انسان حقوقلری کوزه‌تووچیسی: افغان عیاللری فوتبالگه قیتدی و انسان حقوقلرینی یوتدی
۸صبح، کابل: انسان حقوقلری کوزه‌تووچیسی افغانستان عیاللر ملی فوتبال جماعه‌سی نینگ مراکشده بیرینچی بار میدانگه قیتیشینی «انسان حقوقلری اوچون غلبه قیلگنینی» اعلان قیلدی.
انسان حقوقلری کوزه‌تووچیسی، ۱۰- عقرب، شنبه کونی اعلان قیلگن بیاناتیده ایتدیکی، افغان عیال فوتبالچیلر طالبان نینگ تعقیقلری، تهدیدلری و چېکلاولریگه قره‌مه‌ی، اۉز جماعه‌سینی قیته تیکلب، میدانگه قیتیشگه موفق بۉلیشدی.
بیاناتده تأکیدلنیشیچه، اولر نینگ قیتیشی، عیاللر سپورتیگه طالبان تامانیدن قۉییلگن تۉلیق تعقیقدن کېین، قرشیلیک و مستحکم توریش بېلگیسی صفتیده قبول قیلینه‌دی.
انسان حقوقلری کوزه‌تووچیسی و «سپورت و حقوقلر» اتفاقی ایتیشیچه، فیفا افغان عیاللر جماعه‌سینی رسمی تنیمه‌گنیده، طالبان نینگ باسیملی سیاستی افغانستاندن تشقریده هم دوام اېتیشیگه یۉل آچگن.
باشقه بیاناتلرده ایتیلیشیچه، فوتبالچیلر تۉرت ییل دوامیده قطعی کوره‌شگنیدن سۉنگ، فیفا نهایت اولرگه مسابقه‌لرده قتنه‌شیشگه رخصت بېرگن.
انسان حقوقلری کوزه‌تووچیسی فیفادن افغان عیاللر جماعه‌سینی رسمی روشده افغانستان ملی جماعه‌سی صفتیده تن آلیشنی و افغان عیال سپورتچیلری یانیده توریشنی سۉره‌گن.
تشکیلات نینگ فکریچه، افغان عیاللری نینگ فوتبال میدانیگه قیتیشی، کېله‌جک اولاد عیاللر و قیزلر اوچون ینگی امید بۉلیب، اولر نینگ حقوقلرینی نه‌فقط سپورتده، بلکه حیات نینگ برچه ساحه‌لریده حمایه قیلیش امکانینی بېره‌دی.
ایتیش کیره‌ک، افغانستان عیاللر ملی جماعه‌سی اعضالری ۲۰۲۱-ییل اگستده طالبان حاکمیتگه کېلیشیدن کېین مملکتنی ترک اېتیب، تورلی دولتلرده قاچقین صفتیده ینگی حیات باشلشگه مجبور بۉلیشگن.
حاضر «بیرلشگن افغان عیاللری» نامی بیلن فعالیت یوریته‌یاتگن جماعه، تۉرت ییل دوامیده بیرینچی بار مراکشده اۉیین اۉتکزدی.
