اوچا افغانستانده پولیو‌نینگ ۳۶ ته تصدیقلنگن حالتی قید اېتیلگنینی معلوم قیلدی
۸صبح، کابل: بیرلشگن ملتلر تشکیلاتی‌نینگ انسانپرورلیک یاردملرنی موافقلشتیریش باشقرمه‌سی (اوچا) افغانستانده پولیو‌نینگ تصدیقلنگن حالتلری سانی ۳۶ تگه یېتگنینی و اوشبو کسللیکنی بوتونله‌ی یۉق قیلیشگه قره‌تیلگن سعی-حرکتلر دوام اېته‌یاتگنینی معلوم قیلدی.
اوشبو تشکیلات دوشنبه کونی، ۲۷ میزان کونی اعلان قیلگن حساباتیده، افغانستان پولیو ویروسی هنوز موجود بۉلگن دنیاده‌گی اتیگی ایکّی مملکتدن بیری اېکنینی قید اېتگن.
حساباتگه کۉره، پولیونی بوتونله‌ی یۉق قیلیش مقصدیده انسانپرورلیک همکارلر یاردمیده ۲۱-سپتمبر کونی مملکت بۉیلب پولیوگه قرشی اېملش کمپاینی باشلنگن.
اوشبو کمپاینی بېش یاشگچه بۉلگن ۱۲،۷ میلیوندن آرتیق باله‌نی قمره‌ب آلیشنی کۉزده توته‌‌دی. او ویروس‌نینگ ترقه‌لیش خوفینی کمه‌یتیریش و باله‌لرنی اوشبو کسللیکدن حمایه قیلیش مقصدیده عملگه آشیریلماقده.
اوچا جاری ییلده کسللیککه چه‌لینیش حالتلری‌نینگ اکثریتی افغانستان‌نینگ جنوبی و شرقی حدودلریده قید اېتیلگنینی بیلدیرگن.
هلمند، قندهار و ننگرهار ولایتلریده اېنگ کۉپ حالتلر انیقلنگن.
تشکیلات ینگی حالتلرنی تېزده انیقلش و کسللیک‌نینگ ترقه‌لیشی‌نینگ آلدینی آلیش چاره‌لرینی کۉریش اوچون اېملش قمراوینی کېنگ سقلش همده نظارت تیزیملرینی مستحکملش ضرورلیگینی تأکیدله‌گن.
