«پول بېر یاکه اۉلیمنی کوت»؛ بشر نورزی جیینی‌نینگ تاولمچیلیگی حقیده‌گی لرزه‌گه سالووچی حکایه‌لر
نیما
۸صبح گزېته‌سی افغانستانده مخدره مادّه‌لر سوداسی‌نینگ آته‌سی صفتیده تنیلگن حاجی بشر نورزی‌نینگ یقینلریدن بیری سرمایه‌دارلر و سوداگرلردن تاولمچیلیک همده پول اوندیریش بیلن شغللنه‌یاتگنینی کۉرسه‌تووچی معلوماتلرگه اېگه بۉلدی. منبعلر‌نینگ دعوا قیلیشیچه، او حتا سوداگرلر‌نینگ عایله اعضالرینی اۉغیرلشده هم اشتراک اېته‌دی و بیر حالتده کابلده‌گی بیر کیشیدن یقینلرینی آزاد قیلیش عوضیگه کتّه مقدارده پول آلگن. اَیریم سوداگرلر‌نینگ اَیتیشیچه، او اولر‌نینگ سودا-ساتیغی و شخصی سرمایه‌لریدن اولوش طلب قیله‌دی همده پول آله‌دی. منبعلرگه کۉره، پول تۉله‌شدن باش تارتگن هر قنده‌ی کیشی اۉلیم تهدیدیگه دوچ کېله‌دی. ۸صبح گزېته‌سی صحبتلشگن منبعلر طالبان‌نینگ کابلده‌گی خوفسیزلیک قوماندانلیگی و اوشبو گروه استخباراتی بو شخص‌نینگ فعالیتیگه تۉسقینلیک قیلیشگه عاجز اېکنلیکلرینی تن آلیب، «اۉزینگیز کېلیشیب آلینگ، چونکه او حاجی بشر نورزی‌نینگ جیینی دیر»، دېب اَیتگنلرینی تصدیقله‌یدی.
اوشبو حسابات نتیجه‌لری بو شخص اۉزینی «سفیر الماس» دېب تنیشتیریشی و الماس نورزی نامی بیلن تنیلگنینی کۉرسه‌ته‌دی. اونینگ انستاگرام‌ده هم شو نامده‌گی صحیفه‌سی بار. او اوشبو صحیفه‌ده موترلر کاروانی، بزملری و قوراللری عکس اېتگن ویدیولر همده حکایه‌لرنی اعلان قیله‌دی. اوشبو ویدیولر‌نینگ اَیریملریده فارسی و پشتو تیللریده‌گی شۉخ موسیقه‌لر اېشیتیله‌دی. او حاجی بشر نورزی‌نینگ صورتینی هم شو موسیقه‌لر بیلن بیرگه اۉز حکایه‌لریده اعلان قیله‌دی. حال‌بوکه، طالبان موسیقه تینگلشنی حرام دېب اعلان قیلگن.
ایشانچلی منبعلردن بیری سفیر الماس افغانستان‌نینگ پابلو اسکوباری نامی بیلن تنیلگن حاجی بشر نورزی‌نینگ اوکه‌سی حاجی حاکم‌نینگ اۉغلی اېکنینی اَیته‌دی. منبعلرگه کۉره، حاجی حاکم وفات اېتگنیدن کېین بو اۉغیل‌نینگ وصیلیگی حاجی بشر نورزی‌گه تاپشیریلگن اېدی. اوشبو منبع‌نینگ اَیتیشیچه، حاجی بشر امریکا تامانیدن حبسگه آلینگنیدن سۉنگ اونینگ کتّه اۉغلی سفیر الماسگه وصیلیک قیلیشنی اۉز ذمّه‌سیگه آلگن
منبعلر‌نینگ اَیتیشیچه، سفیر الماس اۉنلب قۉریقچیلر و بیر نېچه ته آینه‌لری قاره‌یتیریلگن زره‌لی موترلر بیلن سوداگرلر و سرمایه‌دارلرگه قۉنغیراق قیله‌دی، شخصا اولر‌نینگ آلدیگه باریب، اولردن اولوش طلب قیله‌دی. منبعلرگه کۉره، او سوداگرلرگه طلب قیلگن پولینی تۉله‌شلری اوچون مدت بېلگیله‌یدی، عکس حالده اولر اۉز اۉلیملرینی کوتیشلری کېره‌کلیگینی اَیته‌دی.
اوشبو سرمایه‌دارلر طالبان‌نینگ خوفسیزلیک اداره‌لریگه، جمله‌دن، گروه‌نینگ کابلده‌گی خوفسیزلیک قوماندانلیگی و طالبان استخباراتیگه مراجعت قیلگنلرینی تصدیقله‌یدی. بیراق اولرگه هېچ نرسه قیله آلمسلیکلری اَیتیلگن.
منبعلر‌نینگ اَیتیشیچه، او سرمایه‌دارلرگه بې‌واسطه فلان لایحه‌ده اولوشی بارلیگی و شریک اېکنینی اَیته‌دی. اما اوندن اۉز اولوشی اوچون مبلغ تۉله‌ش سۉره‌لگنیده، او شونده‌ی تهدید قیله‌دی: «اگر یششنی ایسته‌سنگ، مېندن اولوش طلب قیلمه، فقط پول بېر».
اَیریم سوداگرلر‌نینگ اَیتیشیچه، اولر طالبان‌نینگ خوفسیزلیک اداره‌لریگه مراجعت قیلگنلریده، اوشبو اداره‌لر اولر‌نینگ کېلگنی و مراجعت قیلگنلری حقیده سفیر الماسگه خبر بېره‌دی. اولر‌نینگ سۉزلریگه کۉره، شوندن کېین سفیر الماس ینه اولرگه تهدید قیلیب، شکایتلرینی دوام اېتتیرمسلیکلری کېره‌کلیگینی اَیته‌دی.
سوداگرلردن بیری شونده‌ی دېیدی: «او هر سفر کېلگنیده، یانیده ۴۰–۴۵ نفر قوراللنگن کیشی و بیر نېچه ته موتر بۉله‌دی. خدا حققی، قۉرقوودن قۉل-آیاغیمیز تیتره‌یدی. او فقط مېندن اېمس، همه‌دن پول اوندیره‌دی. حتا هېچ کیم اوندن شکایت قیلیشگه جرأت اېتالمه‌یدی، چونکه همه جایده اونینگ اوچون معلومات یېتکزیب توریشه‌دی».
قندهارده‌گی بیر منبع سفیر الماس حقیده شونده‌ی دېیدی: «او جوده بې‌باش و بېزاری آدم. او بشر نورزی‌نینگ جیینی دیر، اونینگ عمکی‌بچه‌سی هم یۉل‌تۉسر. اولر قیزلر و ییگیتلرنی هم جنسی علاقه‌گه مجبورلشه‌دی».
اوشبو منبع قۉشیمچه قیله‌دی: «بو یاشلر وقتلری‌نینگ کۉپ قِسمینی نیمروزده بزم و کۉنگیل‌آچر مشغولاتلر بیلن اۉتکزیشه‌دی. بشر نورزی اولر اوچون اۉق اۉتمه‌یدیگن موترلر ساتیب آلگن. بشر نورزی اوزاق حدودلرگه سفر قیلگنیده، بو یاشلر هم اۉشه کاروانده اونگه همراهلیک قیلیشه‌دی. قالگن وقتلرینی اېسه یۉل‌تۉسرلیک بیلن اۉتکزیشه‌دی».
باشقه بیر منبع شونده‌ی دېیدی: «بو یاشلر بیلن باغلیق شکایتلر بشر نورزی‌گه هم یېتیب بارگن. نورزی بیر نېچه بار اولر‌نینگ قوراللرینی آلیب قۉیگن، بیراق کېین ینه اۉزلریگه قَیتریب بېرگن. بو شخصلر طالبان رژیمی دایره‌سیده باشقه فعالیتلر بیلن هم شغللنه‌دی. طالبان استخباراتی یاکه اوشبو گروه‌نینگ کابلده‌گی قوماندانلیگی تورلی عیبلاولر بیلن آدملرنی حبسگه آلگنیده، بو شخصلر حبسگه آلینگنلر‌نینگ عایله‌لری اویلریگه باریب، معلوم مقدارده پول تۉله‌ش عوضیگه عایله اعضالرینی طالبان قماغیدن آزاد قیلیشلرینی اَیتیشه‌دی. اولر دولت اداره‌لری‌نینگ اَیریم خادملرینی هم پاره آلیشگه مجبور قیلیشگن».
منبع شونده‌ی دېیدی: «ملا هبت‌الله گروهی بو شخصلرنی کېنگ کۉلمده قۉللب-قوّتله‌یدی. اولر طالبان ایچکی ایشلر وزیرلیگی تامانیدن بیر نېچه بار حبسگه آلینیب، قماققه تشلنگن، بیراق بشر نورزی هر سفر اولرنی آزاد قیلگن».
شو بیلن بیرگه، اوشبو حسابات نتیجه‌لری حاجی بشر نورزی‌گه علاقه‌دار اوشبو مافیا تۉده‌سی هلمند و قندهار ولایتلریده یاقیلغی نرخی‌نینگ آشیشیده هم اشتراک اېته‌یاتگنینی کۉرسه‌ته‌دی. منبعلرگه کۉره، بو باره‌ده هېچ کیم شکایت قیله آلمه‌یدی، چونکه یاقیلغی سوداسی‌نینگ برچه جریانلرینی حاجی بشر نورزی اۉز نظارتیگه آلگن.
بیر حالتده هلمند اهالیسیدن بیری یاقیلغی نرخی‌نینگ آشیشیدن شکایت قیلگن، بیراق اونی فیسبوکده‌گی ناراضیلیک پُستینی اۉچیریشگه و اَیتگن گپلری اوچون عذر سۉره‌شگه مجبور قیلیشگن.
منبعلر‌نینگ اَیتیشیچه، الماس نورزی افغانستانده، اینیقسه، مملکت‌نینگ جَنوبی حدودلریده ییریک مافیا گروهینی باشقره‌دی. اوشبو گروه ایران و پاکستانگه تریاک همده کوکایین قاچاق اېتیش بیلن شغللنه‌دی.
حسابات نتیجه‌لری شونی کۉرسه‌ته‌دیکی، ۲۳ میزان کونی هلمند ولایتی‌نینگ بهرامچه تومنیده بیر یوک تریاک اوستیدن طالبان جنگریلری اۉرته‌سیده تۉقنه‌شوو یوز بېرگن. نتیجه‌ده ۱۱ کیشی جان بېرگن و ینه تۉرت کیشی یره‌لنگن. اوشبو تریاک یوکی حاجی بشر نورزی‌گه تېگیشلی بۉلیب، اونی باشقریش سفیر الماس ذمّه‌سیده بۉلگن.
منبعلرگه کۉره، طالبان جنگریلری اوشبو تریاک یوکینی تۉخته‌تگنیدن کېین سفیر الماس حاجی بشر نورزی بیلن باغلنگن. حاجی بشر نورزی اېسه حاجی عبدالاحد طالبگه بو یوک اۉزیگه تېگیشلی اېکنینی اَیتگن. بیراق طالبان جنگریلری عبدالاحد‌نینگ بویروغیگه بۉیسونمه‌گن و اولر اۉرته‌سیده تۉقنه‌شوو یوز بېرگن.
۸صبح گزېته‌سی اوشبو شخص‌نینگ انستاگرام صحیفه‌سیده اعلان قیلگن ویدیولرینی هم اۉرگنگن. بو ویدیولرده اونینگ بیر نېچه ته موتری و قۉریقچیلری بارلیگی، شونینگدېک، نیمروز‌نینگ قوملی صحرالریده یۉل حرکتی قاعده‌لریگه رعایه قیلمسدن موتر باشقریشی عکس اېتگن. او قورال بیلن هم صورتگه توشه‌دی و اوشبو تصویرلرنی اجتماعی ترماقلرده اعلان قیله‌دی.
اونینگ انستاگرام حکایه‌لریده اعلان قیلینگن ویدیولر بیر نېچه موتردن عبارت کاروان بیلن نیمروز‌نینگ قوملی صحرالریده ایلنیب یورگنینی و او یېرده یۉل حرکتی قاعده‌لریگه رعایه قیلمسدن موتر هَیده‌شینی کۉرسه‌ته‌دی. شو بیلن بیرگه، او حکایه‌سیده حاجی بشر‌نینگ صورتینی هم اعلان قیلیب، «گران مشر حاجی صاحب بشر اکه» دېب یازگن. شونینگدېک، او اۉزی و طالبان کییمینی کیگن قۉریقچیلری عکس اېتگن ویدیونی اعلان قیلیب، اونینگ اوستیگه پشتو تیلیده‌گی قۉشیقنی جایلشتیرگن.
۸صبح گزېته‌سی ۱۳۹۴-ییلده «ییریک مخدره مادّه‌لر قاچاق‌چیلری ناملری‌نینگ فاش اېتیلیشی» سرلوحه‌سی آستیده سوریشتیروو حساباتینی اعلان قیلگن اېدی. اوشبو حساباتده حاجی بشر نورزی انه شونده‌ی شخصلردن بیری صفتیده قید اېتیلگن. ۸صبح گزېته‌سی اۉشه پیتده حجتلرگه اساسلنیب، اوشبو طالبان عملداری‌نینگ نامی منطقه و دنیاده‌گی اېنگ ییریک مخدره مادّه‌لر قاچاق‌چیلری رۉیخطیده بۉلگنینی انیقله‌گن اېدی. اَیریم امریکا عامه‌وی اخبارات واسطه‌لریده بشر نورزی دېب یازیلگن حاجی بشر نورزی طالبان گروهی‌نینگ اساسچیلریدن بیری هم حسابلنه‌دی.
«یقین شرق‌نینگ پابلو اسکوباری» نامی بیلن تنیلگن حاجی بشر نورزی طالبان‌نینگ بیرینچی رژیمی‌نینگ مالیوی حامیلریدن بیری بۉلگن. او طالبان گروهی‌نینگ شکللنیشی و تشکیل اېتیلیشی همده اوشبو گروه جنگریلرینی تۉپلشده مهم رۉل اۉینه‌گن شخصلردن بیری حسابلنه‌دی.
بوندن اوّل فارن پالیسی نشری ییریک مخدره مادّه‌لر قاچاق‌چیلریدن بیری بۉلگن بشر نورزی گوانتانامو قماقخانه‌سیدن آزاد اېتیلگنیدن سۉنگ هبت‌الله آخوندزاده‌‌نینگ یاردمیده چین بیلن سودا فعالیتینی باشله‌گنی حقیده خبر بېرگن اېدی. نشر نورزی کانچیلیک و نفت-کیمیا ساحه‌لریده کمیده ایکّیته مهم شرطنامه‌نی قۉلگه کیریتگنینی یازگن. نشر‌نینگ تأکیدلشیچه، بو شرطنامه‌لر افغانستان فقرالریگه هېچ قنده‌ی فایده کېلتیرمه‌یدی.
فارن پالیسی بشر نورزینی «مخدره مادّه‌لر سلطانی» دېب اته‌گن. اوشبو حساباتگه کۉره، «نورزی‌نینگ هروئین امپراتورلیگی» طالبان‌نینگ افغانستانده‌گی اوزاق دوام اېتگن اوروشینی مالیه‌لشتیریشده مهم رۉل اۉینه‌گن.
تأکیدلش جایز که نورزی ۲۰۲۲-ییل سپتمبر آییده بایدن حکومتی تامانیدن طالبان اسیرلیگیده بۉلگن امریکا دېنگیز کوچلری اعضاسی مارک فریکس آزاد قیلیش عوضیگه توزیلگن کېلیشوو دایره‌سیده آزاد اېتیلگن. حاضرده او بد‌خشان و تخار ولایتلریده آلتین قزیب آلیش فعالیتی بیلن کېنگ کۉلمده شغللنه‌دی همده اۉنلب کمپنیلرگه رهبرلیک قیله‌دی.
