فارس کۉرفزیده ینگی تۉقنه‌شوولر؛ ایران هرمز بۉغازی‌نینگ تۉلیق یاپیلگنینی معلوم قیلدی
ایران عاموې اخبارات واسطه‌لری خبر بېریشیچه، فارس کۉرفزیده ایران و امریکا اۉرته‌سیده‌گی سۉنگگی تۉقنه‌شوولر آرتیدن هرمز بۉغازی تۉلیق یاپیلگن.
فارس اخبارات آژانسی، پنج‌شنبه کونی، ۱۱ جون، بو حقده «خاتم‌الانبیا مرکزی قرارگاهی» تامانیدن اعلان قیلینگنینی معلوم قیلگن.
خبرگه کۉره، ایران قوراللی کوچلری باش قوماندانلیک مرکزی حسابلنگن خاتم‌الانبیا مرکزی قرارگاهی منطقه‌ده‌گی خوفسیزلیک وضعیتی سببلی هرمز بۉغازی هر قنده‌ی تورده‌گی کېمه‌لر حرکتی اوچون یاپیلگنینی بیلدیرگن.
ایران مرکزی حربی قوماندانلیگی هرمز بۉغازیدن هر قنده‌ی حرکت، تجارت یاکه نفت تشووچی کېمه‌لر بۉلیشیدن قطعی نظر، نشانگه آلینیشی حقیده آگاهلنتیرگن.
ایران عاموې اخبارات واسطه‌لری خبرلریده هرمز بۉغازی‌نینگ یاپیلگنی سببی صفتیده امریکا کوچلری نینگ مملکت نینگ هرمزگان ولایتیده‌گی اَیریم حدودلرگه هجوم باشله‌گنی کۉرسه‌تیلگن.
سۉنگگی بیر نېچه کون ایچیده منطقه‌ده جایلشگن امریکا کوچلری و ایران اسلام انقلابی قۉریقچیلری بیر-بیریگه قرشی اۉز-ارا هجوملر اویوشتیرگن.
اۉتگن کېچه امریکا اوردوسی‌نینگ مرکزی قوماندانلیگی (سننتکام) ایران جنوبیده‌گی نشانلرگه ضربه بېرگنینی اعلان قیلگن.
ایرانهم فارس کۉرفزی نینگ جنوبی قیرغآغیده‌گی دولتلرده جایلشگن امریکا بزه‌لریگه جواب هجوملری اویوشتیرگنینی معلوم قیلگن.
بو شونده‌ی بیرحالده دیر که ایران و امریکا اوروشنی توگه‌تیش بۉییچه کېلیشووگه اېریشیش مقصدیده پاکستان واسطه‌چیلیگیده مذاکره‌لر آلیب بارماقده.
