۸صبح، کابل: جاو شینگ، سفیر بیجینگ در کابل، با محمدنعیم وردک، معین وزارت خارجه طالبان، درباره کشته شدن شهروندان چین در مرز افغانستان و تاجیکستان گفت‌وگو کردند.
حافظ‌ضیا احمد، معاون سخنگوی وزارت خارجه طالبان، روز چهارشنبه، ۱۲ قوس، در خبرنامه‌ای گفته است که این گروه از رویداد اخیر متاسف است.
طالبان کشته شدن شهروندان چین از خاک افغانستان را کار «دشمنان» توصیف کرده‌اند.
این گروه مدعی شده است که تحقیقات در این زمینه آغاز شده است.
گفتنی است که طی یک هفته اخیر، پنج شهروند چین در پی حمله از خاک افغانستان در مرز تاجیکستان کشته و پنج تن دیگر زخمی شدند.
شهروندان چین دو بار هدف حمله قرار گرفته‌اند که یکی از این حملات توسط هواپیمای بی‌سرنشین انجام شده است.
طالبان از بازداشت دو تن در پیوند به این رویداد در ولسوالی مایمی بدخشان خبر داده‌اند.
وزیران خارجه طالبان و تاجیکستان نیز روز گذشته درباره این رویداد گفت‌وگوی تلفنی انجام دادند.
کشورهای منطقه بارها از حضور گروه‌های تروریستی در افغانستان زیر حاکمیت طالبان ابراز نگرانی کرده‌اند، اما طالبان این نگرانی‌ها را غیرواقعی توصیف کرده بودند.
