طالبان بدخشانده تۉی مراسمیده موسیقه قۉیگنلیکده عیبلب ۴۰ کیشینی حبسگه آلدی
۸صبح، بدخشان: محلی منبعلر‌نینگ اَیتیشیچه، طالبان بدخشان ولایتی‌نینگ شهربزرگ تومنیده‌گی وندیان قیشلاغی اهالیسیدن قریب ۴۰ کیشینی تۉی مراسمیده موسیقه قۉیگنلیکده عیبلب، حبسگه آلگن.
منبعلر شنبه کونی، ۹ عقرب، ۸صبح گزېته‌سیگه بېرگن معلوماتیده اوشبو واقعه تخمیناً بېش کون آلدین یوز بېرگنینی اَیتیشدی. اولر‌نینگ بیلدیریشیچه، طالبان محلی اهالی بیلن تۉقنه‌شوودن سۉنگ شهربزرگ تومنیده ۲۰ کیشینی حبسگه آلگن، ینه ۲۰ کیشینی اېسه بدخشان مرکزی فیض‌آباد شهریگه آلیب کېتگن.
منبعلر‌نینگ اَیتیشیچه، محلی اهالی‌نینگ بیر قِسمی هم حبسگه آلینیشدن قۉرقیب قاچیب کېتگن. طالبان حاضر هم اولرنی قۉلگه آلیشگه اورینماقده.
منبعلر واقعه محلی اهالی موسیقه بیلن تۉی مراسمینی اۉتکزیش اوچون طالباندن رخصت آلگنیدن کېین باشلنگنینی اَیتماقده.
منبعلرگه کۉره، طالبان و محلی اهالی اۉرته‌سیده‌گی تۉقنه‌شوو چاغیده اوشبو گروه‌نینگ بیر جنگریسی هم جان بېرگن.
بو حالت طالبان سۉنگگی بېش ییل دوامیده موسیقه ترقه‌تیشنی تقیقلش کبی کېنگ کۉلملی چېکلاولرنی جاری اېتیب کېله‌یاتگن بیر پیتده یوز بېرماقده. بونگچه هم شونگه اۉخشش واقعه‌لر حقیده خبرلر بېریلگن.
یقینده هراتده‌گی محلی منبعلر طالبان‌نینگ امر باالمعروف و نهی عن المنکر محتسبلریدن عبارت گروهی خصوصی اویلردن بیریده اۉتکزیله‌یاتگن عیاللر بزمیگه کیریب، «موسیقه آوازی اېشیتیلگنی» سببلی بیر گروه عیاللر و قیزلرنی اۉزلری بیلن آلیب کېتماقچی بۉلگنینی اَیتیشگن اېدی.
