مولانا لطفی هروی خاطره‌سیگه بغیشلنگن مراسم منچسترده اۉتکزیلدی
۸صبح کابل:انگلستان نینگ منچستر شهریده بویوک شاعر و متفکر مولانا لطفی هروی خاطره‌سینی یاد اېتیش مراسمی بۉلیب اۉتدی.
تدبیر ادبی دوره تشبثکاری، ژورنالیست و مدنی فعال شفیع بېگ اۉغلی نینگ اوییده تشکیل قیلینیب، شهرده استقامت قیلووچی افغانستان لیک مهاجرلر، شاعر و یازووچیلر همده مدنی فعاللری قتنشدیلر.
مراسمده آنلاین طرزده اشتراک اېتگن یازووچی و ادبیاتشناس سید محمد عالِم لبیب مولانا لطفی نینگ حیاتی، علمی میراثی و ایجادی فعالیتی حقیده کېنگ معلومات بېردی. او، خصوصاً، لطفی ایجادی نینگ نوایی ادبی مکتبیگه تأثیری، شونینگدېک، اونینگ تورکی خلقلر ادبیاتیده توتگن اۉرنی حقیده سۉز یوریتدی.
ییغینده قتنشووچیلر مهاجرلیک شرایطیده بونده‌ی ادبی اوچره‌شوولرنینگ اهمیتینی علیحده تأکیدلب، یاش اولادنی کلاسیک ادبیات میراثی بیلن تنیشتیریش ضرورلیگینی قید اېتدیلر.
تدبیر دوامیده بیر گروه یاشلر لطفی هروی نینگ شعرلریدن نمونه‌لر اۉقیب، مراسمگه بدیعی روح بغیشله‌دیلر.
تدبیر یکونیده تشبثکار شفیع بېگ اۉغلی سۉزگه چیقیب، ییغیلیش قتنشوچیلریگه منّتدارلیک بیلدیردی. همده کېلگوسیده هم بونده‌ی ادبی دوره‌لرنی منتظم اۉتکزیش نیتینی اظهار اېتدی.
مولونا لطفی هروی هجری توقیزینچی عصرده افغانستان نینگ هرات ولایتیده‌گی ده‌کنار قیشلاغیده توغیلگن. او مشهد و هرات مدرسه‌لریده علم آلیب، شاهرخ میرزا، اولوغ بېک میرزا و بایسنقر میرزالر سراییده خدمت قیلگن.
لطفی اۉز اثرلرینی اۉزبېک و فارسی تیللریده یره‌تگن. شعریتی بدیعی سویه‌سی و معنوی چوقورلیگی بیلن علیحده اجره‌لیب توره‌دی. بویوک متفکر علیشېر نوایی اونی «ملک ل کلام» – «سۉز ملکی نینگ سلطانی» لقبی بیلن اعزازله‌گن. لطفی هروی نینگ شعرلری بوگونگی کونده هم تورکی خلقلر آره‌سیده سېویب اۉقیله‌دی.
مولانا لطفی هروی ۹۹ یاشیده هراتده وفات اېتگن.
