ۰،۲ فایزگه پسه‌یگن.
افغانستان ایش امکانیتلری‌نینگ قیسقریشی و یشش خرجتلری‌نینگ آشیشی بیلن یوزمه-یوز تورگن بیر پیتده، کۉپلب عایله‌لر اساسی احتیاجلرینی قاندیریش اوچون کونده‌لیک درآمدگه تیه‌نماقده.
