فائو: افغانستان دهقانلری هنوز قورغاقچیلیک، سوو تنقیصلیگی و اقتصادی باسیملرگه دوچ کېلماقده
۸صبح، کابل: بیرلشگن ملتلر تشکیلاتی‌نینگ آزیق-آوقت و اېکینچیلیک تشکیلاتی (فائو) اېکینچیلیک میلیونلب افغانلر‌نینگ اساسی تیریکچیلیک منبعی بۉلیشیگه قره‌مه‌ی، افغانستاندهگی دهقانلر هنوز قورغاقچیلیک، سوو تنقیصلیگی، آفتلر، کسللیکلر و اقتصادی باسیملرگه دوچ کېله‌یاتگنینی معلوم قیلدی.
اوشبو تشکیلات سه‌شنبه کونی، ۳۰-سرطان، اعلان قیلگن حساباتیده بونده‌ی شرایطده اېکینچیلیک ساحه‌سیده‌گی فوق العاده یاردم صفتی قیشلاق عایله‌لری‌نینگ تیریکچیلیگینی سقلب قالیش و انقراضلردن کېین اولر‌نینگ تیکلنیشیگه یاردم‌لشیشده علیحده اهمیتگه اېگه اېکنینی بیلدیردی.
فائو اوشبو یاردملر صفتینی آشیریش مقصدیده ایلک بار افغانستانده ۱۹ نفر تخنیکی خادیمینی «فوق العاده وضعیتلر و آفتلر شرایطیده اېکین یېتیشتیریشگه اساسلنگن تیریکچیلیکنی قۉللب-قوّتلش ستندردلری» (SEADS) بۉییچه اۉقیتگنینی قۉشیمچه قیلدی.
حساباتگه کۉره، اوشبو خلق‌ارا ستندردلر متخصصلرگه ضرر کۉرگن حدودلر‌نینگ دلیللری و احتیاجلریگه اساسلنیب، اېکینچیلیک‌نی قۉللب-قوّتلش اوچون اېنگ مقبول وقتنی، اېنگ یخشی جواب چاره‌لرینی و اولر‌نینگ ثمره‌دارلیگینی بېلگیلشگه یاردم بېره‌دی.
فائو افغانستانده انسانپرورلیک احتیاجلر دوام اېته‌یاتگنی و میلیونلب آدملر‌نینگ اېکینچیلیککه باغلیقلیگینی انابتگه آلگن حالده، اوشبو عمومی یانده‌شوودن فایده‌لنیش اېکینچیلیک ساحه‌سیده‌گی فوق‌العاده اره‌لشوولر‌نینگ صفتی، موافقلشتیریلیشی و ثمره‌دارلیگینی یخشیلشی ممکنلیگینی تأکیدله‌دی.
