پولندده «افغانستان: کول آرهسیدهگی الماس» دستوری افغانستان حقیده ینهده کېنگراق تصور ترقهتیش مقصدیده اۉتکزیلدی
۸صبح، پولند: «افغانستان: کول آرهسیدهگی الماس» ناملی دستور پولندنینگ کراکف شهری مدنیت انستیتوتی و کتابخانهسی مېزبانلیگیده افغانستان حقیده ینهده کېنگراق تصور ترقهتیش مقصدیده اۉتکزیلدی.
اوشبو دستور، جمعه کونی، ۱۲ جون، بیر قطار بیلیم یورتی استادلری، تدقیقاتچیلر، اجتماعی فعاللر و پولندلیک یازووچیلری اشتراکیده بۉلیب اۉتدی.
خبرگه کۉره، تدبیرده افغانستان خلقارا عامهوی اخبارات واسطهلریده اساسا اوروش، انقراض و خوفسیزلیک معمالری نقطهٔ نظریدن یاریتیلیشی تأکیدلنگن. حالبوکه، بوندهی تصویر اوشبو مملکت نینگ بای تاریخی، کېنگ اېتنیک و مدنی خیلمه-خیللیگی همده خلقی نینگ مرکّب حیاتی حقیقتلرینی تۉلیق افادهلهی آلمهیدی.
مذکور دستورده افغانستان تاریخی، اجتماعی، مدنی و زمانهوی جهتلردن تینگلاوچیلرگه تنیشتیریلیشگه حرکت قیلینگن.
یاگیلونیا بیلیم یورتی دوکتورا باسقیچی طلبهسی بسمالله تابان، کۉپ حاللرده افغانستان اساسا اوروشگه عاید خبرلر آرقهلی بهالنیشینی ایتگن. اونینگ تأکیدلشیچه، بو مملکت جمعیتی حقیدهگی بیر تمانلمه تصورلرنینگ شکللنیشیگه و حتا اَیریم کیشیلرنینگ افغان مهاجرلریگه بۉلگن مناسبتیگه هم تأثیر کۉرسهتگن.
او دینی ترورچیلیک معماسیگه هم تۉختهلیب، افغانستان خلقینینگ کتّه قِسمی عیناً شو حادثه نینگ قربانی بۉلگنینی و افغانستان جمعیتینی طالبان کبی رادیکال گروهلرنینگ خطی-حرکتلری بیلن چېکلب بۉلمسلیگینی تأکیدلهگن.
تابان، افغانستاننینگ حاضرگی حالتینی خوفسیزلیک، اجتماعی و انسان حقوقلری نقطهٔ نظریدن محاکمه قیلیب، طالباننی مملکتدهگی موجود وضعیتنینگ اساسی عامللریدن بیری دېب بهالهگن.
او تدبیر اشتراکچیلریدن سیاستچیلر و رسمیلر بیلن موجود اجتماعی علاقهلریدن فایدهلنیب، افغانستان خلقی احوالیگه اعتبار قرهتیش ضرورلیگینی تأکیدلشنی و رېپرېسسیو خطی-حرکتلر نینگ عادتی حالگه ایلنیشیگه یۉل قۉیمسلیکنی سۉرهگن.
تدبیر دوامیده طالباننینگ عیاللرگه نسبتاً مناسبتی عکس اېتگن ویدیولر، جملهدن هراتدهگی سۉنگگی حالتلر هم نمایش اېتیلگن.
مذکور دستورده افغانستانلیک اکادمیک فعاللردن بیری محمود شمسی، افغانستاننینگ مدنی خیلمه-خیللیگیگه تۉختهلیب، «اولاق» عنعنوی سپورت توری حقیده مملکت نینگ مدنی و اجتماعی رمزلریدن بیری صفتیده معلومات بېرگن همده اونی اَیریم افغانستان جمعیتلری نینگ مدنی و اجتماعی اۉزلیگی نینگ بیر قسمی دېب اتهگن.
شونینگدېک، افغانستان مسألهلری بۉییچه تدقیقاتچی و بیلیم یورتی استادی دوکتور مایتوش گواگیش، هم مملکت نینگ سیاسی و اجتماعی وضعیتی حقیدهگی قرهشلری و تحلیللرینی اشتراکچیلر بیلن اۉرتاقلشگن.
تدبیر تشکیلاتچیلری نینگ ایتیشیچه، اوشبو انجمن نینگ اساسی مقصدی جماعتچیلیک خبردارلیگینی آشیریش، مدنیتلررا ملاقاتنی کوچهیتیریش و بای تاریخگه، کېنگ مدنی همده اېتنیک خیلمه-خیللیککه اېگه بۉلگن، شو بیلن بیرگه مرکّب معمالر و کتّه انسانی صلاحیتنی اۉزیده مجسم اېتگن افغانستان حقیده ینهده موازنتلی و کۉپ قیرّهلی تصویرنی تقدیم اېتیشدن عبارت بۉلگن.
اۉنلب ییللر دوام اېتگن اوروش و خوفسیزلیک معمالری افغانستان حقیده قشّاقلیک، ویرانهگرچیلیک، مهاجرت و زۉرآورلیک بیلن باغلیق تصویرنی شکللنتیرگن همده بو مملکتنی اوزاق ییللر دوامیده دنیا عامهوی اخبارات واسطهلری خبرلری نینگ باش موضوعلریدن بیریگه ایلنتیرگن.
