کمبغللیککه برهم بېریش خلق‌ارا کونی؛ میلیونلب افغانستانلیکلر قشّاقلیک و آزیق-طعام خوفسیزلیگی معماسیگه دوچ کېلماقده
۸صبح، کابل: ۱۷-اکتوبر خلق‌ارا کمبغللیککه برهم بېریش کونی.
اوشبو کون میلیونلب افغانستان وطنداشلری قشّاقلیک، ایشسیزلیک و آزیق-طعام خوفسیزلیگی معماسیگه دوچ کېله‌یاتگن بیر پیتده نشانلنماقده.
ایشسیزلیک، آزیق-طعام محصولاتلری نرخی‌نینگ آشیشی، عیاللر‌نینگ محنت فعالیتیگه قۉییلگن چېکلاولر، اقلیم اۉزگریشی، چېگره‌لر‌نینگ یاپیلیشی و خلق‌ارا یاردم‌نینگ قیسقریشی افغانستانده قشّاقلیکنی کوچه‌یتیره‌یاتگن اساسی عامللردن حسابلنه‌دی.
ایران و پاکستاندن مهاجرلر‌نینگ عامه‌وی روشده قَیتیشی هم اوّلدن امکانیتلر و تیریکچیلیک واسطه‌لری تنقیصلیگیگه دوچ کېلگن جماعه‌لرگه قۉشیمچه باسیم اۉتکزماقده.
بیرلشگن ملتلر تشکیلاتی حساباتیگه کۉره، جاری ییلده ۱،۲ میلیوندن آرتیق افغانستان وطنداشی اوشبو ایکّی مملکتدن افغانستانگه قَیتگن.
جهان آزیق-طعام دستوری و بیرلشگن ملتلر تشکیلاتی‌نینگ آزیق-طعام و اېکینچیلیک تشکیلاتی (فایو) هم کېچه اعلان قیلگن حساباتیده کېله‌یاتگن قیشده افغانستان اهالیسی‌نینگ ۳۸ فایزیگه تېنگ بۉلگن ۱۹،۲ میلیون کیشی اۉتکیر آزیق-طعام خوفسیزلیگی معماسیگه دوچ کېلیشی حقیده آگاهلنتیردی.
عینی پیتده، بیرلشگن ملتلر تشکیلاتی خلق‌ارا کمبغللیککه برهم بېریش کونی مناسبتی بیلن بوتون دنیا بۉیلب ۲،۸ میلیارددن آرتیق کیشی اوی-جای تنقیصلیگی یاکه یشش شرایطلری‌نینگ طلبگه جواب بېرمسلیگی معماسیگه دوچ کېله‌یاتگنینی معلوم قیلدی.
اوشبو تشکیلات‌نینگ تأکیدلشیچه، کمبغل و اجتماعی حمایه‌دن محروم انسانلر مناسب اوی-جای یۉقلیگیدن باشقه‌لرگه قره‌گنده کۉپراق اذیت چېکه‌دی.
خلق‌ارا کمبغللیککه برهم بېریش کونی ۱۹۹۲-ییلده بیرلشگن ملتلر تشکیلاتی باش مجمع‌سی تامانیدن بېلگیلنگن بۉلیب، ۱۹۹۳-ییلدن بویان هر ییلی ۱۷-اکتوبرده نشانلب کېلینه‌دی.
