گومبونزواندا: افغانستان دنیاده‌گی عیاللر حقوقلری بیلن باغلیق اېنگ آغیر انقراضگه یوز توتماقده
۸صبح، کابل: بیرلشگن ملتلر تشکیلاتی عیاللر بۉلیمی اجراییه باشقیرووچیسی‌نینگ اۉرین‌باسری نایارادزایی گومبونزواندا، افغانستان دنیاده‌گی عیاللر حقوقلری بیلن باغلیق اېنگ آغیر انقراضگه دوچ کېله‌یاتگنینی و قیزلر تعلیم آلیش حقوقیدن محروم اېتیله‌یاتگنینی آگاهلنتیردی.
او بو بیاناتلرنی دوشنبه کونی، ۴ عقرب، نیویارکده‌گی بیرلشگن ملتلر تشکیلاتی قرارگاهیده عیاللر، تینچلیک و خوفسیزلیک مسأله‌لریگه بغیشلنگن ییغیلیشده بیلدیرگن.
گومبونزواندا اوشبو ییغیلیشده اوروشدن جبر کۉرگن حدودلرده‌گی عیاللر احوالی، ماجرالر بیلن باغلیق جنسی زۉرآورلیکلر‌نینگ آرتیشی، عیاللر‌نینگ تینچلیک جریانلریده‌گی رۉلی و اولر‌نینگ مذاکره‌لرده اشتراک اېتیشی ضرورلیگی حقیده نطق سۉزله‌گن.
او قۉشیمچه قیلگن: «بوگونگی کونده دنیاده‌گی عیاللر حقوقلری بیلن باغلیق اېنگ آغیر انقراضگه دوچ کېله‌یاتگن افغانستانده قیزلر حیاتلرینی اۉزگرتیریشی ممکن بۉلگن تعلیمدن محروم اېتیلماقده».
بمت رسمیسی، شونینگدېک، اۉتگن ییلی قوراللی تۉقنه‌شوولرده ۳۷ مینگدن آرتیق تینچ اهالی وکیلی جان بېرگنینی، اولر‌نینگ تۉرتدن بیر قِسمینی عیاللر و قیزلر تشکیل اېتگنینی قۉشیمچه قیلگن.
گومبونزواندا عیاللر برچه تینچلیک مذاکره‌لریده قرار قبول قیلووچی شخصلر صفتیده اشتراک اېتیشی و عیاللر تشکیلاتلری اوچون مالیوی مبلغلر اجره‌تیلیشینی تأمینلشگه چقیرگن.
بو بیاناتلر طالبان افغانستانده حاکمیتنی اېگه‌لله‌گنیدن سۉنگ مملکت عیاللری و قیزلری تعلیم آلیش، عالی تعلیمده اۉقیش همده ایشلش باره‌سیده کېنگ کۉلملی چېکلاولرگه دوچ کېله‌یاتگن بیر پیتده ینگره‌دی.
اوشبو چېکلاولر عیاللر‌نینگ اجتماعی حیات و جماعت میدانلریده‌گی اشتراکینی هم کمه‌یتیردی.
