سرپلده گوسفندی بازاری؛ دوکاندارلر ینگی بازارگه مجبوری کۉچیریلیشیدن شکایت قیلماقده
نیما
سرپل ولایتی‌نینگ گوسفندی تومنیده‌گی محلی منبعلر‌نینگ معلوم قیلیشیچه، طالبان محلی عملدارلری دوکانلرنی مُهرلش و دوکاندارلر‌نینگ ماللرینی یاقیب یوباریش بیلن تهدید قیلیب، اولرنی تومن‌نینگ چېکّه قِسمیده‌گی ینگی شهرچه‌گه کۉچیشگه همده او یېرده دوکان ساتیب آلیشگه مجبورله‌ماقده. مذکور منبعلرگه کۉره، سۉز باره‌یاتگن شهرچه اصلیده خصوصی تورر-جای لایحه‌سی بۉلیب، اونینگ سودا شهرچه‌سیگه ایلنتیریلیشی و خلق یېرلری‌نینگ معلوم شخصلرگه اجره‌تیلیشی جدّی سوال آستیده قالگن.
منبعلرگه کۉره،گوسفندی تومنیده شهرچه برپا اېتیش رېجه‌سی آلدینگی حکومت دوریده باشلنگن اېدی. اۉشه پیتده بیر قوریلیش کمپنیسی مذکور شهرچه‌نی آدملر‌نینگ خصوصی یېرلریده قورماقچی بۉلگن، بیراق بو رېجه بیر گروه یېر اېگه‌لری‌نینگ اعتراضی و محلی اهالی‌نینگ قیزیقیشی یۉقلیگی سببلی آرتگه سوریلگندی.
بیر منبع‌نینگ تأکیدلشیچه، اۉشه پیتده گوسفندی تومنی‌نینگ اۉشه وقتده‌گی بلدیه باشلیغی باشچیلیگیده‌گی اَیریم شخصلر بو لایحه شهرسازلیک وزیرلیگیده رۉیخطدن اۉتگن سودا شهرچه‌سی اېکنلیگی حقیده تشویقات آلیب بارگن اېدی.
منبع‌نینگ دعوا قیلیشیچه، اَیریم نفوذلی شخصلر خلق‌نینگ خصوصی یېرلریدن اۉزلری اوچون اۉنلب دوکانلرنی بېلگیلب آلگن و یېر اېگه‌لریگه بازار بو حدودگه کۉچیریلسه، بیرته دوکان‌نینگ قیمتی اولر‌نینگ بوتون دهقانچیلیک یېرلری عمومی قیمتیدن بیر نېچه برابر کۉپ بۉلیشینی وعده قیلیشگن. اونینگ اَیتیشیچه، آلدینگی حکومت قوله‌ب، طالبان قَیته حاکمیتنی اېگه‌لله‌گچ، مذکور لایحه‌نی عملگه آشیریش جریانی تۉخته‌تیب قۉییلگن و اۉتگن ییلگچه اونینگ عملگه آشیریلیشی حقیده درَک بۉلمه‌گن.
بیراق، محلی منبعلر اۉتگن ییلی مولوی ناصر اسملی شخص جهاد مدرسه‌سینی تشکیل اېتیش آتی آستیده و طالبان رهبری هبت‌الله آخوندزاده‌‌نینگ کۉرسه‌تمسینی آلگنینی دعوا قیلیب، اهالی‌نینگ سکّیز جریب خصوصی یېرینی اۉغلی‌نینگ نامیگه رسمیلشتیریب آلگنینی دعوا قیلماقده. اوشبو منبعلرگه کۉره، خلقلرگه تېگیشلی اَیریم سودا میدانلری هم معلوم شخصلرگه اجره‌تیلگن.
منبعلر، شونینگدېک، طالبان‌نینگ گوسفندیده‌گی تومن حاکمی داملا شیرمحمد اوشبو جریانگه قۉشیلگنینی و اونینگ یقین کیشیلریدن بیری بۉلگن داملا یاسین اوشبو تومن‌نینگ بلدیه باشلیغی اېتیب تعیینلنگنینی دعوا قیلماقده‌لر.
موجود بازار؛ طالبان محلی عملدارلری‌نینگ مهم درآمد منبعی
منبعلر‌نینگ معلوم قیلیشیچه، طالبان‌نینگ گوسفندی تومنیده‌گی محلی عملدارلری دوکانلرنی ینگی بازارگه کۉچیریشنی طلب قیله‌یاتگن بیر پیتده، عملده‌گی بازار ییللردن بېری اوشبو تومن اهالیسی‌نینگ سودا-ساتیق و اقتصادی احتیاجلرینی قاندیره‌دیگن اساسی مرکز بۉلیب کېلگن.
محلی منبعلر‌نینگ بیلدیریشیچه، قویاش ۱۳۹۵-ییلیده گوسفندی حدودیده سودا شهرچه‌سینی تشکیل اېتیش رېجه‌سی شهرسازلیک وزیرلیگیده رۉیخطدن اۉتکزیلگن اېدی، بیراق سیاسی کېلیشماوچیلیکلر و اۉشه وقتده‌گی مسؤوللر اۉرته‌سیده‌گی نزاعلر طفیلی بو رېجه عملگه آشمه‌گن اېدی.
منبعلر بېرگن معلوماتلرگه کۉره، گوسفندی‌نینگ عملده‌گی بازاریده ۶۰۰ تگه یقین فعال دوکان موجود بۉلیب، اولردن قریب ۴۰۰ ته‌سی بازار‌نینگ قوله‌ی جایلریده جایلشگن دولت ملکیدیر. اوشبو دوکانلر‌نینگ اجاره حقی طالبان شهر حاکملیگی باشقرمه‌سی تامانیدن ییغیلیب، مذکور گروه درآمدیگه قۉشیله‌دی. شهر حاکملیگی خادملری‌نینگ معاشی هم عیناً شو درآمددن تأمینلنه‌دی.
بوندن تشقری، طالبان نظارتی آستیده‌گی دولت اداره‌لری، جمله‌دن، بلدیه، اخبارات و مدنیت همده حج و وقف اداره‌لری اوشبو بازارده اۉز ملکلریگه اېگه بۉلیب، قوریلگن دوکانلر آرقه‌لی درآمد تاپه‌دیلر.
محلی منبعلردن بیری گوسفندی بازاری‌نینگ ییللیک درآمدی یېتّی میلیون افغانی اطرافیده اېکنینی، بازار کېنگه‌یتیریلیب، سودا لایحه‌لری یکونلنگن تقدیرده بو رقم اۉن میلیون افغانیگچه یېتیشی ممکنلیگینی اَیته‌دی.
منبع‌نینگ قۉشیمچه قیلیشیچه، دولت یېریده ۱۰۸ ته دوکان سیغیمیگه اېگه ایکّی قبتلی سودا مرکزینی قوریش هم آلدینگی حکومت دوریده معقوللنگن اېدی. اونینگ اَیتیشیچه، قوریلیش کمپنیسی مذکور مرکزنی قوریش اوچون طالبان شهرسازلیک وزیرلیگیدن هم رخصت‌نامه آلگن، بیراق اَیریم نفوذلی شخصلر‌نینگ اره‌لشووی سببلی اونینگ قوریلیش ایشلری کېچیکتیریلگن.
دوکانلرنی ساتیش و دوکاندارلرگه اقتصادی باسیم
محلی منبعلر‌نینگ بیلدیریشیچه، طالبان حاکمیتی دوریده دولت یېرلریده ۳۰۰ ته گه یقین دوکان قوریلیب، هر بیر دوکان‌نینگ سرقفلیک حقی ۳۰۰ مینگ افغانی اطرافیده، کمراق یاکه کۉپراق پول عوضیگه دوکاندارلرگه تاپشیریلگن. اولر‌نینگ سۉزلریگه کۉره، بو دوکانلر بیر نېچه بار بوزیلیب، قیته‌دن قوریلگن و آخرگی باسقیچده پیشیق خشتدن و ستندرد حالتده بنیاد اېتیلگن.
اوشبو منبعلر اهالی‌نینگ اقتصادی احوالی آغیر اېکنینی و تومن‌نینگ کۉپلب اهالیسی حتا اۉن مینگ افغانی هم تۉله‌ی آلمه‌سلیگینی تأکیدله‌یدیلر. اولر شونده‌ی شرایطده قنده‌ی قیلیب بېش ییل ایچیده طالباندن بیر نېچه بار دوکان ساتیب آلیشلری ممکنلیگینی سۉراق قیلماقده‌لر. منبعلرگه کۉره، کۉپچیلیک عایله‌لر اوچون تیریکچیلیک منبعلریدن بیری بۉلگن ایرانده ایشلشدن توشه‌دیگن درآمد هم حاضرده کېسکین کمه‌یگن. بونده‌ی شرایطده دوکاندارلرنی مجبوری کۉچیریش و اولرنی ینگی دوکان ساتیب آلیشگه مجبورلش خلققه ینه‌ده آغیر اقتصادی باسیم آلیب کېلیشی ممکن.
دوکانلرنی مُهرلش و ماللرینی یاقیب یوباریش بیلن تهدید قیلیش
منبعلر‌نینگ خبر بېریشیچه، طالبان بلدیه‌سی، تومن اداره‌سی و طالبان علمالر کېنگشی وکیللریدن عبارت هیاتلر هر کونی دوکانلرگه تشریف بویوریب، دوکاندارلرگه بازارنی ترک اېتیب، ینگی شهرچه‌دن دوکان ساتیب آلیشلری شرطلیگی حقیده آگاهلنتیریش بېرماقده. اولر‌نینگ اَیتیشیچه، کۉچیشنی ایسته‌مه‌گن دوکاندارلرگه دوکانلری مُهرلنیشی و ماللری یاقیب یوباریلیشی حقیده آگاهلنتیریش بېریلگن.
حال‌بوکه، دوکاندارلر ینگی شهرچه‌دن دوکان ساتیب آلیشگه مالیوی امکانیتلری یۉقلیگینی، بازارنی تومن مرکزیدن اوزاق بۉلگن حدودگه کۉچیریش اولر‌نینگ مزاجلری و ایش امکانیتلرینی هم کمه‌یتیریب یوباریشینی اَیتماقده‌لر.
محلی منبعلر اگر ینگی شهرچه رسمی لایحه و شهرسازلیکنی رواجلنتیریش یۉلیده‌گی ایش بۉلسه، نیمه اوچون اونینگ قانونی حجتلری، تصدیقلنگن خریطه‌سی، یېر اېگه‌لیک حجتلری و دوکانلرنی تقسیملش ترتیبی شفّاف طرزده خلققه تقدیم اېتیلمسلیگینی سۉره‌ماقده‌لر.
گوسفندی تومنی اهالیسی ینگی شهرچه‌‌نینگ حجتلری، یېر کاغذلری، دوکانلرنی تاپشیریش ترتیبی، عملده‌گی بازار درآمدلری و سودا مرکزی لایحه‌سی‌نینگ تۉخته‌تیلیش سببلرینی مستقل روشده تېکشیریب چیقیشنی طلب قیلماقده‌لر. اولر شهرسازلیک و سودا مرکزلرینی تشکیل اېتیش خلق‌نینگ مال-ملکینی یۉقاتیش همده یوزلب عایله‌لرنی اۉز درآمد منبعیدن محروم قیلیش عوضیگه عملگه آشیریلمسلیگی کېره‌کلیگینی تأکیدله‌مه‌یدیلر.
