باله‌لر‌نینگ بې‌درَک یۉقالیشیدن خواطرلر آرتیشی؛ اهالی طالباننی خوفسیزلیکنی تامینلشده موفقیتسیز دېب بیله‌دی
۸صبح، غزنی
مملکت‌نینگ اَیریم وطنداشلری تورلی ولایتلرده بې‌درک یۉقاله‌یاتگن باله‌لر سانی‌نینگ آرتیب باره‌یاتگنیدن خواطر بیلدیرماقده. بو اهالی ۸صبح گزېته‌سیگه بېرگن صحبتلریده اۉز ولایتلریده باله‌لر‌نینگ اۉغیرلنیشی حالتلری مثلی کۉریلمه‌گن درجه‌ده کۉپه‌یگنینی معلوم قیلیب، طالبان تامانیدن خوفسیزلیک تأمینلنه‌یاتگنی حقیده‌گی دعوالرنی بو گروه‌نینگ ترغیباتی دېب حسابلشلرینی اَیتیشگن.
۸صبح گزېته‌سی تاپیلمه‌لریگه کۉره، سۉنگگی بیر هفته دوامیده کابل، ننگرهار، لوگر، پکتیا و غزنی ولایتلریده کمیده ۱۳ باله بې‌درک یۉقالگن. بو باله‌لر‌نینگ یاشی ۶ دن ۱۴ یاشگچه بۉلگن. باله‌لر‌نینگ عایله‌لری طالباننی واقعه‌دن خبردار قیلگن بۉلسه-ده، بو گروه حاضرگچه بې‌درَک یۉقالگن باله‌لرنی تاپیب، قَیتریشگه موفق بۉلمه‌گن.
سۉنگگی کونلرده تورلی شهرلرده بې‌درَک یۉقالگن بیر نېچه باله‌‌نینگ عایله اعضالری و یقینلری ۸صبح گزېته‌سیگه بېرگن صحبتلریده بو واقعه‌لر حقیده اچّیق حکایه‌لرنی سۉزلب بېریشگن.
سردار (مستعار)، بیر هفته‌دن بېری کابل شهری‌نینگ تۉقّیزینچی خوفسیزلیک حدودیگه قره‌شلی جایلردن بې‌درَک یۉقالگن ۱۱ یاشلی باله‌‌نینگ یقینلریدن بیریدیر. او شونده‌ی دېیدی: «یېتّی یاکه سکّیز کوندن بېری سرسان حالتده‌میز. اۉنلب اداره‌لرگه مراجعت قیلدیک، عریضه بېردیک، اونینگ صورتلرینی چاپ اېتدیک و فیسبوک همده مسجدلرده اعلان بېردیک، اما اوندن هېچ قنده‌ی درَک و معلوماتگه اېگه اېمسمیز. اونی کیم آلیب کېتگنینی، قه‌یېردن آلیب کېتگنینی و بیرار جایده اونگه بیرار حادثه یوز بېرگن یاکه بېرمه‌گنینی بیلمه‌یمیز. آخر-عاقبت، هېچ قنده‌ی ایز تاپیلمه‌دی.»
سردار قۉشیمچه قیله‌دی: «بو حالت جوده آغیر. حاضر اونینگ آنه‌سی شفاخانه‌ده یاتیبدی. شفاکارلر کوچلی تشویش طفیلی مییه سکته‌سینی باشدن کېچیرگنینی و کوما حالتیده اېکنینی اَیتیشگن.»
محمد عوض، غزنی شهری اهالیسیدن بیری و اوچ کون آلدین غزنی شهری‌نینگ ایکّینچی خوفسیزلیک حدودیگه قره‌شلی جایلردن بې‌درَک یۉقالگن سکّیز یاشلی باله‌‌نینگ قرینداشی دیر. او شونده‌ی دېیدی: «بو باله اېرته‌لب مکتب تامان کېته‌یاتگن اېدی و آدملر‌نینگ اَیتیشیچه، بیر مو‌ترده بۉلگن اوچ کیشی اونی اۉزلری بیلن آلیب کېتگن. بیز بیر نېچه بار حدودگه مراجعت قیلدیک، اما حاضرگچه اونینگ حالتی و تقدیری حقیده بیزگه هېچ نرسه اَیتیشمه‌دی.»
شو بیلن بیرگه، باله‌لری‌نینگ بې‌درک یۉقالگنی حقیده‌گی اعلانلرنی اجتماعی ترماقلرده اعلان قیلگن اهالی سانی هم فیسبوکده کۉپه‌یگن.
کابل‌نینگ غربیده جایلشگن امید سبز شهرچه‌سی اهالیسیدن بیری، اسمی اوشبو گزارشده تیلگه آلینیشینی ایسته‌مه‌گن شخص، غربی کابلده باله‌نی اۉغیرلشگه اورینیش‌نینگ موفقیتسیز توگه‌گن بیر حالتیگه گواه بۉلگنینی شونده‌ی حکایه قیله‌دی: «اېرته‌لب سپورت قیلیش اوچون تېپه‌لیک تامان کېتگن اېدیک. قَیتیشده مکتب کییمیده‌گی بیر قیزه‌لاق یاش بیر اېرکک‌نینگ قوچاغیده اېکنینی و قتّیق ییغلب، فریاد قیله‌یاتگنینی کۉردیک. بیز اوچ کیشی اېدیک، اوزاقدن کۉریب، شبهه‌لندیک. «نیمه بۉلیپتی؟» دېب بقیرگنیمیزده، او اېرکک قیزه‌لاقنی قۉییب یوباردی و قاچیب کېتدی.»
شو بیلن بیرگه، لوگر، ننگرهار و پکتیکا ولایتلریده‌گی ایشانچلی منبعلر ۸صبح گزېته‌سیگه تصدیقلشیچه، اولر هر کونی اوشبو ولایتلر‌نینگ تورلی حدودلریدن بې‌درَک یۉقالگن باله‌لر حقیده اجتماعی ترماقلرده بیر یاکه ایکّی حالت تۉغریسیده‌گی اعلانلرنی کۉریشه‌دی.
بو حالت مملکت‌نینگ اکثریت ولایتلریده سۉنگگی کونلرده جنایتلر سانی آرتگن بیر پیتده یوز بېرماقده و اهالی خوفسیزلیکنی تأمینلشده طالباننی موفقیتسیز دېب حسابله‌ماقده.
