یوزلب ویزه طلبگارلرینی الدهش؛ جبرلنگنلر پوللرینی قَیتریشنی طلب قیلماقده
نیما
چېت اېل دولتلری ویزهسیگه طلبگارلرنینگ اَیریملری اَیتیشیچه، سیاحلیک کمپنیلریدن بیری ایش، تعلیم و دوالنیش ویزهلرینی آلیش بۉییچه کۉپلب وعدهلر بېریب، اولرنی الدهب، پوللرینی آلگنیدن سۉنگ اولر اوچون ویزه آلیب بېرمهگن. اولرنینگ اَیتیشیچه، بو کمپنی ویزه آلیش بهانهسیده آدملردن یوز مینگلب دالر آلگن. اولرنینگ سۉزلریگه کۉره، آدملرنینگ تکراری شکایتلریدن سۉنگ اوشبو کمپنی باشلیغی طالبان تامانیدن کابلده حبسگه آلینگن. بیراق اۉزلرینی جبرلنگن دېب تنیشتیرهیاتگن اَیریم باشقهلر بو کمپنی هنوز اۉز فعالیتینی دوام اېتتیرهیاتگنینی و اونینگ باشلیغی هم حبسده اېمسلیگینی اَیتماقده. اولر طالباندن اوشبو کمپنینینگ اېشیکلرینی یاپیشنی سۉرهماقده.
خصوصی کمپنیلر تامانیدن چېت اېل دولتلری ویزهسینی آلیش مسالهسیده الدنگنلیکلرینی اَیتهیاتگن اَیریم شخصلرنینگ سۉزلریگه کۉره، کابل شهریدهگی «رویای خلیج» ناملی سیاحلیک کمپنیسینینگ شهرنو، وزیر اکبرخان و داودزی حدودلریده، گلبهار سنتر اونگیده اوچ ته ادارهسی بار. اوشبو کمپنینینگ مزارشریف شهریدهگی مزارهوتلده هم ینه بیر وکالتخانهسی موجود. اولرنینگ اَیتیشیچه، بو کمپنی تورکیه، صربستان و باشقه اَیریم دولتلرنینگ تعلیم، ایش و دوالنیش ویزهلرینی آلیش بهانهسیده آدملردن یوز مینگلب امریکا دالرینی آلگن، بیراق ویزهلرنی آلیب بېرمهگن.
جبرلنگنلر قۉشیمچه قیلیشیچه، اۉنلب کیشیلرنینگ تکراری شکایتلریدن سۉنگ طالباننینگ کابلدهگی جنایت قیدیروو باشقرمهسی اوشبو کمپنی رهبری عبدالصمیم عباسینی حبسگه آلگن. بیراق بو گروهنینگ محکمهلری حاضرگچه ایشنی کۉریب چیقیش و آدملرنینگ پوللرینی قَیتریش اوچون اۉتکزیلمهگن. اولرنینگ اَیتیشیچه، کابلدهگی سرای شهزادهده بیر صراف هم اوشبو واقعه بیلن باغلیق حالده حبسگه آلینگن.
عینی پیتده ۸صبح اختیاریگه اوشبو کمپنی رهبرلریدن بیرینینگ آوازلی یازووی هم کېلیب توشگن بۉلیب، اونده او ویزه طلبگارلریدن بیریگه شوندهی دېیدی: «تورکیهنینگ ایش ویزهسی اوچ آیلیک ویزه بۉلیب، بیر ییللیک یشهش حقوقیگه اېگه و اونی اوزهیتیریش ممکن. اونی رسمیلشتیریش مدتی ۶۰ ایش کونی بۉلیب، ۷۲ عادی کونگه تۉغری کېلهدی. نرخی ۸ مینگ امریکا دالری دیر، اما بیزده چېگیرمه بار و ۶ مینگ امریکا دالریگه توشهدی. بونگه یشهش، ویزه و اېلچیخانهگه تاپشیریش خرجتلری کیرهدی. سیز ادارهگه مراجعت قیلینگ.»
جبرلنگنلردن بیری اوشبو کمپنی رهبری حبسده اېمسلیگینی اَیتهدی. او قۉشیمچه قیلهدی: «کیم او حبسده دېب اَیتهدی؟ او اۉزینینگ لندکروزر موتریگه مینیب، ایلنیب یوریبدی. اوندن سۉرهیدیگن هېچ کیم یۉق.» اونینگ سۉزلریگه کۉره، جبرلنگنلر ییغیلیب، طالباندن آدملرنینگ پوللرینی قَیتریشنی طلب قیلیشلری کېرهک. اونینگ اَیتیشیچه، محکمه اۉتکزیشنینگ حاجتی یۉق، چونکه آدملرنینگ پوللری صرافلیک ادارهسیده امانت صفتیده سقلنماقده و اولرگه قَیتریلیشی کېرهک.
ینه بیر جبرلنووچی تورکیه ویزهسینی آلیش اوچون اوشبو کمپنی تامانیدن الدنگنینی، هم پولیدن اَیریلگنینی، هم اونگه ویزه آلیب بېریلمهگنینی اَیتهدی. اونگه کۉره، بو شخصنی قماققه آلیش اولر اوچون هېچ قندهی فایده بېرمهیدی و آدملرنینگ پوللرینی قَیتریشی اوچون اونگه باسیم اۉتکزیلیشی کېرهک. اونینگ اَیتیشیچه، عریضه-تشویش بیلن آواره بۉلیشنینگ حاجتی یۉق، چونکه هر بیر جبرلنووچینینگ پولی مقداری انیق.
اۉزینینگ اَیتیشیچه، اوشبو کمپنی تامانیدن الدنگن ینه بیر شخص جبرلنگنلرنینگ برچهسیدن بیر جایگه ییغیلیب، طالبان ادارهلریگه مراجعت قیلیشنی سۉرهگنینی اَیتهدی. اونینگ سۉزلریگه کۉره، اوّلا کابلدهگی آدملرنینگ معماسی حل قیلینیشی کېرهک، چونکه شمالی ولایتلردن کابلگه کېلگنلرنینگ اېندی طالبان محکمه جریانلرینی اۉتکزیش اوچون قندهارگه باریشگه پولی قالمهگن و اولر ینه بیر نېچه آی یۉل یوریب سرسان بۉلیشگه مجبور بۉلهدیلر. او طالباندن اوشبو کمپنی رهبرینی امکان قدَر تېزراق آدملرنینگ پوللرینی قَیتریشگه مجبورلشنی سۉرهیدی.
ینه بیر جبرلنووچینینگ اَیتیشیچه، او باشقه بیر نېچه کیشی بیلن طالباننینگ کابلدهگی جنایت قیدیروو باشقرمهسیگه مراجعت قیلگن و طالبان محکمهلریدن هم آدملرنینگ شکایتلرینی زونلرگه اجرهتمهسلیکنی، برچه شکایتلرنی بیرته زونده رۉیخطگه آلیشنی سۉرهگن، تاکه اولر پوللرینی قَیتریش جریانینی امکان قدَر تېزراق عملگه آشیره آلسینلر. اونینگ اَیتیشیچه، اوشبو کمپنی رهبرینینگ اکهسی هم شوندهی طلب بیلن چیققن و یازمه روشده، کمپنی رهبری آزاد اېتیلگنیدن سۉنگ آدملرنینگ پوللرینی ۴۵ کون ایچیده قَیتریشگه مجبور اېکنینی بیلدیرگن.
اوشبو کمپنی تامانیدن «مزاج راضیلیگی» نامی آستیده بېریلگن مکتوبده شوندهی دېییلهدی: «شو آرقهلی معلوم قیلینهدی که «رویای خلیج» سیاحلیک و زیارت کمپنیسی یوزهگه کېلگن معمالرنی انابتگه آلگن حالده همده مالیوی ایشلرنی ترتیبگه سالیش و تۉلاولرنی منتظم روشده عملگه آشیریش مقصدیده تېگیشلی مبلغنی بېلگیلنگن وقتده تاپشیریشگه قرار قیلدی. اوشبو قرارگه اساسا، مبلغ عبدالصمیم عباسینینگ آزاد قیلینگن سنهسیدن ۴۵ کون اۉتگچ، مذکور شخصگه تۉلهب بېریلهدی و تاپشیریلهدی.»
اوشبو جبرلنگنلر، شونینگدېک، اولرنینگ سانی قریب ۳۰۰ کیشیگه یېتیشینی، اولر اوشبو کمپنی تامانیدن الدنگن و پول تۉلهگنینی، بیراق هېچ قندهی ویزه آلمهگنینی اَیتماقده.
بوندن اوّل هم آدملر اوشبو کمپنیلرنینگ فریبگرلیگی و الداویدن بیر نېچه بار شکایت قیلگن. اولر پوللرینی قَیتریشنی سۉرهب طالبان نظارتیدهگی ادارهلرگه مراجعت قیلگنلریده، قانیقرلی جواب آلمسلیکلرینی یاکه طالبان اوشبو کمپنیلردن آدملرنینگ پوللرینی قَیتریشده همکارلیک قیلیشگه تیّار اېمسلیگینی اَیتگن.
