اروپا اتفاقی افغانستانده اقتصادی امکانیتلرنی آشیریش اوچون ۴ میلیون یورودن آرتیق یاردم اجره‌تدی
۸صبح، کابل: اروپا اتفاقی (EU) معلوم قیلیشچه، یونسکو بیلن همکارلیکده افغان‌لر اوچون کۉنیکمه و سوادخوانلیک آرقه‌لی اقتصادی امکانیتلرنی آشیریشگه قره‌تیلگن ۴.۷ میلیون یورو قیمتیده‌گی ینگی دستور باشله‌دی.
اوشبو اتفاق، ۱۱- قوس، سه‌شنبه کونی، خبر بېریشیچه، مذکور دستور افغانستان‌ده‌گی بېش ولایتده ۷ مینگ و ۵۰۰ کیشینی قمره‌ب آله‌دی.
خبرگه کۉره، دستور اشتراکچیلرگه حیاتی کۉنیکمه‌لر و سوادخوانلیک بۉییچه اره‌لش سیمنار تقدیم اېته‌دی، شونده اولر اساسی قابلیتلر و اۉز احتیاجلریگه ماس اقتصادی کۉنیکمه‌لرنی اۉرگنیش امکانیگه اېگه بۉله‌دی.
اتفاق ایتیشیچه، کۉنیکمه‌لر آره‌سیده تیکووچیلیک، سوت محصولاتلرینی ایشلب چیقریش، تاووغ باقیش و قیشلاق خۉجه‌لیگی موجود بۉلیب، بو کۉنیکمه‌لر عایله‌وی درآمد یره‌تیشده مهم رۉل اۉینه‌یدی.
اروپا اتفاقی نینگ سرپرستی، ورونیکا بوسکوویچ پوخار، شونده‌ی ایتیشچه: «تعلیم و کۉنیکمه‌لرگه سرمایه کیریتیش آرقه‌لی مقصدیمیز افغان خلقیگه و عایله‌لرگه فراوانلیک یره‌تیشده یاردم بېریش دیر. بیز افغانستان خلقی نینگ یانیده‌میز.»
اروپا اتفاقی بیلدیریشیچه، اوشبو تشبث یونسکو بیلن همکارلیکنی اۉز ایچیگه آله‌دی و ۲۰۲۳ ییلدن بېری ۵۶ مینگدن آرتیق کیشینی قمره‌ب آلگن.
