متقی ریچارد لیندسی بیلن افغانستاندهگی سۉنگگی اۉزگریشلر حقیده صحبتلشدی
۸صبح، کابل: طالبان تشقی ایشلر وزیری امیرخان متقی، بریتانیانینگ افغانستان بۉییچه مخصوص وکیلی ریچارد لیندسی بیلن اوچره‌شیب، سۉنگگی اۉزگریشلر حقیده صحبتلشدی.
طالبان تشقی ایشلر وزیرلیگی سه‌شنبه کونی، ۸ ثور، ترقه‌تگن بیاناتیده معلوم قیلیشیچه، تامانلر اوشبو اوچره‌شووده طالبان و پاکستان اۉرته‌سیده‌گی سۉنگگی وضعیت، دوحه‌ده‌گی کۉپ تامانلمه اوچره‌شوولر و قطار باشقه منطقوی مسأله‌لر خصوصیده فکر المشتیرگن.
بیاناتگه کۉره، متقی اوشبو اوچره‌شووده افغانستان نینگ خوفسیزلیک و اجتماعی وضعیتی امریکا و ناتو کوچلری موجود بۉلگن دورگه نسبتاً «انچه یخشیلنگنینی» تأکیدله‌گن.
او شونینگدېک، طالبان دنیا دولتلری بیلن ایجابی علاقه‌لرنی یۉلگه قۉییشگه صادق اېکنینی و افغانستان حدودیدن هېچ بیر دولتگه قرشی فایده‌لنیلیشیگه یۉل قۉیمسلیگینی بیلدیرگن.
ریچارد لیندسی اېسه اوچره‌شووده پاکستان نینگ سۉنگگی هجوملری عاقبتیده افغانستان اهالیسی نینگ قربان بۉلیشیگه همدردلیک بیلدیرگن همده منطقوی و خلق‌ارا مسأله‌لر یوزه‌سیدن اۉز قره‌شلرینی متقی بیلن اۉرتاقلشگن.
او ینه شونی ایتگن که بویوک بریتانیا حکومتی و خلقی افغانستانگه انسانپرورلیک یاردمینی دوام اېتتیریشگه صادق بۉلیب، کېله‌جکده هم همکارلیکنی کېنگه‌یتیریش مقصدیده افغانستانگه تشریفلرینی دوام اېتتیره‌دی.
