اوچا: افغانستانگه قَیتگن مینگلب عایله‌لر شاشیلینچ قیشکی یاردمگه محتاج
۸صبح، کابل: بیرلشگن ملتلر تشکیلاتی‌نینگ انسانپرورلیک یاردملرنی موافقلشتیریش باشقرمه‌سی (اوچا) معلوم قیلیشیچه، قیش یقینلشر اېکن، افغانستانگه قَیتگن مینگلب عایله‌لر مناسب باش‌پناه، ایسیتیش واسطه‌لری و اساسی یاردمگه زودلیک بیلن محتاج.
اوچا دوشنبه کونی، ۲۰ میزان، ایکس صحیفه‌سیده اعلان قیلگن بیاناتیده احتیاجمند عایله‌لرگه یاردم کۉرسه‌تیش کېچیکتیریلمسلیگی کېره‌کلیگینی تأکیدله‌گن.
اوشبو تشکیلات: «قیش کوتیب تورمه‌یدی، انسانپرورلیک یاردم هم کېچیکتیریلمسلیگی کېره‌ک»، دېیه قید اېتگن.
اوّلراق بیرلشگن ملتلر تشکیلاتی ۲۰۲۶-ییل اپرېلیدن دسمبریگچه ایران و پاکستاندن افغانستانگه قَیتیشی کوتیله‌یاتگن قریب ۲،۷ میلیون افغان مهاجرینی قۉللب-قوّتلش اوچون ۵۲۹ میلیون دالر ضرورلیگینی معلوم قیلگن اېدی.
شو بیلن بیرگه، خلق‌ارا مهاجرت تشکیلاتی حساباتیده افغانستانگه قَیتگن شخصلر و عایله‌لر‌نینگ ۵۴ فایزی اۉز اساسی احتیاجلرینی قاندیریش امکانیتیگه اېگه اېمسلیگینی بیلدیرگن.
بو حالت افغانستان کېنگ کۉلملی انسانپرورلیک انقراض، قشّاقلیک، آزیق-طعام خوفسیزلیگی بیلن باغلیق معمالر و کۉپلب مهاجرلر‌نینگ قَیتیشی بیلن یوزلشه‌یاتگن بیر پیتده کوزه‌تیلماقده.
مالیوی مبلغلر‌نینگ یېتیشمسلیگی هم یاردم کۉرسه‌تووچی تشکیلاتلر‌نینگ ضعیف عایله‌لرنی قۉللب-قوّتلش امکانیتلرینی چېکله‌ماقده.
