«افغانستان اوچون عیاللر» تشکیلاتی سیاسی جریانده عیاللر‌نینگ مضمونلی اشتراکینی طلب قیلدی
۸صبح، کابل: «افغانستان اوچون عیاللر» تشکیلاتی بیرلشگن ملتلر تشکیلاتی باش کاتبی و اوشبو تشکیلات خوفسیزلیک کېنگشی اعضالریگه یۉلله‌گن آچیق مکتوبیده افغانستان برچه وطنداشلری‌نینگ ایسته‌گیگه اساسلنگن، ایشانچلی، اونملی و کېنگ قمراولی سیاسی جریان اوچون شرایط یره‌تیلیشینی طلب قیلدی.
تشکیلات شنبه کونی، ۳ اسد، اوشبو مکتوب افغانستان ایچکریسیده‌گی ۳۰ ته تشکیلات و ۴۵۰ نفر عیال بیلن مصلحتلشگن حالده تیّارلنگنینی معلوم قیلدی.
مکتوب‌نینگ بیرینچی بندیده بیرلشگن ملتلر تشکیلاتیدن یوناما افغانستان‌نینگ تورلی عیاللر گروهلری، دېموکرا‌تیک کوچلر، وطنداشلیک جمعیتی وکیللری و سیاسی منفعتدار تامانلر بیلن، هم افغانستان ایچیده، هم مملکت تشقریسیده، منتظم و مقصدلی اوزاق مدتلی همکارلیکنی یۉلگه قۉییش اوچون تیزیملی میکانیزم یره‌تیشی سۉره‌لگن.
مکتوبده تأکیدلنیشیچه، بونده‌ی همکارلیک فقط مصلحتلشوو بیلن چېکلنمسلیگی، بلکه افغانستان عیاللری و باشقه سیاسی همده اجتماعی آقیملر‌نینگ سیاسی جریاننی شکللنتیریشده‌گی مضمونلی و حقیقی اشتراکینی کفالتلشی کېره‌ک.
شونینگدېک، مکتوبده مستقل بهالش توصیه‌لرینی عملگه آشیریش، افغانستان بۉییچه بیرلشگن ملتلر تشکیلاتی‌نینگ مخصوص وکیلینی تعیینلش، سیاسی جریان ترقیاتینی بهالش اوچون انیق مېزانلر بېلگیلش، یوناما فعالیتی‌نینگ شفّافلیگی و حسابدارلیگینی آشیریش همده عیاللر‌نینگ سیاسی جریانده‌گی تۉلیق و تېنگ اشتراکینی کفالتلش ضرورلیگی هم تأکیدلنگن.
