سپینبۉلدک کسب اېگهلری: طالباننینگ تقیقی سودا-ساتیغیمیزنینگ ۵۰ فایزینی انقراضگه یوز توتدیردی
۸صبح، قندهار
قندهار ولایتینینگ سپینبۉلدک تومنیدهگی بیر قطار کسب اېگهلری و دوکاندارلر پاکستان چېگرهسی یاپیلیشی آرتیدن اولرنینگ سودا و اقتصادی فعالیتینینگ ۵۰ فایزدن آرتیغی تورغونلیککه یوز توتگنینی اَیتماقده. اولرنینگ تاکیدلشیچه، طالبان تامانیدن اۉنگ روللی موترلر آلیب کېلینیشینینگ تقیقلنیشی هم آدملرنینگ تدبیرکارلیگی کېسکین انقراضگه اوچرهشیگه سبب بۉلگن.
سپینبۉلدک تومنیدهگی سوداگرلردن بیری حاجی خدایرحیمخان شوندهی دېیدی: «پاکستان بیلن سودا یۉللرینینگ یاپیلیشی بیزنینگ تدبیرکارلیگیمیزگه جدّی ضرر یېتکزدی. بونگچه چېگرهنینگ ایکّی تامانیدهگی مینگلب آدملر عینن شو سودا آرقهلی تیریکچیلیک قیلر اېدی، بیراق حاضر کۉپچیلیک ایشسیز قالدی. افسوسکی، عادی خلقنینگ سوداسی و تدبیرکارلیگی سیاستلشتیریلدی و بو قرار نتیجهسیده اهالینینگ اقتصادی حیاتی جدّی معمالرگه دوچ کېلدی».
سپینبۉلدک کسب اېگهلرینینگ اَیتیشیچه، ایلگری اوشبو تومنگه جاپان، تایوان و سنگاپور موترلری همده موتر احتیاط قِسملری آلیب کیریلیب، ساتیلر اېدی، بیراق طالبان اولرنینگ صادراتینی تقیقلب قۉیگن.
کانتېنر اېگهلری اویوشمهسی اعضالریدن بیری بازمحمد طالباننینگ بو قراری مینگلب کمبغل عایلهلرنینگ دسترخوانی بۉشهب قالیشیگه و کۉپلب عایلهلرنینگ آغیر اقتصادی احوال همده نامعلوم تقدیرگه دوچ کېلیشیگه سبب بۉلگنینی اَیتهدی. اونینگ سۉزلریگه کۉره، اوشبو قرار سپینبۉلدک تومنیدهگی موتر بازاری بۉشهب قالیشیگه، آدملر اۉز ایش اۉرینلرینی یۉقاتیشیگه و منطقهدهگی سودانینگ قولهشیگه آلیب کېلگن.
اوشبو سوداگر شوندهی دېیدی: «اۉنگ روللی موترلر و اولرنینگ احتیاط قِسملری آلیب کېلیشینینگ تقیقلنیشی سپینبۉلدک سودا بازاریگه کوچلی تاثیر کۉرسهتدی. بو قرار نتیجهسیده موتر بازارلری بۉشهب قالدی، مینگلب آدملر ایشسیز قالدی و کۉپلب کمبغل عایلهلر اۉز درآمد منبعلریدن اَیریلدی. اگر بو تقیق دوام اېتسه، منطقهدهگی موتر سوداسی ینهده کۉپراق معمالرگه دوچ کېلهدی».
اوشبو اویوشمهنینگ ینه بیر اعضاسی لعلخان اچکزی موتر و احتیاط قِسملر سوداسی منطقه اهالیسی اوچون مهم بندلیک و درآمد منبعلریدن بیری بۉلگنینی همده اوشبو ساحهده کۉپلب سوداگرلر، احتیاط قِسملر ساتووچیلری، اوستهلر، هیداوچیلر، یوک تشووچی ایشچیلر، انبارچیلر و ترانسپورت کمپنیلری فعالیت یوریتگنینی اَیتهدی. اونینگ تاکیدلشیچه، اوشبو سودا آرقهلی نهفقط سپینبۉلدک اهالیسی فایده کۉرگن، بلکه قندهار، کابل، هلمند، زابل و افغانستاننینگ باشقه ولایتلریدهگی موتر بازارلری هم آلیب کېلینگن موترلر و پرزهلردن بهرهمند بۉلگن.
او قۉشیمچه قیلهدی: «موتر و پرزهلر سوداسی فقط بیر نېچه سوداگرنینگ شخصی بیزنسی اېمس اېدی، بلکه منطقهدهگی مینگلب اهالی اوچون مهم بندلیک و درآمد منبعی حسابلنردی. اوشبو سودا آرقهلی اوستهلر، هیداوچیلر، پرزه ساتووچیلری، یوک تشووچی ایشچیلر و انبارچیلر اۉز عایلهلرینی باقیشردی. بو سودا نهفقط سپینبۉلدک خلقیگه فایده کېلتیرر اېدی، بلکه قندهار، کابل، هلمند، زابل و باشقه ولایتلردهگی موتر بازارلری هم اونگه باغلیق اېدی».
سپینبۉلېک تومنیدهگی موتر بازاری اوستهلری رئیسی محمدهمایون طالبان تقیقیدن آلدین اوشبو بازارگه کونیگه اۉنگ روللی موترلر و پرزهلر آرتیلگن ۶۰ تگچه کانتېنر کیریب کېلیب، شو یېرده توشیریلگنینی اَیتهدی.
او شوندهی دېیدی: «طالبان تقیقیدن آلدین سپینبۉلدککه کونیگه اۉنگ روللی موترلر و پرزهلر آرتیلگن ۶۰ تگهچه کانتېنر آلیب کیریلردی. اوشبو کانتېنرلردهگی تارلر بو یېرده توشیریلیب، کېین افغانستاننینگ تورلی ولایتلریگه ترقهتیلر اېدی. بیراق اوشبو تقیق جاری اېتیلگنیدن سۉنگ موتر بازارلری بۉشهب قالدی و بیزدهگی معلوماتلرگه کۉره، اوشبو ساحهده ۶۰ مینگدن ۷۰ مینگگچه آدم ایشسیز قالدی».
سپینبۉلدک سودا بازاریدهگی کانتېنر سوداگرلریدن ینه بیری عبدالحلیم آکا شوندهی دېیدی: «موترلر و پرزهلر آلیب کېلینیشی تقیقلنگنی اعلان قیلینگنیدن سۉنگ ۱۰ نفر ییریک سوداگر اوشبو قرارنی بېکار قیلیش بارهسیده طالباننینگ تورلی رسمیلری بیلن مذاکره اۉتکزیشگه حرکت قیلدی. بیز اۉز معمالریمیزنی طالباننینگ قندهاردهگی والیسی، باش وزیرلیک دېوانی و اوشبو گروهنینگ باشقه تېگیشلی رسمیلری بیلن اۉرتاقلشدیک همده اولرگه یۉل-ترانسپورت حادثهلرینینگ آلدینی آلیش فقط آلیب کېلیشنی تقیقلش آرقهلی عملگه آشمسلیگینی اَیتدیک. اما برچه سعی-حرکتلرگه قرهمهی، طلبلریمیز قبول قیلینمهدی و سوداگرلر هېچ قندهی نتیجهگه اېریشمسدن اویلریگه قَیتیشدی».
ایلگری کانتېنر یوکلرینی ترتیبگه سالیش و جایلشتیریش ساحهسیده ایشلهگن ۲۴ یاشلی ییگیت حبیبالله کونیگه ۵ مینگدن ۱۵ مینگ پاکستان روپیهسیگچه درآمد تاپگنینی، بیراق حاضر ۱۰۰ کوندن آرتیق وقتدن بېری ایشسیز قالگنینی و شو پیتگچه باشقه ایش تاپه آلمهگنینی اَیتهدی. او ۱۱ کیشیلیک عایلهنینگ باقووچیسی اېکنینی و اولرنینگ کوندهلیک احتیاجلرینی قندهی تامینلشنی بیلمسلیگینی تاکیدلهیدی.
سپینبۉلدک افغانستاننینگ قندهار ولایتیدهگی مهم چېگره و سودا تومنلریدن بیری حسابلنیب، افغانستان و پاکستان اۉرتهسیدهگی سودا علاقهلرینی مستحکملش، سودا-ساتیقنی کېنگهیتیریش همده اقتصادی فعالیتنی رواجلنتیریشده علیحده اۉرین توتهدی.
چمهسی ۴۰۰ کون آلدین طالبان و پاکستان چېگره کوچلری اۉرتهسیدهگی تۉقنهشوولر و سیاسی کېسکینلیکلر آرتیدن سپینبۉلدک و پاکستان اۉرتهسیدهگی سودا اۉتیش جایی باشقه سودا یۉللری قطاریده بوتونلهی یاپیلگن اېدی.
رولی اۉنگ تامانده جایلشگن اۉنگ روللی موترلر«پاکستان قۉلی موترلری» یاکه «بیر کلیدلی» نامی بیلن هم تنیلگن. طالبان اوشبو موترلر هیداوچیلری یۉلنی و باشقه موترلرنینگ حرکتلنیش یۉنهلیشینی یېترلیچه کۉره آلمسلیگینی و بو حالت یۉل-ترانسپورت حادثهلرینینگ کۉپهییشیگه سبب بۉلیشینی دعوا قیلماقده.
طالبان افغانستانگه «اۉنگ روللی» موترلر آلیب کېلینیشینی تقیقلهگن و باجخانهلرگه اۉنگ روللی موترلرنی رسمیلشتیریشدن باش تارتیش حقیده کۉرسهتمه بېرگن. اوشبو قرار مذکور گروه وزیرلر کېنگشینینگ ۲۰-سانلی قراریگه اساسا قبول قیلینگن بۉلیب، طالبان مالیه وزیرلیگیگه افغانستان یۉل حرکتی تیزیمیگه ماس کېلمهیدیگن موترلرنینگ مملکتگه کیریشینینگ آلدینی آلیش وظیفهسی یوکلهتیلگن.





