آلیب کېلیش تقیقیدن قاچاق‌چیلیکده‌گی شریکلیککچه: پاکستان دارولری افغانستان بازارلریگه قنده‌ی یېتیب بارماقده؟
۸صبح، قندهار
پاکستاندن دارو-درمان آلیب کېلیش طالبان تامانیدن تقیقلنگنیگه سکّیز آی بۉلگنیگه قره‌مه‌ی، مملکت جنوبیده‌گی ولایتلر اهالیسی بازارلر هنوز پاکستاندن ناقانونی یۉللر بیلن افغانستانگه آلیب کیریله‌یاتگن دارولر بیلن تۉلیب-تاشگنینی اَیتماقده. اولر‌نینگ تأکیدلشیچه، جنوبی ولایتلر بازارلریده پاکستان دارولری‌نینگ تکلیفی اوّلگیگه نسبتا آشگن.
اوشبو گزارش اوچون قندهار ولایتیده‌گی بیر قطار داروخانه‌لرده اۉتکزیلگن میدانی کوزه‌توولری شونی کۉرسه‌ته‌دی که ایشلب چیقریلگن سنه‌سی یقینده بۉلیشی و آلیب کېلیش تقیقلنگنیگه قره‌مه‌ی، پاکستانده ایشلب چیقریلگن دارولر مملکت جنوبیده‌گی ولایتلر بازارلریده هنوز کۉپ مقدارده ساتیلماقده.
قندهار ولایتیده‌گی ییریک دارو کمپنیلریدن بیری‌نینگ ساتووچیسی آلیب کېلیش تقیقلنگنیگه قره‌مه‌ی، پاکستان دارولری اوّلگیدېک ناقانونی یۉللر بیلن افغانستانگه آلیب کیریله‌یاتگنینی اَیته‌دی. او هر ایکّی کونده پاکستاندن سپین بولدک یۉلی آرقه‌لی اۉنلب تُن دارونی ناقانونی روشده افغانستانگه آلیب کیریشینی تصدیقله‌یدی. اونینگ اَیتیشیچه، یۉل دوامیده پاکستان حربیلری و طالبان وکیللریگه معین مقدارده پول تۉله‌یدی همده اولرگه اولوش بېره‌دی. شوندن سۉنگ دارولرنی افغانستان بازارلریگه یېتکزه‌دی.
اوشبو دارو ساتووچیسی‌نینگ اَیتیشیچه، اونینگ کمپنیسیگه اۉخشه‌ش اۉنلب کمپنیلر پاکستان و افغانستان اۉرته‌سیده‌گی چېگره حدودلری همده تورلی ولایتلرده پاکستان دارولرینی ناقانونی روشده مملکتگه آلیب کیره‌دی و کېین داروخانه اېگه‌لریگه یېتکزیب بېره‌دی.
او شونده‌ی دېیدی: «هر ایکّی کونده کېچه‌سی پاکستان دارولریگه تۉله کتّه کانتینرنی سپین بولدک یۉلی آرقه‌لی افغانستانگه آلیب کیره‌میز».
پاکستان دارولرینی سپین‌بولدک یۉلی آرقه‌لی ناقانونی روشده افغانستان بازارلریگه، خصوصاً، مملکت جنوبیده‌گی حدودلرگه آلیب کیره‌دی‌‌گن باشقه بیر دارو تشیش کمپنیسی خادیمی‌نینگ اَیتیشیچه، بو دارولر هنوز اوّلگیدېک مملکتگه آلیب کیریلماقده. بیراق آخر-عاقبت اوشبو وضعیتدن عادی اهالی ضرر کۉرماقده.
اوشبو ساتووچی‌نینگ اَیتیشیچه، پاکستاندن افغانستانگه ناقانونی آلیب کیریله‌دیگن دارولر یۉل دوامیده صفتینی یۉقاته‌دی، اولر‌نینگ نرخی اېسه اوّلگیگه نسبتاً ۶۰ فایزگه آشگن.
اونینگ تأکیدلشیچه، افغانستان و پاکستان اۉرته‌سیده‌گی یۉللر آچیق بۉلگن پیتده، پاکستاندن سپین‌بولدک تومنیگچه بیر یوک مو‌تریده دارو-درمان تشیش خرجتی ۶۰ مینگدن ۸۰ مینگ پاکستان روپیه‌‌سیگچه بۉلگن. بیراق چېگره اۉتیش یۉللری رسماً یاپیلیب، ناقانونی تشیش یۉللری چېکلنگنیدن کېین پاکستاندن سپین‌بولدککچه بیر کانتینر دارو آلیب کېلیش خرجتی ۸۰۰ مینگ پاکستان روپیه‌‌سیگه یېتگن. اونینگ قۉشیمچه قیلیشیچه، بو خرجتلر‌نینگ برچه‌سی اۉشه یوکده‌گی دارولر نرخیگه قۉشیله‌دی.
اونینگ اَیتیشیچه، دارولر ناقانونی یۉللر آرقه‌لی آلیب کیریلگنی سببلی یۉل دوامیده اوزاق وقت قویاش آستیده قاله‌دی و صفتینی یۉقاته‌دی. شونینگدېک، ناقانونی تشیش خرجتلری هم اوشبو دارولر نرخی‌نینگ آشیشیگه سبب بۉله‌دی.
افغانستانده ایشلب چیقریلگن دارولر نرخی‌نینگ آشیشی و صفتی‌نینگ پسه‌ییشی
هلمند ولایتی مرکزی لشکرگاه‌ده‌گی دارو کمپنیلریدن بیری‌نینگ خادیمی حاضرده جوده کتّه مقدارده‌گی دارولر هلمندده‌گی بهرامچه و قندهارده‌گی سپین‌بولدک یۉللری آرقه‌لی ناقانونی روشده افغانستانگه آلیب کیریله‌یاتگنینی اَیته‌دی. اونینگ تأکیدلشیچه، بو دارولر مملکت ولایتلری‌نینگ یریمیده‌گی بازارلرگه یېتکزیلماقده. او، شونینگدېک، دارولر نرخی بازارلرده اوّلگیگه نسبتاً کېسکین آشگنینی و آدملر چاره‌سیزلیکدن اولرنی جوده قیمت نرخلرده ساتیب آلیشگه مجبور بۉله‌یاتگنینی قۉشیمچه قیله‌دی.
اوشبو تدبیرکار شونده‌ی دېیدی: «افغانستانده ایشلب چیقریلگن دارولر‌نینگ صفتی انچه یامانلشدی، نرخی اېسه پاکستان دارولرینی که کبی آشدی. نتیجه‌ده آدملر افغانستانده ایشلب چیقریلگن دارولر اۉرنیگه پاکستان دارولرینی ساتیب آلیشگه مجبور بۉلماقده، چونکه پاکستان دارولری‌نینگ صفتی افغان دارولرینیکیدن یخشیراق، حال‌بوکه، حاضر ایکّله تورده‌گی دارولر‌نینگ نرخی دېیرلی بیر خیل بۉلیب قالگن. اَیتیشیم ممکنکی، حاضر پاکستان دارولری هلمند و قندهار ولایتلری چېگره‌لری آرقه‌لی ناقانونی روشده مملکتگه آلیب کیریلیب، افغانستان‌نینگ یرمیگچه یېتکزیلماقده. برچه یوقاری مرتبه‌لی منصبدارلر هم بو حقده خبردار».
طالبان‌نینگ یوقاری مرتبه‌لی منصبدارلری‌نینگ دارو قاچاق اېتیلیشیگه اره‌لشووی
شونینگدېک، هلمند ولایتیده‌گی بهرامچه یۉلی آرقه‌لی دارو یوکلرینی ناقانونی روشده افغانستانگه آلیب کیره‌دی‌‌گن هیداوچیلردن بیری پاکستان دارولرینی بیر نېچه مرته یوک مو‌ترلریده مملکتگه ناقانونی آلیب کیرگنینی اَیته‌دی. او اۉز کوزه‌توولریگه تیه‌نیب، پاکستاندن افغانستانگه قاچاق قیلینه‌دیگن تاورلرنی تشیش جریانیگه طالبان‌نینگ یوقاری مرتبه‌لی منصبدارلری اره‌لشیشینی تأکیدله‌یدی. اونینگ اَیتیشیچه، تورلی خیل تاورلرنی آلیب اۉتیش اوچون هر بیر یوک مو‌تریدن ۷۰۰ مینگدن ۸۰۰ مینگ پاکستان روپیه‌‌سیگچه پول آلینه‌دی.
اوشبو هیداوچی‌نینگ قۉشیمچه قیلیشیچه، کابلده‌گی طالبان‌نینگ یوقاری مرتبه‌لی منصبدارلری کۉپراق درآمد آلیش مقصدیده اۉزلریگه یقین حربی کوچلرنی چېگره حدودلریگه خدمتگه یوباریشگه و چېگره‌لرنی نظارت قیلیش وظیفه‌سینی اولرگه تاپشیریشگه اورینه‌دی. اونینگ اَیتیشیچه، بو کوچلرنی تعیینلش جریانیده محمد حسن آخوند و عبدالغنی برادر‌نینگ اداره‌لریده‌گی اَیریم شخصلر هم رۉل اۉینه‌یدی. اونینگ سۉزلریگه کۉره، طالبان‌نینگ عادی جنگچیلری چېگره‌لرده عادتده تېلفونلرگه اېگه اېمس و تېگیشلی خوفسیزلیک پُستی‌نینگ قوماندانی بویروغیگه بناءً قاچاقچیلردن آلینگن پوللرنی بې‌واسطه قبول قیله‌دی. او طالبان طلب قیلگن پولنی تۉله‌شدن باش تارتگن شخصلر حبسگه آلینیشینی، اولر‌نینگ مال-ملکی اېسه باجخانه‌گه یوباریلیشینی تأکیدله‌یدی.
افغانستان‌نینگ تورلی ولایتلری اهالیسی مملکت بازارلریده پاکستان دارولری نرخی‌نینگ آشیب باره‌یاتگنیدن بیر نېچه بار شکایت قیلگن.
ایکّی آی آلدین طالبان‌نینگ ساغلیقنی سقلش وزیری قندهار ولایتیده بۉلیب اۉتگن ییغیلیشده‌گی نطقی دوامیده دارولر پاکستان‌نینگ چېگره حدودلریدن افغانستانگه ناقانونی آلیب کیریلیشینی تن آلگن اېدی. او اۉشه ییغیلیشده پاکستاندن افغانستانگه دارو آلیب کېلیش قطعی تقیقلنگنینی و هېچ کیمگه بونده‌ی ایشگه رخصت بېریلمسلیگینی اَیتگن. شونگه قره‌مه‌ی، اَیریم شخصلر دارولرنی مملکتگه ناقانونی روشده آلیب کیره‌یاتگنینی هم تن آلگن.
پاکستان تاو‌رلرینی افغانستانگه قاچاق قیلیش فقط هلمند و قندهار ولایتلری بیلن چېکلنمه‌یدی. بو جریان زابل، پکتیکا، پکتیا، خوست و ننگرهار ولایتلری یۉللری آرقه‌لی هم دوام اېتماقده.
