ایتالیالیک یاردم خادیمی: طالبان‌نینگ قیزلری هم یشیرین مکتبده تعلیم آلگن
۸صبح، کابل: ایتالیالیک یاردم خادیمی سوزانا فیورتی طالبان حاکمیت تېپه‌سیگه کېلگنیدن سۉنگ افغانستانده یشیرین مکتب تشکیل اېتگنینی، اونده طالبان اعضالری‌نینگ اَیریم قیزلری هم تحصیل آلگنینی اَیتدی.
او دوشنبه کونی، ۴ عقرب اعلان قیلینگن ایتالیا‌نینگ «کورییره دلا سرا» گزېته‌سیگه بېرگن صحبتیده عیاللر تعلیمی و تحصیل آلیشیگه تقیق قۉییلگنیدن سۉنگ افغانستانده یشیرین مکتب تشکیل اېتیشگه قرار قیلگنینی اَیتگن.
فیورتی‌نینگ قۉشیمچه قیلیشیچه، اوشبو مکتب فعالیتی باشلنگنیدن ایکّی ییل اۉتیب، اۉقووچیلر‌نینگ اَیریملری طالبان اعضالری‌نینگ قیزلری اېکنینی انگله‌گن.
اونینگ اَیتیشیچه، دستلبکی ایکّی ییل دوامیده طالبان کوچلریدن هېچ بیری تېکشیروو اۉتکزیش اوچون بو جایگه کېلمه‌گن.
فیورتی تأکیدلشیچه، درسلر تیکوو ماشینلری اۉرنه‌تیلگن خانه‌ده اۉتکزیلگن. بو آرقه‌لی تېکشیروو بۉلگن تقدیرده، تعلیم فعالیتینی تیکووچیلیک اوستاخانه‌سی صفتیده کۉرسه‌تیش ممکن اېدی.
اونینگ قۉشیمچه قیلیشیچه، طالبان‌نینگ اَیریم اعضالری عایله‌لری هم قیزلری‌نینگ تعلیمنی دوام اېتتیریشینی ایسته‌گن.
فیورتی تأکیدله‌گن: «افغانلر آره‌سیده حکومت بیلن علاقه‌سی بۉلگن، بیراق معتدلراق قره‌شلرگه اېگه و ناتۉغری دېب حسابله‌گن تقیقلرنی یشیرین روشده اۉزگرتیریشنی ایسته‌یدیگن کیشیلر هم بار».
اونینگ قۉشیمچه قیلیشیچه، بو قیزلرگه یشیرین روشده تعلیم بېریش خوفلی بۉلگن. اگر بو فعالیت فاش اېتیلگنیده، اۉقووچیلر و مکتب تشکیلاتچیلری جدّی عاقبتلرگه دوچ کېلیشلری ممکن اېدی.
«نووه کرینگ هیومنز (Nove Caring Humans)» تشکیلاتی اساسچیسی بۉلگن فیورتی، شونینگدېک، اوشبو تشکیلات طالبان بیلن ملاقات آرقه‌لی تدبیرکار عیاللرنی قۉللب-قوّتلشگه قره‌تیلگن دستورلرنی یۉلگه قۉیگنینی اَیتگن.
اوشبو دستورلردن بیری عیاللرگه نان پیشیریش و محاسبه حسابینی یوریتیشنی اۉرگه‌تیشدن عبارت بۉلیب، بو آرقه‌لی اولر درآمد تاپیشلری ممکن.
