پاکستان‌نینگ طالبانگه باسیمی؛ پکتیکا‌ده‌گی انگور اده چېگره بازاری بۉشه‌تیلیب اوزاقراق حدودگه کۉچیریلماقده
۹صبح، پکتیکا
پکتیکا ولایتی‌نینگ بیر قطار آقسقاللری و اهالیسی اَیتیشیچه، پاکستان‌نینگ حربی و چېگره باسیمی آستیده طالبان‌نینگ محلی عملدارلری برمل تومنیده‌گی انگور اده سودا و چېگره بازارینی بۉشه‌تیب، اونی اوزاقراق حدودگه کۉچیریشگه قرار قیلگن. اولر‌نینگ اَیتیشیچه، بو قرار حدودده تکرارا یوز بېرگن چېگره کېسکینلیکلریدن سۉنگ قبول قیلینگن. برمه‌ل تومنی اهالیسی معلوماتیگه کۉره، طالبان عملدارلری ۱۴-عقرب، پنجشنبه کونی دوکاندارلر و سرمایه‌دارلرگه اوشبو چاره خوفسیزلیک بیلن باغلیق معمالر سببلی عملگه آشیریله‌یاتگنینی بیلدیرگن. محلی منبعلر‌نینگ اَیتیشیچه، برمل و شیکین تومنلری اۉرته‌سیده جایلشگن «چشمه شمشه‌الدین»، حدودی ینگی بازار اوچون جای صفتیده بېلگیلنگن و او یېرده قوریلیش ایشلری هم باشلنگن.
پکتیکا اهالیسی طالبان‌نینگ انگور اده بازارینی بۉشه‌تیش حقیدگی بویروغینی شبهه‌لی دېب حسابله‌یدی و اوشبو گروه‌نینگ پاکستان بیلن یشیرین کېلیشووگه اېریشگن بۉلیشی ممکنلیگینی دعوا قیلماقده. اولر‌نینگ اَیتیشیچه، طالبان پاکستان حربیلری بیلن اوروش آلیب باره‌یاتگنی حقیده کۉپلب بیاناتلر بېرگنیگه قره‌مه‌ی، پاکستان‌نینگ حربی باسیمی قرشیسیده آرتگه چېکینگن. اولر اوشبو بازارنی یاپیش حقیدگی بویروق طالبان و پاکستان اۉرته‌سیده‌گی یشیرین و یازیلمه‌گن کېلیشوولر‌نینگ بیر قِسمی بۉلیشی ممکنلیگینی تخمین قیلماقده.
برمل تومنی و قۉشنی تومنلر اهالیسی هم طالبان‌نینگ بو قراریگه قرشی چیقیب، انگور اده بازاری بیر نېچه اۉن ییللردن بېری فعالیت یوریتیب کېله‌یاتگنینی و اولر اوشبو بازارده کېنگ کۉلملی سودا آست-قورمه‌سینی برپا اېتیش اوچون میلیونلب افغانی سرمایه کیریتگنینی تأکیدله‌ماقده. اولر‌نینگ اَیتیشیچه، بازار فعالیتی‌نینگ تۉخته‌تیلیشی و باشقه حدودگه کۉچیریلیشی سرمایه‌لری‌نینگ یۉقاتیلیشیگه سبب بۉله‌دی.
برمل تومنی اهالیسیدن بیری حاجی گل‌وزیر شونده‌ی دېیدی: «اوشبو بازار‌نینگ کۉچیریلیشی اهالیگه کتّه مالیوی ضرر یېتکزه‌دی و اولر‌نینگ اقتصادیاتینی ینه‌ده ضعیفلشتیره‌دی. حدودده وضعیت تینچ بۉلیشی و آدملر اوّلگیدېک اۉز فعالیتلرینی دوام اېتتیره آلیشی کېره‌ک».
پکتیکا ولایتی‌نینگ شیکین حدودیده یشاوچی، بیراق شخصینی آشکار اېتیشنی ایسته‌مه‌گن ینه بیر یشاوچی طالبان‌نینگ پاکستان قرشیسیده‌گی ضعیفلیگی و اوشبو گروه‌نینگ پاکستان رسمیلری بیلن یشیرین کېلیشووگه اېریشگن بۉلیشی ممکنلیگینی تنقید قیله‌دی. اونینگ تأکیدلشیچه، انگور اده بازاری‌نینگ کۉچیریلیشی عملده افغانستان حدودی‌نینگ بیر قِسمینی پاکستانگه تاپشیریش اوچون شرایط یره‌ته‌دی.
او شونده‌ی دېیدی: «بو ایش‌نینگ هېچ قنده‌ی منطقی یۉق. نېگه بیز اۉز خلقیمیزگه تېگیشلی بۉلگن جایده فعالیت یوریتمسلیگیمیز کېره‌ک؟ شبهه‌سیز، آدملر بازارنی بۉشه‌تگنیدن کېین پاکستان قوراللی کوچلری اوشبو حدودنی اېگه‌للب آله‌دی. طالبان یقینده اۉز نظارت-اۉتکزیش پُستلرینی ترک اېتگن اېدی».
محلی اهالی دعوالریگه کۉره، پاکستان کوچلری طالبانگه چېگره یقینیده‌گی بازارنی یاپیش و اونینگ قَیته آچیلیشیگه رخصت بېرمسلیک اوچون باسیم اۉتکزگن. اولر‌نینگ اَیتیشیچه، طالبان اېسه بو باسیمگه هېچ قنده‌ی مناسبت بیلدیرمسدن، اهالینی حاضرگی جایدن کمیده ۱۰ کیلومتر اوزاقلیکده جایلشگن ینگی بازارده سرمایه کیریتیشگه مجبورله‌ماقده.
تأکیدلش جایزکی، بوندن قریب بیر هفته آلدین هم محلی منبعلر ۸صبح گزېته‌سیگه طالبان جنگریلری اوشبو حدودلرده‌گی نظارت پُستلرینی اوّلراق ترک اېتگنینی تصدیقله‌گن اېدی. اولر‌نینگ اَیتیشیچه، طالبان‌نینگ کېینچه‌لیک اوشبو حدودلرده قَیته جایلشیشگه اورینیشلری پاکستان اوردوسی بیلن اۉزارا آتیشمه‌لرگه سبب بۉلگن.
پکتیکا ولایتینی پاکستان‌نینگ جَنوبی وزیرستان حدودی بیلن باغله‌یدیگن انگور اده منطقه‌سی سۉنگگی ییللرده مهم چېگره نقطه‌لریدن بیری و کېسکینلیکلر مرکزی بۉلیب کېلگن. اوشبو حدودده‌گی چېگره اۉتیش یۉلی و بازار هم اوّل خوفسیزلیک بیلن باغلیق خواطرلر سببلی بیر نېچه بار آچیلیب-یاپیلگن.
