یوناما: طالبان عیاللرگه نسبتاً کمسیتووچی مناسبتلر تۉخته‌تیلسین
۸صبح، کابل: بیرلشگن ملتلر تشکیلاتی‌نینگ افغانستانده‌گی یاردم هیاتی (یوناما) اَیتیشیچه، دوکانچی عیاللر هم قۉشیلگن حالده، عیاللر طالبان رسمیلری تامانیدن آغزه‌کی حقارت، کلتکلش و حبسگه آلیش بیلن تهدید قیلیش حالتلریگه دوچ کېلگن.
اوشبو تشکیلات یک‌شنبه کونی، ۱۹-میزان، طالبان رسمیلرینی عیاللر و قیزلرگه نسبتاً کمسیتووچی مناسبتلرگه برهم بېریشگه چقیردی.
یوناما آگاهلنتیریشیچه، عیاللرنی حبسگه آلیش، کلتکلش و اولر بیلن تهدید قیلیش اولر‌نینگ اساسی حقوقلرینی بوزه‌دی.
یوناما معلوماتلریگه کۉره، اوشبو عیاللر‌نینگ اَیریملری بیر نېچه ساعت حبسده سقلنگنیدن سۉنگ آزاد قیلینگن.
هیات قۉشیمچه قیلیشیچه، بونده‌ی حرکتلر عیاللر و قیزلر‌نینگ اېرکین حرکتلنیش، سۉز اېرکینلیگی و شخصی تنلاو حقوقلرینی بوزه‌دی، شونینگدېک، اولرنی جدّی اجتماعی قاره‌لش و ینه‌ده کۉپراق چېتله‌تیلیش خوفی آستیده قالدیره‌دی.
یوناما طالبان رسمیلرینی افغانستان‌نینگ برچه وطنداشلری انسان حقوقلری و قدر-قیمتینی حرمت قیلیشگه همده مملکت‌نینگ خلق‌ارا انسان حقوقلری قانونلری دایره‌سیده‌گی مجبوریتلریگه رعایه اېتیشگه چقیردی.
بو حالت طالبان افغانستانده قَیته حاکمیتنی اېگه‌لله‌گنیدن بېری عیاللر و قیزلر‌نینگ حقوق همده اېرکینلیکلریگه نسبتاً کېنگ کۉلملی چېکلاولر جاری اېتیب کېله‌یاتگن بیر پیتده یوز بېرماقده.
قیزلر آلتینچی صنفدن یوقاری تعلیم آلیشدن، عیاللر اېسه بیلیم یورتی تعلیمیدن محروم اېتیلگن. عیاللر‌نینگ اجتماعی حیات و محنت فعالیتیده‌گی اشتراکیگه قۉییلگن چېکلاولر همان دوام اېتماقده.
