پاکستان رۉیخطگه آلینگن ۱.۴ میلیون قاچقین‌نینگ قالیش مدتینی اوزه‌یتیردی
۸صبح، کابل: پاکستان حکومتی بو مملکتده‌گی قانونی یشش حجتلری مدتی توگه‌گن ۱.۴ میلیونگه یقین افغان قاچقینی نینگ قالیش مدتینی ۲۰۲۳-ییل آخریگچه اوزه‌یتیرگنینی اعلان قیلدی.
۱۹-اعقرب، جمعه کونی پاکستان حکومتی افغان قاچقینلریگه بېریلگن رۉیخطگه آلیش کارت‌لری نینگ (پی‌او‌آر) عمل قیلیش مدتی ۲۰۲۳-ییل ۳۱-دیکابرگچه اوزه‌یتیریلگنینی معلوم قیلدی.
اکتوبر آیی باشیده پاکستان مملکتده ناقانونی یشه‌یاتگن برچه مهاجرلرگه ۱-نوامبرگچه مملکتنی ترک اېتیشی اوچون مدت بېرگن، عکس حالده اولر اوّل حبسگه آلینه‌دی، کېین اېسه چیقاریله‌دیلر دیب آگاهلنتیرگن ایدی.
پاکستان قاچقینلر کارت‌لری نینگ عمل قیلیش مدتینی هر آلتی آیده بیر مرته ینگیلب تورردی، لېکن کارت‌لر مدتی ۳۰ جونده توگه‌گچ، آخرگی مرته بونده‌ی قیلمه‌یدی.
عینِ پیتده بیرلشگن ملتلر تشکیلاتی نینگ قاچقینلر بۉییچه عالی کمیسارلیگی اۉتگن هفته پنج‌شنبه کونی ینه بیر بار پاکستان‌دن افغانستانگه قَیتگن تقدیرده حیاتی خوف آستیده قالیشی ممکن بۉلگن افغان قاچقینلرینی حمایه قیلیشنی دوام اېتتیریشنی سۉره‌دی.
بیرلشگن ملتلر تشکیلاتی نینگ قاچقینلر بۉییچه عالی کمیساری اۉرین‌باسری جیلیان تریگز ایکس صحیفه‌سیده پاکستان‌دن افغان فقرالرینی بو مملکتدن جبری چیقاریش جریانینی بېکار قیلیشنی سۉره‌ب خبر اعلان قیلدی.
بیراق پاکستان حاضرگچه خلق‌ارا طلبلرگه ایجابی جواب بېرمه‌دی و قاچقینلرنی قانونی حجتلرسیز جبری چیقاریش جریانینی دوام اېتتیردی.
بیرلشگن ملتلر تشکیلاتی حساباتیگه کۉره، حاضرده پاکستان‌ده ۳.۵ میلیون افغان قاچقینلری استقامت قیله‌دی، اولردن فقط ۱.۴ میلیونی نینگ قانونی یشش حجتلری بار.
