یان اېگلند: جهان افغانستاننی تاباره کوچه‌ییب باره‌یاتگن انقراضلر آلدیده یالغیز قالدیردی
۸صبح، کابل: ناروی قاچقینلر کېنگشی (NRC)افغانستان چوقور انسانپرورلیک، اقتصادی و اقلیم معمالریگه دوچ کېله‌یاتگنینی، ناتوگه اعضا دولتلر اېسه بو مملکت خلقینی قۉللب-قوّتلش باره‌سیده‌گی وعده‌لرینی اونوتگنینی اَیتدی.
ناروی قاچقینلر کېنگشی کاتبی یان اېگلند دوشنبه کونی، ۱۹-اسد، حساباتیده ناتوگه اعضا دولتلر افغان قیزلری و اۉغیل باله‌لریگه بېرگن وعده‌لرینی اونوتگنی و افغانستان تینچ اهالیسیدن یوز اۉگیرگنینی اَیتگن.
او قۉشیمچه قیلگن: «افغانستان بۉیلب آرتیب باره‌یاتگن احتیاجلر و قیزلر همده عیاللر حقوقلری‌نینگ تاباره کمه‌ییب باریشی شرایطیده بیز تاباره کۉپراق یالغیز قالماقده‌میز.»
حساباتگه کۉره، ۲۰۲۳-ییل آخریدن بویان ۶ میلیوندن آرتیق افغان مهاجر قۉشنی مملکتلردن افغانستانگه قَیتگن.
اوشبو تشکیلات‌نینگ اَیتیشیچه، قیتیب کېلگنلر‌نینگ ۷۳ فایزی ایشسیز بۉلیب، تیریکچیلیگینی تأمینلش اوچون امکانیتلری چېکلنگن.
اقلیم معمالری، منطقوی ترنگلیکلر همده عیاللر و قیزلرگه قرشی کوچه‌ییب باره‌یاتگن چېکلاولر هم افغانستان خلقیگه باسیمنی آشیرگن.
ناروی قاچقینلر کېنگشی انسانپرورلیک احتیاجلر آرتیب باره‌یاتگنیگه قره‌مه‌ی، انسانپرورلیک یاردم اوچون اجره‌تیله‌یاتگن مبلغ کمه‌یگنینی اَیتماقده.
اوشبو تشکیلات‌نینگ اَیتیشیچه، جاری ییلده حاضرگچه افغانستان اوچون انسانپرورلیک یاردمگه اتیگی ۴۵۰ میلیون دالر مبلغ اجره‌تیلگن بۉلیب، بو ضرور بۉلگن ۱،۷ میلیارد دالر‌نینگ ۲۶ فایزیگه تېنگ.
