منبعلر: طالبان امید سبز شهرچه‌سی اهالیسی اویلریگه اجاره حقی بېلگیله‌گن
۸صبح، کابل: کابل شهریده‌گی منبعلر‌نینگ اَیتیشیچه، طالبان کابل‌نینگ غربیده جایلشگن امید سبز شهرچه‌سی اهالیسی و اجاره‌چیلری اوچون هر بیر خانه اوچون آییگه تۉرت مینگ افغانی اجاره حقی بېلگیله‌گن.
منبعلر سه‌شنبه کونی، ۱۴ میزان، ۸صبح گزېته‌سیگه بېرگن معلوماتیده طالبان اجاره‌چیلردن آلتی آیلیک اجاره حقینی آلدیندن تۉله‌شنی طلب قیلگنینی اَیتیشدی.
منبعلر قۉشیمچه قیلیشیچه، طالبان اهالی آره‌سیده مخصوص شکللرنی ترقه‌تیب، اولرنی اجاره حقینی تۉله‌شگه مجبورله‌گن.
منبعلر‌نینگ اَیتیشیچه، طالبان کابل‌نینگ غربی قِسمیده‌گی ینه بیر نېچه شهرچه اهالیسی اوچون هم اجاره حقینی تۉله‌ش حقیده آگاهلنتیریش بېرگن.
منبعلر قۉشیمچه قیلگن: «بو شهرچه‌لر جاغوری‌لیکلر شهرچه‌سی، اته ابوذر شهرچه‌سی، مهدیه شهرچه‌سی، سرخ‌آباد و شهید مزاری نمازگاهی آرتیده‌گی شهرچه‌نی اۉز ایچیگه آله‌دی.»
طالبان عدلیه وزیرلیگی بوندن اوّل اعلان قیلگن بیاناتیده کابل شهریده‌گی «امید سبز شهرچه‌سی»نینگ ۱ مینگ ۵۰۰ جریبدن آرتیق یېرینی اۉز تصرفیگه آلگنی حقیده خبر بېرگن اېدی.
