ریچارد لیندسی: یوناما فعالیتی نینگ اوزه‌یتیریلیشینی آلقیشله‌یمن
۸صبح، کابل: بریتانیانینگ افغانستان بۉییچه مخصوص وکیلی ریچارد لیندسی افغانستاندهگی بیرلشگن ملتلر تشکیلاتی نینگ یاردم هیاتی (یوناما)نینگ فعالیتی اوزه‌یتیریلیشینی آلقیشله‌دی.
لیندسی سه‌شنبه کونی، ۲۶ جوزا، ایکس صحیفه‌سیده یازیشیچه، یوناما ملی و خلق‌ارا همکارلر بیلن بیر قطارده افغانستان خلقیگه بویوک بریتا‌نیا یاردمینی یېتکزیب بېریشنی قۉللب-قوّتلش همده افغانستاندهگی کېنگراق خلق‌ارا سعی-حرکتلرنی موافقلشتیریشده مهم رۉل اۉینه‌یدی.
بو بیانات بیرلشگن ملتلر تشکیلاتی خوفسیزلیک کېنگشی قطع‌نامه قبول قیلیب، یوناما فعالیتینی ینه بیر ییلگه اوزه‌یتیرگن بیر پیتده ینگره‌ماقده.
خوفسیزلیک کېنگشی اوشبو مدت‌نی اوزه‌یتیریش بیلن بیرگه انسانپرورلیک یاردمینی دوام اېتتیریش، انسان حقوقلرینی، اینیقسه عیاللر و باله‌لر حقوقلرینی قۉللب-قوّتلش همده افغانستاندهگی ترورچیلیک گروهلرگه قرشی کوره‌شیشگه اورغو بېرگن.
شونینگدېک، اوشبو قطع‌نامه‌ده بیرلشگن ملتلر تشکیلاتی باش کاتبیدن یوناما فعالیتینی استراتیژیک قَیته کۉریب چیقیش اۉتکزیشی و اونینگ حساباتینی کېلگوسی ییل مارچ آیی نینگ آخریگچه خوفسیزلیک کېنگشیگه تقدیم اېتیشی سۉره‌لگن.
