عیال شفاکارلر یېتیشمسلیگی، زلزله ضررلنگن حدودلرده؛ طالبلر کنر و ننگرهار عیاللری نینگ استه-سیکین اۉلیمیگه مسوول دېر
آویژه خورشید
کېچه کېچقورون، کنر و ننگرهار ولایتلریده هلاکتلی زلزله یوز بېردی. طالبان نینگ معلوماتیگه کۉره، حادثه نتیجه‌سیده ۸۰۰ کیشی هلاک بۉلگن و ۲۵۰۰ کیشی جراحت آلگن. شونگه قره‌مه‌ی، محلی منبعلرنینگ ایتیشیچه، اوشبو ولایتلرده ساغلیقنی سقلش مرکزلریده عیال شفاکارلر یېتیشمسلیگی سبب، زلزله قربانلری بۉلگن عیاللر عاجل طبی یاردملردن فایده‌لنه آلمه‌یدی.
منبعلرنینگ قۉشیمچه قیلیب، جراحت آلگن عیاللر کۉپینچه ساعتلر دوامیده کوتیشگه مجبور بۉلیشه‌دی یاکه دوالش جریانی کېچیکه‌دی، چونکه عیال طبی ایشلاووچیلری یېترلی اېمس. محلی منبعلرنینگ آگاهلنتیریشیچه، اگر مرکزلر نینگ امکانیتینی آشیریش و عیال شفاکارلرنی ایشگه جلب قیلیش بۉییچه عاجل چاره‌لر کۉریلمسه، وضعیت ینه‌ده کېسکین‌لشه‌دی.
زلزله قربانلری و محلی منبعلر ۸صبح کونده‌لیگی بیلن صحبتده ایتیشیچه، رسمی روشده اعلان قیلینگن اۉلیم و جراحت آلگنلر سانی یېتکرمه‌لرده نشر بولگندن کۉپراقدیر. اولر نینگ تأکیدلشیچه، عیاللر و قیزلر آغیر وضعیتده بۉلیب، عاجل طبی یاردمگه محتاج.
کنر تومنیده یشاوچی ضمیر سردارخیل‌نینگ ایتیشیچه، زلزله قربانلری بۉلگن عیال و قیزلر آغیر وضعیتده بۉلیب، جراحت آلگنلر سانی آشگنی سری ساغلیقنی سقلش ایشلاووچیلری یېتیشماوچیلیگی انیق سېزیلماقده. او یېتکرمه‌لر تامانیدن بېریلگن رقم‌نی ناتۉغری دېب بیله‌دی و تأکیدله‌یدی: عملده‌گی وضعیتگه کۉره، هلاک بۉلگنلر و جراحت آلگنلر سانی رسمی رقملردن کۉپراق و بو کۉرسه‌تکیچلر هلی هم آرتیب بارماقده.
سردارخیل گه کۉره : «اېنگ کۉپ هلاک بۉلگن و جراحت آلگنلر عیاللر و باله‌لردیر و شفاخانه‌لر عیال ایشلاووچیلری یېتیشمسلیگی بیلن یوزلشماقده. موجود ایشلاووچیلر سانی اېسه احتیاجنی قاندیره آلمه‌یدی.» او شونینگدېک، یاردم تشکیلاتلریدن التماس قیله‌دی: «اولر علاجی باریچه تېزراق چاره کۉرسین؛ چونکه ضررلنگنلر اېنگ یامان شرایطده قالماقده و اولرگه آزیق-آوقت، دارو، دوالش و باش‌پناه ضرور. هلاک بۉلگنلر و جراحت آلگنلر سانی ساعتدن ساعتگه آشیب بارماقده.»
باشقه بیر منبع، اسمی آشکار قیلینمسلیگینی ایسته‌گن، ایتیشیچه: «کۉپلب زلزله قربانلری بۉلگن عیال و باله‌لر کنر و ننگرهار تومنلریده‌گی ساغلیقنی سقلش مرکزلریگه یېتکزیلگن؛ لېکن افسوس بیلن، عیال شفاکارلر یېتیشمسلیگی سببلی بو حمایه‌گه محتاج گروه بیلن ایشلش کته قیینچیلیکلرگه دوچ کېلماقده.» او، اگر مرکزلر نینگ امکانیتینی آشیریش و عیال شفاکارلرنی جلب قیلیش بۉییچه عاجل چاره‌لر کۉریلمسه، وضعیت ینه‌ده آغیرلشیشی ممکن دیب، آگاهلنتیره‌دی.
اوشبو منبع، افغان جامعه‌سیده شونده‌ی، اېرکک عیالنی تېکشیره آلمه‌یدی یاکه دواله‌ی آلمه‌یدی. کۉپلب عیاللر ساعتلر دوامیده طبی یاردم کوتیشگه مجبور بۉلیشگن و بعضی حاللرده عیال شفاکار یۉقلیگی سببلی یاردم کۉرسه‌تیلیشی کېچیکگن. بو حالت هلاک بۉلگنلر یاکه قربانلر سانی نینگ آشیشیگه آلیب کېله‌دی و کۉپلب عیاللر حیاتینی یۉقاته‌دی، دېب،قۉشیمچه قیلدی.
اولراق، طالبان ساغلیقنی سقلش وزیرلیگی هم مملکت نینگ ایریم شرقی ولایتلریده عیال داکترلر یېتیشمسلیگینی تصدیقله‌گن اېدی. کنرده‌گی هلاکتلی زلزله جراحتلنگنلر عیال شفاکارلر و طبی ایشلاووچیلر یېتیشمسلیگیدن ناراضی بۉلیب، طالبان سۉنگگی تۉرت ییل ایچیده بیلیم یورتلر، اینیقسه طبیات تعلیمی مؤسسه‌لرینی قیزلر و عیاللر اوچون یاپگنینی حسابگه آلگن حالده، وضعیت ینه‌ده آغیرلشگن.
اولر برچه بیلیم یورتلر، انستیتوت‌لر و طبیات اۉقوو مرکزلرینی، شو جمله‌دن قابله‌لیک، نرسنگ و طبی تکنالوژی ساحه‌لرینی قیزلر و عیاللر اوچون یاپگن.
کنر و ننگرهار ولایتلریده هلاکتلی زلزله قربانلری بۉلگن عیال و قیزلر عیال شفاکارلر و طبی خادملر یېتیشمسلیگیدن اذیت چېکماقده و حیات بیلن کوره‌شماقده، شو بیلن بیرگه طالبان سۉزلاوچیسی ذبیح الله مجاهد، آخرگی بیاناتلریده عیاللر تعلیمینی «کیچیک مسأله» دېب اته‌دی؛ بو قرار اېسه یوزلب عیال و قیزلر نینگ حیاتینی هلاکت و اۉلیم خوفیگه قۉیدی.
اولراق، بیرلشگن ملتلر تشکیلاتی نینگ باله‌لرنی قۉللب-قوتلش صندیغی (یونیسف) آگاهلنتیرگن اېدی، ملکه‌لی طبی خادملر یېتیشمسلیگی و ساغلیقنی سقلش امکانیتی نینگ موجود اېمسلیگی کۉپلب فقرالر حیاتینی جدی خوف آستیگه قۉیگن.
